ಉಡುಪಿ: ಕಳೆದ ಹದಿನಾಲ್ಕು ವರ್ಷಗಳಿಂದ ಕೃಷ್ಣಾಷ್ಟಮಿ ಸಂದರ್ಭದಲ್ಲಿ ವಿಭಿನ್ನ ಮತ್ತು ವಿಶಿಷ್ಟ ವೇಷಗಳನ್ನು ಧರಿಸಿ ಸಾರ್ವಜನಿಕರಿಂದ ನೆರವು ಸಂಗ್ರಹಿಸಿ ಅನಾರೋಗ್ಯ ಪೀಡಿತ ಮಕ್ಕಳ ಚಿಕಿತ್ಸೆಗೆ ನೆರವಾಗುತ್ತಿರುವ ರವಿ ಕಟಪಾಡಿ ಅವರು ಈ ಬಾರಿ ಕಾಲ್ಪನಿಕ ಸಮುದ್ರ ಜೀವಿಯ ರೂಪವಾದ ‘ಮರ್ಮೇನ್’ (Merman) ವೇಷದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ಅಷ್ಟಮಿ ಸಂಭ್ರಮದ ನಡುವೆ ಪ್ರತಿವರ್ಷ ವಿನೂತನ ವೇಷದ ಮೂಲಕ ಜನರ ಗಮನ ಸೆಳೆಯುವ ರವಿ ಕಟಪಾಡಿ ಅವರ ಸಾಮಾಜಿಕ ಸೇವೆಗೆ ಈ ಬಾರಿಯೂ ವಿಶೇಷ ಉದ್ದೇಶವಿದೆ. ಪುರಾಣ ಕಥೆಗಳಲ್ಲಿ ಕಂಡುಬರುವ ಅರ್ಧ ಮಾನವ ಹಾಗೂ ಅರ್ಧ ಮೀನಿನ ರೂಪದ ಮರ್ಮೇನ್ ವೇಷ ಧರಿಸಿ ಸಾರ್ವಜನಿಕರ ಮುಂದೆ ಬರಲಿರುವ ಅವರು, ಈ ಮೂಲಕ ಸಂಗ್ರಹವಾಗುವ ಹಣವನ್ನು ಅನಾರೋಗ್ಯ ಪೀಡಿತ ಮಕ್ಕಳ ಚಿಕಿತ್ಸೆಗೆ ನೀಡಲಿದ್ದಾರೆ.
ಈ ಬಾರಿ ಸಂಗ್ರಹವಾಗುವ ನೆರವನ್ನು ಹೃದಯ ಸಂಬಂಧಿ ಕಾಯಿಲೆಯಿಂದ ಬಳಲುತ್ತಿರುವ ಮಗುವಿನ ಚಿಕಿತ್ಸೆ ಹಾಗೂ ಕ್ಯಾನ್ಸರ್ನಿಂದ ಬಳಲುತ್ತಿರುವ ಮಕ್ಕಳ ಚಿಕಿತ್ಸೆಗೆ ವಿನಿಯೋಗಿಸಲು ನಿರ್ಧರಿಸಲಾಗಿದೆ ಎಂದು ರವಿ ಕಟಪಾಡಿ ತಿಳಿಸಿದ್ದಾರೆ.
ವೇಷಭೂಷಣದ ಮೂಲಕ ಕೇವಲ ಮನರಂಜನೆ ನೀಡುವುದಷ್ಟೇ ಅಲ್ಲದೆ, ಸಂಕಷ್ಟದಲ್ಲಿರುವ ಮಕ್ಕಳ ಬದುಕಿಗೆ ಆಶಾಕಿರಣವಾಗುವ ಕಾರ್ಯವನ್ನು ರವಿ ಕಟಪಾಡಿ ಕಳೆದ 14 ವರ್ಷಗಳಿಂದ ನಿರಂತರವಾಗಿ ನಡೆಸಿಕೊಂಡು ಬರುತ್ತಿದ್ದಾರೆ. ಅವರ ಪ್ರತಿಯೊಂದು ವೇಷವೂ ಸಾಮಾಜಿಕ ಕಾಳಜಿಯ ಸಂದೇಶದೊಂದಿಗೆ ಜನರ ಮನಸ್ಸಿನಲ್ಲಿ ಸ್ಥಾನ ಪಡೆದಿದೆ.
ಆದರೆ, ಈ ಬಾರಿಯ ಮರ್ಮೇನ್ ವೇಷವೇ ಕೃಷ್ಣಾಷ್ಟಮಿ ಸಂದರ್ಭದಲ್ಲಿ ತಾವು ಧರಿಸುವ ಕೊನೆಯ ವೇಷವಾಗಲಿದೆ ಎಂದು ರವಿ ಕಟಪಾಡಿ ತಿಳಿಸಿದ್ದಾರೆ. ಮುಂದಿನ ವರ್ಷಗಳಿಂದ ಕೃಷ್ಣಾಷ್ಟಮಿ ಪ್ರಯುಕ್ತ ವೇಷ ಧರಿಸಿ ಬೀದಿಗಿಳಿಯುವ ಕಾರ್ಯಕ್ರಮವನ್ನು ನಿಲ್ಲಿಸುವುದಾಗಿಯೂ ಅವರು ಹೇಳಿದ್ದಾರೆ.
ಹೀಗಾಗಿ, ಸೇವೆಯ ಸಂಕಲ್ಪದೊಂದಿಗೆ ಮರ್ಮೇನ್ ರೂಪದಲ್ಲಿ ಈ ಬಾರಿ ಬೀದಿಗಿಳಿಯಲಿರುವ ರವಿ ಕಟಪಾಡಿ ಅವರ ಕೊನೆಯ ಅಷ್ಟಮಿ ವೇಷವನ್ನು ಕಣ್ತುಂಬಿಕೊಳ್ಳಲು ಸಾರ್ವಜನಿಕರು ಕಾತರದಿಂದ ಕಾಯುತ್ತಿದ್ದಾರೆ.