ಭುವನೇಶ್ವರ, ಜ.21: ಒಡಿಶಾ ಪುರುಷರ ಹಾಕಿ ವಿಶ್ವಕಪ್ 2023ರಲ್ಲಿ ನ್ಯೂಜಿಲೆಂಡ್ ವಿರುದ್ಧ ರವಿವಾರ ನಡೆಯಲಿರುವ ನಿರ್ಣಾಯಕ ಕ್ರಾಸ್ಓವರ್ ಪಂದ್ಯಕ್ಕೂ ಮುನ್ನ ಭಾರತದ ಪ್ರಮುಖ ಮಿಡ್ ಫೀಲ್ಡರ್ ಹಾರ್ದಿಕ್ ಸಿಂಗ್ ಸ್ನಾಯುಸೆಳೆತದ ಗಾಯದಿಂದಾಗಿ ಟೂರ್ನಿಯಿಂದ ಹೊರಗುಳಿದಿದ್ದಾರೆ.
ಜನವರಿ 15 ರಂದು ಇಂಗ್ಲೆಂಡ್ ವಿರುದ್ಧದ ಪಂದ್ಯದ ವೇಳೆ ಹಾರ್ದಿಕ್ ಸಿಂಗ್ ಸ್ನಾಯು ಸೆಳೆತಕ್ಕೆ ಒಳಗಾಗಿದ್ದರು. ವೇಲ್ಸ್ ವಿರುದ್ಧದ ಪಂದ್ಯಕ್ಕೆ ಯುವ ಆಟಗಾರನಿಗೆ ವಿಶ್ರಾಂತಿ ನೀಡಿದ ನಂತರ, ಹಾರ್ದಿಕ್ ಈಗ ವಿಶ್ವಕಪ್ ನಿಂದ ಹೊರಗುಳಿದಿದ್ದಾರೆ ಎಂದು ಹಾಕಿ ಇಂಡಿಯಾ ಶನಿವಾರ ದೃಢಪಡಿಸಿದೆ.
ಹಾರ್ದಿಕ್ ಬದಲಿಗೆ ಬದಲಿ ಆಟಗಾರ ರಾಜ್ ಕುಮಾರ್ ಪಾಲ್ ಅವರನ್ನು ಸೇರಿಸಿಕೊಳ್ಳಲಾಗುವುದು ಎಂದು ಹಾಕಿ ಇಂಡಿಯಾ ತಿಳಿಸಿದೆ.
“ನ್ಯೂಜಿಲೆಂಡ್ ವಿರುದ್ಧದ ಭಾನುವಾರದ ಪಂದ್ಯ ಮತ್ತು ನಂತರದ ವಿಶ್ವಕಪ್ ಪಂದ್ಯಗಳಿಗೆ ಹಾರ್ದಿಕ್ ಸಿಂಗ್ ಅವರನ್ನು ಭಾರತ ತಂಡದಲ್ಲಿ ಬದಲಾಯಿಸುವ ಕಠಿಣ ನಿರ್ಧಾರವನ್ನು ನಾವು ರಾತ್ರೋರಾತ್ರಿ ತೆಗೆದುಕೊಳ್ಳಬೇಕಾಯಿತು” ಎಂದು ಮುಖ್ಯ ಕೋಚ್ ಗ್ರಹಾಂ ರೀಡ್ ತಂಡದ ಮ್ಯಾನೇಜ್ಮೆಂಟ್ ತೆಗೆದುಕೊಂಡ ನಿರ್ಧಾರದ ಬಗ್ಗೆ ಮಾತನಾಡುತ್ತಾ ಹೇಳಿದರು.
“ಆರಂಭಿಕ ಘಟನೆಯು ಸೂಚಿಸಿದಷ್ಟು ಗಾಯವು ತೀವ್ರವಾಗಿಲ್ಲದಿದ್ದರೂ, ಸಮಯವು ನಮ್ಮ ಪರವಾಗಿಲ್ಲ ಮತ್ತು ನಮ್ಮ ಸಂಪೂರ್ಣ ಪುನರ್ವಸತಿ ಪ್ರಕ್ರಿಯೆ ಮತ್ತು ಕ್ರಿಯಾತ್ಮಕ ಮತ್ತು ಆನ್-ಫೀಲ್ಡ್ ಮೌಲ್ಯಮಾಪನದ ನಂತರ, ನಾವು ಹಾರ್ದಿಕ್ ಬದಲಿಗೆ ರಾಜ್ ಕುಮಾರ್ ಪಾಲ್ ಅವರನ್ನು ನೇಮಿಸಲು ನಿರ್ಧರಿಸಿದ್ದೇವೆ. ವೈಯಕ್ತಿಕವಾಗಿ ಹಾರ್ದಿಕ್ ಗೆ ಇದು ಅತ್ಯಂತ ನಿರಾಶಾದಾಯಕವಾಗಿದ್ದರೂ, ನಮ್ಮ ಮೊದಲ ಎರಡು ಪಂದ್ಯಗಳಲ್ಲಿ ಅವರು ಎಷ್ಟು ಉತ್ತಮವಾಗಿ ಆಡಿದರು ಎಂಬುದನ್ನು ಗಮನಿಸಿದರೆ, ಉಳಿದ ವಿಶ್ವಕಪ್ ಪಂದ್ಯಗಳಿಗೆ ರಾಜ್ ಕುಮಾರ್ ತಂಡವನ್ನು ಸೇರುವ ಸಾಧ್ಯತೆಗಳ ಬಗ್ಗೆ ನಾವು ಉತ್ಸುಕರಾಗಿದ್ದೇವೆ” ಎಂದು ರೀಡ್ ಶನಿವಾರ ಹಾಕಿ ಇಂಡಿಯಾ ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
‘ಡಿ’ ಗುಂಪಿನಲ್ಲಿ ಎರಡನೇ ಸ್ಥಾನ ಪಡೆದಿರುವ ಭಾರತ ಕ್ವಾರ್ಟರ್ ಫೈನಲ್ ತಲುಪಲು ಭಾನುವಾರ ನಡೆಯಲಿರುವ ಕ್ರಾಸ್ಒವರ್ ಪಂದ್ಯದಲ್ಲಿ ನ್ಯೂಜಿಲೆಂಡ್ ವಿರುದ್ಧ ಜಯ ಗಳಿಸಬೇಕಾಗಿದೆ.
