ಬೆಂಗಳೂರು: ಪಿಎಸ್ಐ ೫೪೫ ಹುದ್ದೆಗಳ ನೇಮಕಾತಿಯ ಮರುಪರೀಕ್ಷೆ ಸುಗಮವಾಗಿ ನಡೆದಿದೆ. ಮುಂದಿನ ಹಂತದಲ್ಲಿ ೪೦೩ ಹುದ್ದೆಗಳಿಗೆ ಪರೀಕ್ಷೆ ನಡೆಸಲಾಗುವುದು. ಈ ಎರಡೂ ನೇಮಕಾತಿ ಪ್ರಕ್ರಿಯೆಗಳು ಪೂರ್ಣಗೊಂಡ ನಂತರ ಮತ್ತೆ ೬೬೦ ಹುದ್ದೆಗಳ ನೇಮಕಾತಿಗೆ ಅಧಿಸೂಚನೆ ಹೊರಡಿಸಲಾಗುವುದು ಎಂದು ಜಿ. ಪರಮೇಶ್ವರ್ ಹೇಳಿದ್ದಾರೆ.
ಬುಧವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ʼಮುಂದಿನ ಎರಡು ವರ್ಷಗಳ ಒಳಗೆ ೬೬೦ ಹುದ್ದೆಗಳ ನೇಮಕಾತಿಗಳೂ ಪೂರ್ಣಗೊಳ್ಳಲಿವೆʼ ಎಂದರು.
ʼ೫೪೫ ಪಿಎಸ್ಐ ಹುದ್ದೆಗಳಿಗೆ ನಡೆದ ಪರೀಕ್ಷೆಗೆ ೫೪ ಸಾವಿರ ಅಭ್ಯರ್ಥಿಗಳು ಹಾಜರಿರಬೇಕಾಗಿತ್ತಾದರೂ ಕೆಲವರು ಗೈರಾಗಿದ್ದರು. ಯಾವುದೇ ಅಕ್ರಮಗಳು ನಡೆಯದೆ ಪೂರ್ಣಗೊಂಡ ಪರೀಕ್ಷೆಯ ಮೌಲ್ಯಮಾಪನವನ್ನು ಆದಷ್ಟು ಬೇಗ ಮುಗಿಸಿ ಆಯ್ಕೆ ಪ್ರಕ್ರಿಯೆ ಪೂರ್ಣಗೊಳಿಸಲಾಗುವುದುʼ ಎಂದು ಗೃಹ ಸಚಿವರು ತಿಳಿಸಿದರು.
ಮುಂದಿನ ಹಂತದಲ್ಲಿ ೪೦೩ ಹುದ್ದೆಗಳಿಗೆ ಈಗಾಗಲೇ ದೈಹಿಕ ಪರೀಕ್ಷೆ ಮುಗಿದಿದ್ದು ಲಿಖಿತ ಪರೀಕ್ಷೆ ಬಾಕಿಯಿದೆ. ಇದನ್ನು ಕೂಡ ಕೆಇಎಗೆ ವಹಿಸುವ ಯೋಚನೆಯಿದೆ. ಎರಡೂ ಪ್ರಕ್ರಿಯೆ ಮುಗಿದರೆ ಒಟ್ಟು ೯೪೮ PSIಗಳು ಲಭ್ಯವಾಗುತ್ತಾರೆ ಎಂದು ಅವರು ಹೇಳಿದರು.