ಟಂಪೆರೆ: ಭಾರತದ ಹಿಮಾದಾಸ್ ಅವರು ಫಿನ್ ಲ್ಯಾಂಡ್ ನಲ್ಲಿ ನಡೆಯುತ್ತಿರುವ ಐಎಎಎಫ್ ಅಂಡರ್ 20 ಅಥ್ಲೆಟಿಕ್ ಚಾಂಪಿಯನ್ ಶಿಪ್ ನ 400 ಮೀಟರ್ ಓಟದಲ್ಲಿ ಸ್ವರ್ಣ ಗೆದ್ದುಕೊಂಡು ಐತಿಹಾಸಿಕ ಸಾಧನೆ ಮಾಡಿದ್ದಾರೆ.
18ರ ಹರೆಯದ ಹಿಮಾ 51.46 ಸೆಕೆಂಡ್ಸ್ ನಲ್ಲಿ ಗುರಿಮುಟ್ಟಿ ಈ ಸಾಧನೆ ಮಾಡಿದ ಭಾರತದ ಮೊದಲ ಕ್ರೀಡಾಪಟು ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
400 ಮೀಟರ್ ಓಟದಲ್ಲಿ ರೊಮಾನಿಯಾದ ಆಂಡ್ರಿಯಾ ಮಿಕ್ಲಾಸ್ ದ್ವಿತೀಯ ಮತ್ತು ಅಮೆರಿಕಾದ ಟೇವರ್ ಮಾನ್ಸನ್ ತೃತೀಯ ಸ್ಥಾನ ಪಡೆದರು.
ಎಪ್ರಿಲ್ ನಲ್ಲಿ ನಡೆದ ಕಾಮನ್ವೆಲ್ತ್ ಗೇಮ್ಸ್ ನ 400 ಮೀಟರ್ ಓಟದಲ್ಲಿ ಹಿಮಾ 6ನೇ ಸ್ಥಾನ ಪಡೆದಿದ್ದರು. ಹಿಮಾ ಅಸ್ಸಾಂನ ನಾಗೋನ್ ಜಿಲ್ಲೆಯ ದಿಂಗ್ ಗ್ರಾಮದ ರೈತರೊಬ್ಬರ ಮಗಳು.
ಹಿಮಾ ಸಾಧನೆಗೆ ರಾಷ್ಟ್ರಪತಿ ರಾಮನಾಥ ಕೋವಿಂದ್ ಮತ್ತು ಪ್ರಧಾನಿ ನರೇಂದ್ರ ಮೋದಿ ಅವರು ಅಭಿನಂದನೆ ಸಲ್ಲಿಸಿದ್ದಾರೆ.
