ನವದೆಹಲಿ: ಲಿಬಿಯಾದ ಜ್ವಾರಾ ನಗರದಲ್ಲಿ ಸಶಸ್ತ್ರ ಗುಂಪಿನ ವಶದಲ್ಲಿದ್ದ ಪಂಜಾಬ್ ಮತ್ತು ಹರಿಯಾಣದ 17 ಭಾರತೀಯರನ್ನು ಭಾನುವಾರ ಯಶಸ್ವಿಯಾಗಿ ಸ್ವದೇಶಕ್ಕೆ ಕರೆತರಲಾಗಿದೆ ಎಂದು ಮೂಲಗಳು ತಿಳಿಸಿವೆ.
ಭಾರತದ ಮಾನವ ಕಳ್ಳಸಾಗಣೆ ದಂಧೆ ತಂಡದವರ ಮೂಲಕ ಲಿಬಿಯಾಕ್ಕೆ ತೆರಳಿದ್ದ 17 ಮಂದಿ ಜ್ವಾರಾ ನಗರದಲ್ಲಿ ಸಶಸ್ತ್ರ ಗುಂಪಿನ ವಶದಲ್ಲಿದ್ದರು. ಈ ವಿಚಾರ ಟುನಿಸ್ ನಲ್ಲಿರುವ ರಾಯಭಾರ ಕಚೇರಿ ಗಮನಕ್ಕೆ ಬಂದಿತ್ತು. ನಂತರ ಅವರನ್ನು ರಕ್ಷಣೆ ಮಾಡಲಾಗಿದ್ದು, ಇದೀಗ ಅವರು ಭಾರತಕ್ಕೆ ವಾಪಸ್ ಬಂದಿದ್ದಾರೆ.
ಭಾರತೀಯರಿಗೆ ಇಟಲಿಯಲ್ಲಿ ಲಾಭದಾಯಕ ಉದ್ಯೋಗ ಆಮಿಷ ಒಡ್ಡಿದ್ದ ಟ್ರಾವೆಲ್ ಏಜೆಂಟ್ ಗಳು ಲಿಬಿಯಾಕ್ಕೆ ಕರೆದೊಯ್ದಿದ್ದು, ಅಲ್ಲಿ ಅವರು ಮಾಫಿಯಾ ಗುಂಪಿಗೆ ಸಿಲುಕಿಕೊಂಡಿದ್ದರು.