ಧೀಮಂತ ರಾಜಕಾರಿಣಿ ಬಿಜೆಪಿಯ ಭೀಷ್ಮ ಎಲ್‌.ಕೆ ಅಡ್ವಾಣಿ ಅವರ ವ್ಯಕ್ತಿತ್ವ ಪರಿಚಯ

ದೆಹಲಿ: ಜನಸಂಘದ ಮೂಲಕ ರಾಜಕೀಯ ಜೀವನವನ್ನು ಆರಂಭಿಸಿದ ಲಾಲ್ ​ಕೃಷ್ಣ ಅಡ್ವಾಣಿ ಭಾರತದ ಪ್ರಮುಖ ರಾಜಕಾರಣಿಗಳಲ್ಲಿ ಒಬ್ಬರು. ಭಾರತ ಕಂಡ ಧೀಮಂತ ರಾಜಕೀಯ ನಾಯಕರಲ್ಲಿ ಅಡ್ವಾಣಿ ಅಗ್ರಸ್ಥಾನದಲ್ಲಿದ್ದಾರೆ. ಅಟಲ್​ ಬಿಹಾರಿ ವಾಜಪೇಯಿ ಅವರ ಜತೆಗೂಡಿ ಬಿಜೆಪಿಯನ್ನು ಕಟ್ಟಲು ದಶಕಗಳ ಕಾಲ ಹಗಲಿರುಳು ದೇಶಾದ್ಯಂತ ಸುತ್ತಾಡಿದ್ದಾರೆ. ಬಿಜೆಪಿಯಲ್ಲಿ ಏನೂ ಇಲ್ಲದಿದ್ದಾಗ ಪಕ್ಷವನ್ನು ಕಟ್ಟುವುದರ ಜತೆಗೆ ಪ್ರತಿ ರಾಜ್ಯಗಳಲ್ಲೂ ಬಿಜೆಪಿ ಸರ್ಕಾರಗಳು ಬರುವ ನಿಟ್ಟಿನಲ್ಲಿ ಕೆಲಸವನ್ನು ಆರಂಭಿಸಿದ್ದು ಎಲ್​ಕೆ ಅಡ್ವಾಣಿ.

ರಾಮಮಂದಿರ ನಿರ್ಮಾಣಕ್ಕೆ ರಥಯಾತ್ರೆ, ರಾಮಮಂದಿರ ನಿರ್ಮಾಣ ಹೋರಾಟ ಸೇರಿದಂತೆ ಇನ್ನಿತರೆ ಹೋರಾಟಗಳನ್ನು ನಡೆಸಿಕೊಂಡು ಬಂದಿದ್ದರು. ವಾಜಪೇಯಿ ಸರ್ಕಾರದಲ್ಲಿ ಗೃಹ ಸಚಿವ, ಉಪಪ್ರಧಾನಿಯಾಗಿ ಕೆಲಸ ಮಾಡಿದ್ದರು. ಇವರನ್ನು ಬಿಜೆಪಿಯ ಭೀಷ್ಮ ಎಂದೂ ಕೂಡ ಕರೆಯುತ್ತಾರೆ.

ಲಾಲ್‌ ಕೃಷ್ಣ ಅಡ್ವಾಣಿ ಎಲ್‌ಕೆ ಅಡ್ವಾಣಿ ಅವರ ಪೂರ್ಣ ಹೆಸರು. ಇವರು ನವೆಂಬರ್‌ 8, 1927ರಲ್ಲಿ ಸ್ವಾತಂತ್ರ್ಯ ಪೂರ್ವ ಭಾರತದ ಸಿಂಧ್‌ ಪಾಂತ್ಯದ ಗೊರೆಗಾಂವ್‌ನಲ್ಲಿ ಜನಿಸಿದರು. ಶ್ರೀ ಕಿಶಿಂಚಂದ್‌ ಅಡ್ವಾಣಿ ಹಾಗೂ ಜ್ಞಾನಿದೇವಿ ಇವರ ತಂದೆ-ತಾಯಿ. ಇವರಿಗೆ ಶೀಲಾ ಎಂಬ ಸಹೋದರಿ ಇದ್ದಾರೆ. ಅಡ್ವಾಣಿ ಅವರು ಆರ್‌ಎಸ್‌ಎಸ್‌ ದ ಮೂಲಕ ಭಾರತದ ರಾಜಕೀಯ ರಂಗಕ್ಕೆ ಧುಮುಕಿದವರು.

ಲಾಲ್ ಕೃಷ್ಣ ಅಡ್ವಾಣಿ ಕರಾಚಿಯ ಸೇಂಟ್ ಪ್ಯಾಟ್ರಿಕ್ ಹೈಸ್ಕೂಲ್‌ನಲ್ಲಿ ತಮ್ಮ ಶಾಲಾ ಶಿಕ್ಷಣವನ್ನು ಮಾಡಿದರು. ಅವರು 1936 ರಿಂದ 1942 ರವರೆಗೆ 6 ವರ್ಷಗಳ ಕಾಲ ಅಲ್ಲಿ ಅಧ್ಯಯನ ಮಾಡಿದರು. ಎಲ್.ಕೆ. ಅಡ್ವಾಣಿಯವರ ಸಮಾಜ ಸೇವಕರಾಗಿ ಜೀವನವು 1947 ರಲ್ಲಿ ಅವರು ಕರಾಚಿಯ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಕಾರ್ಯದರ್ಶಿಯಾಗಿ ನೇಮಕಗೊಂಡರು.

1947 ರಲ್ಲಿ, LK ಅಡ್ವಾಣಿ ಅವರನ್ನು ಕರಾಚಿ ವಿಭಾಗದ RSS ನ ಕಾರ್ಯದರ್ಶಿಯಾಗಿ ನೇಮಿಸಲಾಯಿತು. 1951 ರಲ್ಲಿ ಅವರು ಭಾರತೀಯ ಜನಸಂಘದ ಸದಸ್ಯರಾದರು. ಭಾರತೀಯ ಜನಸಂಘವನ್ನು ಶ್ಯಾಮ ಪ್ರಸಾದ್ ಮುಖರ್ಜಿಯವರು ಸ್ಥಾಪಿಸಿದರು. 1966 ರಿಂದ 1967 ರವರೆಗೆ ಎಲ್.ಕೆ ಅಡ್ವಾಣಿ ಭಾರತೀಯ ಜನಸಂಘದ ನಾಯಕರಾಗಿದ್ದರು. 1970 ರಿಂದ 1976 ರ ವರೆಗೆ, ಎಲ್.ಕೆ.ಅಡ್ವಾಣಿ ದೆಹಲಿಯಿಂದ ರಾಜ್ಯಸಭೆಯ ಸದಸ್ಯರಾಗಿದ್ದರು. 1973 ರಲ್ಲಿ ಎಲ್ ಕೆ ಅಡ್ವಾಣಿ ಭಾರತೀಯ ಜನಸಂಘದ ಅಧ್ಯಕ್ಷರಾಗಿ ಆಯ್ಕೆಯಾದರು. ನಂತರ ಅವರು 1976 ರಿಂದ 1982 ರ ಅವಧಿಗೆ ಗುಜರಾತ್‌ನಿಂದ ರಾಜ್ಯಸಭೆಯ ಸದಸ್ಯರಾದರು. 1977ರಲ್ಲಿ ಎಲ್ ಕೆ ಅಡ್ವಾಣಿ, ರಾಜಕೀಯ ಮುತ್ಸದ್ದಿ ಅಟಲ್ ಬಿಹಾರಿ ವಾಜಪೇಯಿ ಅವರೊಂದಿಗೆ ಜನತಾ ಪಕ್ಷಕ್ಕೆ ಸೇರಿದರು. ಜನವರಿ 1980 ರಿಂದ ಏಪ್ರಿಲ್ 1980 ರವರೆಗೆ ಎಲ್ ಕೆ ಅಡ್ವಾಣಿ ರಾಜ್ಯಸಭೆಯಲ್ಲಿ ವಿರೋಧ ಪಕ್ಷದ ನಾಯಕರಾಗಿದ್ದರು. ಎಲ್ ಕೆ ಅಡ್ವಾಣಿಯವರು 1980 ರಲ್ಲಿ ಭಾರತೀಯ ಜನತಾ ಪಕ್ಷದ ಪ್ರಧಾನ ಕಾರ್ಯದರ್ಶಿಯಾಗಿ ಆಯ್ಕೆಯಾದರು ಮತ್ತು 1986 ರ ವರೆಗೆ ಆ ಸ್ಥಾನದಲ್ಲಿದ್ದರು.

ಇನ್ನು 1982 ರಲ್ಲಿ, ಎಲ್ ಕೆ ಅಡ್ವಾಣಿ ಅವರು 3 ನೇ ಅವಧಿಗೆ ರಾಜ್ಯಸಭೆಗೆ ಮರು ಆಯ್ಕೆಯಾದರು. 1986 ರಲ್ಲಿ ಅವರು ಭಾರತೀಯ ಜನತಾ ಪಕ್ಷದ ಅಧ್ಯಕ್ಷರಾದರು ಮತ್ತು 1991 ರ ವರೆಗೆ ಹುದ್ದೆಯಲ್ಲಿದ್ದರು. 1988 ರಲ್ಲಿ, ಅವರು 4 ನೇ ಅವಧಿಗೆ ರಾಜ್ಯಸಭೆಯ ಸದಸ್ಯರಾಗಿ ಮರು ಆಯ್ಕೆಯಾದರು. 1989 ರಲ್ಲಿ, ಎಲ್ ಕೆ ಅಡ್ವಾಣಿ 9 ನೇ ಲೋಕಸಭೆಯ ಸದಸ್ಯರಾಗಿ ಆಯ್ಕೆಯಾದರು.1989 ರಿಂದ 1991 ರವರೆಗೆ ಎಲ್​ಕೆ ಅಡ್ವಾಣಿ ಲೋಕಸಭೆಯಲ್ಲಿ ಬಿಜೆಪಿಯ ಸಂಸದೀಯ ಪಕ್ಷದ ನಾಯಕರಾಗಿದ್ದರು. 1990 ರಿಂದ 1991 ರವರೆಗೆ ಎಲ್‌ಕೆ ಅಡ್ವಾಣಿ ಅವರು ನೇಮಕಾತಿ ಮತ್ತು ಷರತ್ತುಗಳ ನಿಯಮಗಳು 1955 ರ ಪ್ರಕಾರ ಲೋಕಸಭೆಯ ಸೆಕ್ರೆಟರಿಯೇಟ್ ಸಮಿತಿಯಲ್ಲಿ ಪರಿಶೀಲನೆಯ ಅಧ್ಯಕ್ಷರಾಗಿದ್ದರು.

1991 ರಲ್ಲಿ, ಎಲ್ ಕೆ ಅಡ್ವಾಣಿ ಅವರು 2 ನೇ ಅವಧಿಗೆ ಹತ್ತನೇ ಲೋಕಸಭೆಯ ಸದಸ್ಯರಾಗಿ ಆಯ್ಕೆಯಾದರು. 1991 ರಿಂದ 1993 ರ ವರೆಗೆ ಎಲ್ ಕೆ ಅಡ್ವಾಣಿ ವಿರೋಧ ಪಕ್ಷದ ನಾಯಕರಾಗಿದ್ದರು. 1993 ರಿಂದ 1998 ರ ವರೆಗೆ ಎಲ್ ಕೆ ಅಡ್ವಾಣಿ ಮತ್ತೆ ಬಿಜೆಪಿಯ ಅಧ್ಯಕ್ಷರಾದರು. 1998 ರಲ್ಲಿ, ಎಲ್ ಕೆ ಅಡ್ವಾಣಿ ಅವರು 3 ನೇ ಅವಧಿಗೆ 12 ನೇ ಲೋಕಸಭೆಯ ಸದಸ್ಯರಾಗಿ ಆಯ್ಕೆಯಾದರು. 1998 ರಿಂದ 1999 ರ ವರೆಗೆ ಎಲ್ ಕೆ ಅಡ್ವಾಣಿ ಅವರು ಕೇಂದ್ರ ಗೃಹ ಖಾತೆ ಸಚಿವರಾಗಿದ್ದರು. 1999 ರಲ್ಲಿ, ಎಲ್ ಕೆ ಅಡ್ವಾಣಿ ಅವರು 4 ನೇ ಅವಧಿಗೆ ಹದಿಮೂರನೇ ಲೋಕಸಭೆಯ ಸದಸ್ಯರಾಗಿ ಮರು ಆಯ್ಕೆಯಾದರು.

ಅಕ್ಟೋಬರ್ 1999 – ಮೇ 2004 ರಿಂದ, ಎಲ್ ಕೆ ಅಡ್ವಾಣಿ ಕೇಂದ್ರ ಗೃಹ ವ್ಯವಹಾರಗಳ ಸಚಿವರಾಗಿದ್ದರು ಜೂನ್ 29 2002 ರಿಂದ ಮೇ 2004 ರವರೆಗೆ ಎಲ್ ಕೆ ಅಡ್ವಾಣಿ ಅವರು ಉಪಪ್ರಧಾನಿಯಾಗಿದ್ದರು. ಜುಲೈ 1, 2002 ರಿಂದ, ಆಗಸ್ಟ್ 25, 2002 ರವರೆಗೆ, ಎಲ್.ಕೆ. ಅಡ್ವಾಣಿ ಅವರು ಸಿಬ್ಬಂದಿ, ಪಿಂಚಣಿ ಮತ್ತು ಸಾರ್ವಜನಿಕ ಕುಂದುಕೊರತೆಗಳ ಕೇಂದ್ರ ಕ್ಯಾಬಿನೆಟ್ ಸಚಿವರಾಗಿದ್ದರು. 2004 ರಲ್ಲಿ, ಎಲ್ ಕೆ ಅಡ್ವಾಣಿ ಅವರು ಹದಿನಾಲ್ಕನೇ ಲೋಕಸಭೆಯಲ್ಲಿ 5 ನೇ ಅವಧಿಗೆ ಮರು ಆಯ್ಕೆಯಾದರು, ವಿರೋಧ ಪಕ್ಷದ ನಾಯಕರಾದರು ಆಗಸ್ಟ್ 5, 2006 ರಿಂದ ಮೇ 2009 ರವರೆಗೆ, ಎಲ್ ಕೆ ಅಡ್ವಾಣಿ ಅವರು ಗೃಹ ವ್ಯವಹಾರಗಳ ಸಮಿತಿಯ ಸದಸ್ಯರಾಗಿದ್ದರು.

2009 ರಲ್ಲಿ, ಎಲ್ ಕೆ ಅಡ್ವಾಣಿ ಅವರು 6 ನೇ ಅವಧಿಗೆ ಹದಿನೈದನೇ ಲೋಕಸಭೆಗೆ ಮರು ಆಯ್ಕೆಯಾದರು. ಮೇ 2009 ರಿಂದ ಡಿಸೆಂಬರ್ 2009 ರವರೆಗೆ, LK ಅಡ್ವಾಣಿ ಲೋಕಸಭೆಯಲ್ಲಿ ವಿರೋಧ ಪಕ್ಷದ ನಾಯಕರಾಗಿದ್ದರು. ಆಗಸ್ಟ್ 4, 2009 ರಂದು, ಸಂಸತ್ ಭವನದ ಸಂಕೀರ್ಣದ ರಾಷ್ಟ್ರೀಯ ನಾಯಕರು ಮತ್ತು ಸಂಸದರ ಪ್ರತಿಮೆಗಳು/ ಭಾವಚಿತ್ರಗಳ ಪ್ರತಿಷ್ಠಾಪನೆಯ ಸಮಿತಿಯ ಸದಸ್ಯರಾಗಿ LK ಅಡ್ವಾಣಿ ಆಯ್ಕೆಯಾದರು. ಆಗಸ್ಟ್ 31, 2009 ರಂದು, ಎಲ್ ಕೆ ಅಡ್ವಾಣಿ ಅವರು ಗೃಹ ವ್ಯವಹಾರಗಳ ಸಮಿತಿಯ ಸದಸ್ಯರಾದರು.

ಡಿಸೆಂಬರ್ 15, 2009 ರಂದು, LK ಅಡ್ವಾಣಿ ಅವರು ಪಾರ್ಲಿಮೆಂಟ್ ಹೌಸ್ ಕಾಂಪ್ಲೆಕ್ಸ್‌ನ ಪರಂಪರೆಯ ಗುಣಲಕ್ಷಣಗಳ ನಿರ್ವಹಣೆ ಮತ್ತು ಅಭಿವೃದ್ಧಿಯ ಜಂಟಿ ಸಂಸದೀಯ ಸಮಿತಿಯ ಸದಸ್ಯರಾದರು. ಜೂನ್ 10, 2013 ರಂದು, ಎಲ್ ಕೆ ಅಡ್ವಾಣಿ ಅವರು ಹೊಂದಿದ್ದ ಎಲ್ಲಾ ಹುದ್ದೆಗಳಿಗೆ ರಾಜೀನಾಮೆ ನೀಡಿದರು. 2014ರ ಬಳಿಕ ಬಿಜೆಪಿ ಮಾರ್ಗದರ್ಶಕ ಮಂಡಳಿಯ ಸದಸ್ಯರಾಗಿದ್ದರು.

ಇನ್ನು ಲಾಲ್ ಕೃಷ್ಣ ಅಡ್ವಾಣಿ ಅವರಿಗೆ ದೇಶದ ಪರಮೋಚ್ಚ ಗೌರವವಾದ ಭಾರತ ರತ್ನ ನೀಡಿ ಗೌರವಿಸಲಾಗುವುದು ಎಂದು ಪ್ರಧಾನಿ ನರೇಂದ್ರ ಮೋದಿ ಇಂದು(ಫೆ.03) ಘೋಷಣೆ ಮಾಡಿದ್ದಾರೆ. ಎಲ್​​ಕೆ ಅಡ್ವಾಣಿ ಜೀ ಅವರಿಗೆ ಭಾರತ ರತ್ನ ನೀಡುವ ಬಗ್ಗೆ ಮಾಹಿತಿ ಹಂಚಿಕೊಳ್ಳಲು ನನಗೆ ತುಂಬಾ ಸಂತೋಷವಾಗಿದೆ. ನಾನು ಕೂಡ ಅವರೊಂದಿಗೆ ಮಾತನಾಡಿ ಈ ಗೌರವಕ್ಕೆ ಪಾತ್ರರಾಗಿದ್ದಕ್ಕೆ ಅಭಿನಂದಿಸಿದ್ದೇನೆ. ನಮ್ಮ ಕಾಲದ ಅತ್ಯಂತ ಗೌರವಾನ್ವಿತ ರಾಜಕಾರಣಿಗಳಲ್ಲಿ ಅವರು ಒಬ್ಬರು. ಭಾರತದ ಅಭಿವೃದ್ಧಿಗೆ ಅವರ ಕೊಡುಗೆ ಸ್ಮರಣಾರ್ಹ. ತಳಮಟ್ಟದಲ್ಲಿ ಕೆಲಸ ಮಾಡುವುದರಿಂದ ಹಿಡಿದು ನಮ್ಮ ಉಪಪ್ರಧಾನಿಯಾಗಿ ದೇಶಸೇವೆ ಮಾಡುವವರೆಗಿನ ಜೀವನ ಅವರದು ಎಂದು ಪ್ರಧಾನಿ ಮೋದಿ ಬಣ್ಣಿಸಿದ್ದಾರೆ.