ಧರ್ಮಶಾಲಾ: ಸುರಂಗ ಲಕ್ಮಲ್ ದಾಳಿಗೆ ಪೆವಿಲಿಯನ್ ಪರೇಡ್ ನಡೆಸಿದ ಟೀಂ ಇಂಡಿಯಾ ಬ್ಯಾಟ್ಸ್ ಮೆನ್ ಗಳು ಕೇವಲ 112 ರನ್ ಗಳಿಗೆ ಗಂಟುಮೂಟೆ ಕಟ್ಟಿದ್ದು, ಶ್ರೀಲಂಕಾ ಮೊದಲ ಏಕದಿನ ಪಂದ್ಯವನ್ನು ಏಳು ವಿಕೆಟ್ ಗಳಿಂದ ಗೆದ್ದುಕೊಂಡಿದೆ.
ಇಲ್ಲಿ ನಡೆದ ಮೊದಲ ಏಕದಿನದಲ್ಲಿ ಆರಂಭದಲ್ಲೇ ಕುಸಿತಕ್ಕೆ ಒಳಗಾದ ಟೀಂ ಇಂಡಿಯಾ, ಎಂ.ಎಸ್. ಧೋನಿ 65 ರನ್ ನೆರವಿನಿಂದ ನೂರರ ಗಡಿದಾಟಿ ಲಂಕಾಗೆ 113 ರನ್ ಸವಾಲನ್ನಿಟ್ಟಿತ್ತು. ಇದಕ್ಕೆ ಉತ್ತರಿಸಿದ ಲಂಕಾ ಮೂರು ವಿಕೆಟ್ ಕಳಕೊಂಡು 20.4 ಓವರ್ ಗಳಲ್ಲಿ 114 ರನ್ ಮಾಡಿ ಗೆಲುವು ತನ್ನದಾಗಿಸಿಕೊಂಡಿತು. ಉಪುಲ್ ತರಂಗ 49 ಮತ್ತು ನಿರೊಶನ್ ಡಿಕ್ವೆಲ್26, ಆ್ಯಂಜಲೋ ಮ್ಯಾಥ್ಯೂಸ್ 25 ರನ್ ಬಾರಿಸಿದರು.
ಕಪ್ತಾನ ವಿರಾಟ್ ಕೊಹ್ಲಿ ಅನುಪಸ್ಥಿತಿಯಲ್ಲಿ ಆಡಿದ ಟೀಂ ಇಂಡಿಯಾ ಆರಂಭದಲ್ಲೇ ಕುಸಿತಕ್ಕೆ ಒಳಗಾದ ಬಳಿಕ ಚೇತರಿಸಿಕೊಳ್ಳಲೇ ಇಲ್ಲ. ಮಧ್ಯಮ ಸರದಿಯಲ್ಲಿ ಧೋನಿ 65 ರನ್ ಮಾಡಿ ತಂಡಕ್ಕೆ ಆಸರೆಯಾದರು. ಸುರಂಗ ಲಕ್ಮಲ್ 13 ರನ್ ನೀಡಿ ನಾಲ್ಕು ಮತ್ತು ನುವಾನ್ ಪ್ರದೀಪ್ 37 ರನ್ ನೀಡಿ 2 ವಿಕೆಟ್ ಕಬಳಿಸಿದರು.
