ತಿರುವನಂತಪುರ: ಉತ್ತರ ಕೇರಳದ ಕರಾವಳಿ ಅರಣ್ಯದಿಂದ ವಿಜ್ಞಾನಿಗಳು ನೆಲದಲ್ಲಿ ವಾಸಿಸುವ ಹಿಂಬದಿಯ ಕಾಲು ಮುದುರಿಕೊಂಡಿರುವ ಹೊಸ ಜಾತಿಯ ಹಲ್ಲಿಯ ಪ್ರಬೇಧವನ್ನು ಸಂಶೋಧಕರು ಪತ್ತೆ ಮಾಡಿದ್ದಾರೆ. ಕೋಝಿಕ್ಕೋಡ್ ಜಿಲ್ಲೆಯ ಮಧ್ಯಭಾಗದ ಚೆಂಗೋಡುಮಲ ಗುಡ್ಡದಲ್ಲಿ ಈ ಹಲ್ಲಿ ಪತ್ತೆಯಾಗಿದೆ.
ವೈಜ್ಞಾನಿಕವಾಗಿ ಸಿರ್ಟೊಡಾಕ್ಟಿಲಸ್ (ಗೆಕೊಯೆಲ್ಲಾ) ಚೆಂಗೋಡುಮಾಲೆನ್ಸಿಸ್ ಒಂದು ಸಣ್ಣ ಹಲ್ಲಿಯಾಗಿದ್ದು, ರಾತ್ರಿ ವೇಳೆ ಚುಟವಟಿಕೆಯಿಂದ ಕೂಡಿರುತ್ತದೆ. ಇದು ಎಲೆಗಳ ಕಸ ಮತ್ತು ಕಾಡುಗಳಲ್ಲಿನ ಬಂಡೆಗಳ ನಡುವೆ ನೆಲದ ಮೇಲೆ ಕಂಡುಬರುತ್ತದೆ. ಕೆಲಭಾಗಗಳಲ್ಲಿ ತೋಟಗಳಲ್ಲಿಯೂ ಈ ಹಲ್ಲಿ ಪತ್ತೆಯಾಗಿದೆ.
ಚೆಂಗೋಡುಮಲ ಮತ್ತು ಉತ್ತರ ಕೇರಳದ ಕರಾವಳಿ ಅರಣ್ಯ, ಕೋಝಿಕ್ಕೋಡ್, ಮಲಪ್ಪುರಂ, ಪಾಲಕ್ಕಾಡ್ ಮತ್ತು ತ್ರಿಶೂರ್ ಜಿಲ್ಲೆಗಳ ಅರಣ್ಯಗಳಲ್ಲಿ ಈ ಹಲ್ಲಿ ಪ್ರಬೇಧ ಪತ್ತೆಯಾಗಿದೆ.
ಅಕ್ರಮ ಗಣಿಗಾರಿಕೆ ಮತ್ತು ವಿವೇಚನಾರಹಿತ ಮಾನವ ಅತಿಕ್ರಮಣದಿಂದ ಈ ಹಲ್ಲಿ ಸೇರಿದಂತೆ ವಿವಿಧ ಪ್ರಾಣಿ, ಪಕ್ಷಿ, ಸರಿಸೃಪಗಳು ಅಪಾಯದಲ್ಲಿವೆ. ಹೊಸ ಜಾತಿಯ ಹಲ್ಲಿಯ ಕುರಿತು ಅಮೆರಿಕದ ಸೊಸೈಟಿ ಫಾರ್ ದಿ ಸ್ಟಡಿ ಆಫ್ ಆಂಫಿಬಿಯನ್ಸ್ ಮತ್ತು ರೆಪ್ಟೈಲ್ಸ್‌ ಜರ್ನಲ್ ಆಫ್ ಹರ್ಪಿಟಾಲಜಿಯಲ್ಲಿ ಲೇಖನ ಪ್ರಕಟವಾಗಿದೆ.
ಹಲ್ಲಿಯ ಕುರಿತು ಮುಂಬೈನ ಠಾಕ್ರೆ ವೈಲ್ಡ್‌ಲೈಫ್ ಫೌಂಡೇಶನ್‌ನ ಇಶಾನ್ ಅಗರ್ವಾಲ್ ಮತ್ತು ಅಕ್ಷಯ್ ಖಂಡೇಕರ್ ಅವರ ನೇತೃತ್ವ ತಂಡ ಸಂಶೋಧನೆ ನಡೆಸಿದೆ. ಕೇರಳ ಅರಣ್ಯ ಸಂಶೋಧನಾ ಸಂಸ್ಥೆಯ ಉಮೇಶ್‌ ಪಾವುಕುಂಡಿ, ಸೇಂಟ್‌ ಜೋಸೆಫ್‌ ಕಾಲೇಜಿನ ಸಂದೀಪ್ ದಾಸ್, ಯುಎಸ್‌ನ ವಿಲ್ಲನೋವಾ ವಿಶ್ವವಿದ್ಯಾಲಯದಿಂದ ಆರನ್ ಎಂ. ಬಾಯರ್ ಅವರನ್ನು ಒಳಗೊಂಡಿತ್ತು.
