ನವದೆಹಲಿ: ಜಪಾನ್ ನ ಕಾಕಮಿಗಾರದಲ್ಲಿ ನಡೆದ ಏಶ್ಯಾ ಕಪ್ ನ ಫೈನಲ್ ಪಂದ್ಯದಲ್ಲಿ ಭಾರತದ ಮಹಿಳಾ ಹಾಕಿ ತಂಡವು ಚೀನಾವನ್ನು ಮಣಿಸಿ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿದೆ.
ಚೀನಾವನ್ನು 5-4ರಿಂದ ಪರಾಭವಗೊಳಿಸಿದ ಭಾರತದ ಮಹಿಳಾ ಹಾಕಿ ತಂಡವು 2018ರಲ್ಲಿ ನಡೆಯಲಿರುವ ವಿಶ್ವಕಪ್ ಗೆ ಪ್ರವೇಶ ಪಡೆದುಕೊಂಡಿದೆ.
ನಿಗದಿತ ಸಮಯದಲ್ಲಿ ಎರಡು ತಂಡಗಳು 1-1ರ ಸಮಬಲದಲ್ಲಿದ್ದ ಕಾರಣ ಪೆನಾಲ್ಟಿ ಶೂಟೌಟ್ ನಲ್ಲಿ ಫಲಿತಾಂಶ ನಿರ್ಧರಿಸಬೇಕಾಗಿ ಬಂತು. ಇದರಲ್ಲಿ ಭಾರತ ಐದು ಗೋಲುಗಳನ್ನು ಸಿಡಿಸಿದರೆ, ಚೀನಾ ಕೇವಲ ನಾಲ್ಕು ಗೋಲು ಬಾರಿಸಿ ಸೋಲೊಪ್ಪಿಕೊಂಡಿತು.
ಭಾರತದ ಪುರುಷರ ಹಾಕಿ ತಂಡವು ಏಶ್ಯಾ ಕಪ್ ಗೆದ್ದಿರುವುದರಿಂದ ಭಾರತಕ್ಕೆ ಸಂಭ್ರಮವು ಎರಡು ಪಟ್ಟಾಗಿದೆ. ಇಷ್ಟು ಮಾತ್ರವಲ್ಲದೆ ಸುಮಾರು 13 ವರ್ಷಗಳ ಬಳಿಕ ಏಶ್ಯಾ ಕಪ್ ನ್ನು ಮಹಿಳಾ ತಂಡವು ಗೆದ್ದಿದೆ.