ತಿರುವನಂತಪುರ: ‘ನಿಫಾ ವೈರಸ್ ಸೋಂಕಿನಿಂದ ಕಳೆದ ವಾರ ಮೃತಪಟ್ಟ ಬಾಲಕನ ಸಂಪರ್ಕಕ್ಕೆ ಬಂದ ನಾಲ್ವರ ಮಾದರಿಗಳು ನೆಗೆಟಿವ್ ಎಂದು ದೃಢಪಟ್ಟಿವೆ. ಆದರೆ, ಮೂಲ ಇನ್ನೂ ಪತ್ತೆಯಾಗಿಲ್ಲ’ ಎಂದು ಕೇರಳದ ಆರೋಗ್ಯ ಸಚಿವೆ ವೀಣಾ ಜಾರ್ಜ್ ಭಾನುವಾರ ತಿಳಿಸಿದ್ದಾರೆ.
ನಾಲ್ಕು ಮಾದರಿಗಳನ್ನು ಮತ್ತೊಮ್ಮೆ ಪರೀಕ್ಷಿಸಲಾಯಿತು. ಎಲ್ಲರದ್ದೂ ನೆಗೆಟಿವ್ ಫಲಿತಾಂಶ ದೊರೆತಿದೆ. ಸಮೀಕ್ಷೆ ಕಾರ್ಯ ಮತ್ತು ಮಾದರಿಗಳ ಪರೀಕ್ಷೆಯೂ ಮುಂದುವರಿದಿವೆ. ಪುಣೆಯ ರಾಷ್ಟ್ರೀಯ ವೈರಾಣು ಸಂಸ್ಥೆಯ ತಂಡ ವಿವಿಧ ಪ್ರದೇಶಗಳಿಂದ ಮಾದರಿಗಳನ್ನು ಸಂಗ್ರಹಿಸುತ್ತಿದೆ.
ಅತ್ಯಂತ ಅಪಾಯದ ಸಂಪರ್ಕದ ಲ್ಲಿದ್ದವರು ಎಂದು ಗುರುತಿಸಲಾದವರನ್ನು ಕೋಯಿಕ್ಕೊಡ್ ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆಯಲ್ಲಿ ಪ್ರತ್ಯೇಕವಾಗಿರಿಸಲಾಗಿದ್ದು, ಅವರ ಆರೋಗ್ಯ ಸ್ಥಿರವಾಗಿದೆ ಎಂದು ಅವರು ತಿಳಿಸಿದ್ದಾರೆ.