ಮುಂಬೈ ಇಂಡಿಯನ್ಸ್ ತಂಡದ ಬೌಲಿಂಗ್ ದಾಳಿಗೆ ಮಂಕಾದ ಪಂಜಾಬ್ ಕಿಂಗ್ಸ್ ತಂಡ ಕೇವಲ136ರನ್ಗಳ ಸಾಧಾರಣ ಗುರಿ ನೀಡಿದೆ. ಎರಡೂ ತಂಡಗಳಿಗೂ ನಿರ್ಣಾಯಕವಾಗಿದ್ದ ಈ ಪಂದ್ಯದಲ್ಲಿ ಮುಂಬೈ ನಾಯಕ ರೋಹಿತ್ ಶರ್ಮಾ ಟಾಸ್ ಗೆದ್ದು ಬೌಲಿಂಗ್ ಆಯ್ಕೆ ಮಾಡಿಕೊಂಡರು.
ಮಯಾಂಕ್ ಅನುಪಸ್ಥಿತಿಯಲ್ಲಿ ರಾಹುಲ್ ಜೊತೆಗೆ ಆರಂಭಿಕನಾಗಿ ಕಣಕ್ಕಿಳಿದಿದ್ದ ಮಂದೀಪ್ ಸಿಂಗ್ ಕೇವಲ 15 ರನ್ಗಳಿಸಿ ಕೃನಾಲ್ ಪಾಂಡ್ಯಗೆ ವಿಕೆಟ್ ಒಪ್ಪಿಸಿದರು. 6ನೇ ಓವರ್ನಲ್ಲೇ ಕೀರನ್ ಪೊಲಾರ್ಡ್ ಕ್ರಿಸ್ ಗೇಲ್(1) ಮತ್ತು ಎದುರಾಳಿ ನಾಯಕ ರಾಹುಲ್(21) ರನ್ನು ಒಂದೇ ಓವರ್ನಲ್ಲಿ ಪೆವಿಲಿಯನ್ಗಟ್ಟಿದರು.
ಆರಂಭಿಕ 3 ಬ್ಯಾಟರ್ಗಳು ಪೆವಿಲಿಯನ್ ಸೇರಿದ ಮೇಲೆ ವಿಂಡೀಸ್ ಸ್ಟಾರ್ ಪೂರನ್ ಕೂಡ ಬುಮ್ರಾ ಬೌಲಿಂಗ್ನಲ್ಲಿ ಎಲ್ಬಿ ಬಲೆಗೆ ಬಿದ್ದರು. ಕೇವಲ 48 ರನ್ಗಳಾಗುವಷ್ಟರಲ್ಲಿ ಪಂಜಾಬ್ 4 ವಿಕೆಟ್ ಕಳೆದುಕೊಂಡು ಆಘಾತಕ್ಕೊಳಗಾಯಿತು. ಆದರೆ ಐಡೆನ್ ಮಾರ್ಕ್ರಮ್ 29 ಎಸೆತಗಳಲ್ಲಿ 42 ರನ್ ಹಾಗೂ ದೀಪಕ್ ಹೂಡ 26 ಎಸೆತಗಳಲ್ಲಿ 28 ರನ್ಗಳಿಸಿ ತಂಡದ ಮೊತ್ತವನ್ನು 100ರ ಗಡಿ ದಾಟಿಸಿದರು. ಹರ್ಪ್ರೀತ್ ಬ್ರಾರ್ 14 ರನ್ಗಳಿಸಿ ಅಜೇಯರಾಗುಳಿದರು.
ಮುಂಬೈ ಪರ ಬುಮ್ರಾ 24ಕ್ಕೆ 2, ಕೀರನ್ ಪೊಲಾರ್ಡ್ 8ಕ್ಕೆ2, ಕೃನಾಲ್ ಮತ್ತು ರಾಹುಲ್ ಚಹರ್ ತಲಾ ಒಂದು ವಿಕೆಟ್ ಪಡೆದು ಮಿಂಚಿದರು.