ಭಾರತೀಯ ಕ್ರಿಕೆಟ್ ತಂಡದ ಮುಖ್ಯ ಕೋಚ್, ಫೀಲ್ಡಿಂಗ್ ಕೋಚ್, ಬೌಲಿಂಗ್ ಕೋಚ್ ಮತ್ತು ಬ್ಯಾಟಿಂಗ್ ಕೋಚ್ ಹುದ್ದೆಗೆ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (BCCI) ಅರ್ಜಿಗಳನ್ನ ಆಹ್ವಾನಿಸಿದೆ. ಟಿ20 ವಿಶ್ವಕಪ್ ಬಳಿಕ ಟೀಂ ಇಂಡಿಯಾದ ಈಗಿನ ಕೋಚಿಂಗ್ ಸಿಬ್ಬಂದಿಯ ಎರಡು ವರ್ಷಗಳ ಒಪ್ಪಂದ ಅಂತ್ಯವಾಗಿದೆ.
ಬಿಸಿಸಿಐ ಹೊರಡಿಸಿದ ಸುತ್ತೋಲೆಯ ಪ್ರಕಾರ, ಮುಖ್ಯ ತರಬೇತುದಾರನ ಹುದ್ದೆಗೆ ಅರ್ಜಿ ಸಲ್ಲಿಸುವ ಅಭ್ಯರ್ಥಿಯು ‘ಕನಿಷ್ಠ 30 ಟೆಸ್ಟ್ ಪಂದ್ಯಗಳು ಅಥವಾ 50 ಏಕದಿನ ಪಂದ್ಯಗಳನ್ನು ಆಡಿರಬೇಕು; ಅಥವಾ, ಕನಿಷ್ಠ 2 ವರ್ಷಗಳ ಅವಧಿಗೆ ಪೂರ್ಣ ಸದಸ್ಯ ಟೆಸ್ಟ್ ಪ್ಲೇಯಿಂಗ್ ನೇಷನ್ʼನ ಮುಖ್ಯ ತರಬೇತುದಾರ; ಅಥವಾ ಅಸೋಸಿಯೇಟ್ ಸದಸ್ಯ /ಐಪಿಎಲ್ ತಂಡ ಅಥವಾ ತತ್ಸಮಾನ ಅಂತಾರಾಷ್ಟ್ರೀಯ ಲೀಗ್ʼಗಳು/ ಪ್ರಥಮ ದರ್ಜೆ ತಂಡಗಳು/ ರಾಷ್ಟ್ರೀಯ ಎ ತಂಡಗಳ ಮುಖ್ಯ ತರಬೇತುದಾರ, ಕನಿಷ್ಠ 3 ವರ್ಷಗಳ ಅವಧಿಗೆ; ಅಥವಾ ಬಿಸಿಸಿಐ ಲೆವೆಲ್ 3 ಸರ್ಟಿಫಿಕೇಶನ್ ಅಥವಾ ತತ್ಸಮಾನ ಹೊಂದಿರಬೇಕು. ನೇಮಕದ ಸಮಯದಲ್ಲಿ ಅಭ್ಯರ್ಥಿಯು 60 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರಾಗಿರಬೇಕು.’
ಬಿಸಿಸಿಐ ನೇಮಿಸಿದ ಹೊಸ ಸಿಬ್ಬಂದಿ ನವೆಂಬರ್ʼನಲ್ಲಿ ನಡೆಯಲಿರುವ ನ್ಯೂಜಿಲ್ಯಾಂಡ್ ವಿರುದ್ಧದ ಟೀಮ್ ಇಂಡಿಯಾದ ತವರು ಸರಣಿಗಾಗಿ ತಮ್ಮ ಅಧಿಕಾರಾವಧಿಯನ್ನು ಪ್ರಾರಂಭಿಸಲಿದ್ದಾರೆ.