ಒಡಿಶಾ: ದೇಶದ ಅತಿದೊಡ್ಡ ಆದಾಯ ತೆರಿಗೆ ದಾಳಿ ಎಂದು ಪರಗಣಿಸಲ್ಪಟ್ಟ ಒಡಿಶಾ ಮೂಲದ ಡಿಸ್ಟಿಲರಿ ಕಂಪನಿಯ ಮೇಲೆ ಆದಾಯ ತೆರಿಗೆ ಇಲಾಖೆ ನಡೆಸಿದ ದಾಳಿಯಲ್ಲಿ ಈವರೆಗೂ ಪತ್ತೆಯಾದ ನಗದು ಮೊತ್ತ 300 ಕೋಟಿ ರೂಪಾಯಿ ದಾಟಿದೆ. ಇದು ದೇಶದ ಇತಿಹಾದಲ್ಲಿ ಯಾವುದೇ ತನಿಖಾ ಸಂಸ್ಥೆ ನಡೆಸಿದ ದಾಳಿಯಲ್ಲಿ ಸಿಕ್ಕ ಅತ್ಯಧಿಕ ಹಣವಾಗಿದೆ ಎಂದು ಅಧಿಕೃತ ಮೂಲಗಳು ಭಾನುವಾರ ತಿಳಿಸಿವೆ.
ಬೌದ್ ಡಿಸ್ಟಿಲರಿ ಪ್ರೈವೇಟ್ ಲಿಮಿಟೆಡ್, ಅದರ ಮಾಲೀಕರು ಮತ್ತು ಇತರರ ವಿರುದ್ಧ ಸತತವಾಗಿ ದಾಳಿಗಳು ನಡೆಯುತ್ತಿವೆ. ತೆರಿಗೆ ವಂಚನೆ ಮತ್ತು ‘ಆಫ್-ದಿ-ಬುಕ್’ ವಹಿವಾಟಿನ ಆರೋಪದ ಮೇಲೆ ತೆರಿಗೆದಾರರು ಡಿಸೆಂಬರ್ 6 ರಂದು ದಾಳಿಗಳನ್ನು ಪ್ರಾರಂಭಿಸಿದ್ದು, ಭಾನುವಾರ ಐದನೇ ದಿನ ಕೂಡ ದಾಳಿ ಮುಂದುವರೆದಿದೆ. ಇಲ್ಲಿಯವರೆಗೆ 300 ಕೋಟಿ ರೂ.ಗೂ ಅಧಿಕ ಮೊತ್ತದ ನಗದನ್ನು ಎಣಿಕೆ ಮಾಡಲಾಗಿದ್ದು, ಇನ್ನೂ ಎಣಿಕೆ ನಡೆಯುತ್ತಿದೆ ಎಂದು ತಿಳಿದುಬಂದಿದೆ.
ಇಡೀ ಕರೆನ್ಸಿ ಸಂಗ್ರಹವು ವ್ಯಾಪಾರ ಗುಂಪು, ವಿತರಕರು ಮತ್ತು ಇತರರು ದೇಶದ ಮದ್ಯದ ನಗದು ಮಾರಾಟದಿಂದ ಗಳಿಸಿದ ‘ಲೆಕ್ಕರಹಿತ’ ಹಣ ಎಂದು ಇಲಾಖೆ ಹೇಳಿದೆ. ಇದು ಒಂದೇ ಗುಂಪು ಮತ್ತು ಅದಕ್ಕೆ ಸಂಬಂಧಿಸಿದ ಘಟಕಗಳ ವಿರುದ್ಧದ ಕ್ರಮದ ಭಾಗವಾಗಿ ದೇಶದಲ್ಲಿ ಏಜೆನ್ಸಿಯೊಂದು ನಡೆಸಿದ ಅತಿ ಹೆಚ್ಚು ನಗದು ವಶವಾಗಿದೆ ಎಂದು ಮೂಲಗಳು ತಿಳಿಸಿವೆ.