ಭೋಪಾಲ್: ಆಹಾರ ವಿತರಣಾ ಕಂಪನಿ ಝೊಮಾಟೊದ 10 ನಿಮಿಷಗಳಲ್ಲಿ ಮನೆ ಬಾಗಿಲಿಗೆ ಆಹಾರವನ್ನು ತಲುಪಿಸುವ ಭರವಸೆ ನೀಡಿದೆ.
ಆದರೆ ಇದು ರಸ್ತೆಗಳಲ್ಲಿ ವಿತರಣಾ ವ್ಯಕ್ತಿಗಳು ಮತ್ತು ಜನರ ಜೀವಕ್ಕೆ ಅಪಾಯವನ್ನುಂಟುಮಾಡುವಂತಿದೆ ಎಂದಿರುವ ಮಧ್ಯಪ್ರದೇಶದ ಗೃಹ ಸಚಿವ ನರೋತ್ತಮ್ ಮಿಶ್ರಾ ಅವರು, ಈ ತ್ವರಿತ ವಿತರಣಾ ಯೋಜನೆಯನ್ನು ಬದಲಾಯಿಸುವಂತೆ ಕಂಪನಿಗೆ ಸೂಚಿಸಿದರು.
ಶುಕ್ರವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಮಿಶ್ರಾ, ಟ್ರಾಫಿಕ್ ನಿಯಮಗಳನ್ನು ಉಲ್ಲಂಘಿಸಲು ಜೊಮಾಟೊಗೆ ಅವಕಾಶ ನೀಡುವುದಿಲ್ಲ ಮತ್ತು ತ್ವರಿತ ವಿತರಣೆ ಪ್ರಕ್ರಿಯೆಯಲ್ಲಿ ಸಂಭವಿಸುವ ಸಂಚಾರ ನಿಯಮಗಳ ಉಲ್ಲಂಘನೆ ಮತ್ತು ಅಪಘಾತಗಳಿಗೆ ಕಂಪನಿಯೇ ಹೊಣೆಯಾಗಲಿದೆ ಎಂದು ಎಚ್ಚರಿಕೆ ನೀಡಿದ್ದಾರೆ.
“10 ನಿಮಿಷಗಳಲ್ಲಿ ಆಹಾರವನ್ನು ತಲುಪಿಸುವ ಝೊಮಾಟೊ ಯೋಜನೆಯು ತನ್ನ ಉದ್ಯೋಗಿಗಳ(ವಿತರಣಾ ಪಾಲುದಾರರು) ಮತ್ತು ಇತರ ಜನರ ಜೀವನದ ಜೊತೆ ಆಟವಾಡುವಂತಿದೆ. ಝೊಮಾಟೊ ಬಿಡಿ, ಮಧ್ಯಪ್ರದೇಶದಲ್ಲಿ ಸಂಚಾರ ನಿಯಮಗಳನ್ನು ಉಲ್ಲಂಘಿಸಲು ಯಾರಿಗೂ ಅವಕಾಶ ನೀಡುವುದಿಲ್ಲ. ನಾನು ಈ ಯೋಜನೆಗಳನ್ನು ಬದಲಾಯಿಸಲು ಝೊಮಾಟೊಗೆ ಸಲಹೆ ನೀಡುತ್ತಿದ್ದೇನೆ” ಎಂದು ಮಿಶ್ರಾ ಹೇಳಿದ್ದಾರೆ.
ಆಹಾರ ವಿತರಣಾ ವ್ಯಕ್ತಿಗಳು 10 ನಿಮಿಷಗಳಲ್ಲಿ ಡೆಲಿವರಿ ಮಾಡುವುದಕ್ಕಾಗಿ “ಅತುರದಿಂದ ಮತ್ತು ಅಪಾಯಕಾರಿಯಾಗಿ ಚಾಲನೆ ಮಾಡುವ ಮೂಲಕ” ತಲುಪಬಹುದು ಎಂದು ಅವರು ಹೇಳಿದ್ದಾರೆ.
