ರಾಯ್ ಬರೇಲಿಯಲ್ಲಿ ಕೊಳದಲ್ಲಿ ಮುಳುಗಿ ಐವರು ಮಕ್ಕಳು ಸಾವು

ರಾಯ್ ಬರೇಲಿ: ಉತ್ತರ ಪ್ರದೇಶದ ರಾಯ್ ಬರೇಲಿಯ ಗ್ರಾಮವೊಂದರಲ್ಲಿ ಮನೆಯ ಬಳಿಯ  ಕೊಳದಲ್ಲಿ ಆಟವಾಡುತ್ತಿದ್ದ 8 ರಿಂದ 12 ವರ್ಷದೊಳಗಿನ ಐವರು ಮಕ್ಕಳು ನೀರಿನಲ್ಲಿ ಮುಳುಗಿ ಸಾವನ್ನಪ್ಪಿದ್ದಾರೆ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.

ನಾಲ್ವರು ಬಾಲಕಿಯರು ಮತ್ತು ಒಬ್ಬ ಬಾಲಕ ಸೇರಿದಂತೆ ಎಲ್ಲಾ ಮಕ್ಕಳು ಆಗಾಗ್ಗೆ ಕೊಳದಲ್ಲಿ ಆಟವಾಡುತ್ತಿದ್ದರು ಎಂದು ರಾಯ್ ಬರೇಲಿ ಪೊಲೀಸ್ ವರಿಷ್ಠಾಧಿಕಾರಿ (ಎಸ್ಪಿ) ಅಲೋಕ್ ಪ್ರಿಯದರ್ಶಿ ಹೇಳಿದ್ದಾರೆ. ಆದಾಗ್ಯೂ, ಶನಿವಾರ, ಮಳೆಯಿಂದಾಗಿ ಉಕ್ಕಿ ಹರಿಯುತ್ತಿದ್ದ ಕೊಳದಲ್ಲಿ ಅವರು ಆಳವಾದ ನೀರಿಗೆ ಜಾರಿದ್ದಾರೆ.

ದಾಲ್ಮಾವು ವೃತ್ತದ ಗಡಗಂಜ್ ಪೊಲೀಸ್ ಠಾಣೆ ವ್ಯಾಪ್ತಿಯ ಮಂಗ್ತಾ ಡೇರಾ ಗ್ರಾಮದ ನಿವಾಸಿಗಳಾದ ವೈಶಾಲಿ (12), ಸೋನಮ್ (10), ರೂಪಾಲಿ (9), ರಿತು (8) ಮತ್ತು ಅಮಿತ್ (8) ಎಂದು ಗುರುತಿಸಲಾಗಿದೆ ಎಂದು ಎಸ್ಪಿ ತಿಳಿಸಿದ್ದಾರೆ.

ಗ್ರಾಮದಲ್ಲಿ ಯಾವುದೇ ಕಾನೂನು ಮತ್ತು ಸುವ್ಯವಸ್ಥೆ ಸಮಸ್ಯೆಯಿಲ್ಲದಿದ್ದರೂ, ಶವಗಳ ಅಂತಿಮ ವಿಧಿಗಳು ಮುಗಿಯುವವರೆಗೂ ಮುನ್ನೆಚ್ಚರಿಕೆ ಕ್ರಮವಾಗಿ ಅಲ್ಲಿ ಪೊಲೀಸ್ ಪಡೆಯನ್ನು ನಿಯೋಜಿಸಲಾಗಿದೆ ಎಂದು ಎಸ್ಪಿ ಹೇಳಿದರು.