ಕೆ.ಆರ್.ಪೇಟೆ: ಪ್ರತಿ 12 ವರ್ಷಗಳಿಗೊಮ್ಮೆ ಸರ್ಕಾರದ ವತಿಯಿಂದ ಮಹಾಕುಂಭಮೇಳ ನಡೆಸಲು ಅಧಿಕೃತ ಸರ್ಕಾರಿ ಆದೇಶ ಹೊರಡಿಸಲಾಗುವುದು ಎಂದು ಮುಖ್ಯಮಂತ್ರಿ ಬಸವರಾಜ ಎಸ್.ಬೊಮ್ಮಾಯಿ ತಿಳಿಸಿದ್ದಾರೆ.
ಕೆ.ಆರ್.ಪೇಟೆ ತಾಲ್ಲೂಕಿನ ಅಕ್ಕಿಹೆಬ್ಬಾಳು ಹೋಬಳಿಯ ಪುರ-ಸಂಗಾಪುರ-ಅಂಬಿಗರಹಳ್ಳಿ ಗ್ರಾಮಗಳ ಬಳಿಯಿರುವ ಕಾವೇರಿ, ಹೇಮಾವತಿ, ಲಕ್ಷ್ಮಣತೀರ್ಥ ಜೀವ ನದಿಗಳ ಸಂಗಮ ಕ್ಷೇತ್ರದಲ್ಲಿ ನಡೆಯುತ್ತಿದ್ದ ನಾಲ್ಕು ದಿನಗಳ ಮಹಾಕುಂಭಮೇಳದ ಸಮಾರೋಪ ಸಮಾರಂಭದಲ್ಲಿ ಮಾತನಾಡಿದ ಅವರು ಕುಂಭಮೇಳದಲ್ಲಿ ಪುಣ್ಯಸ್ನಾನ ಮಾಡುವುದರಿಂದ ಮನುಷ್ಯನು ತನಗರಿಯದೇ ಮಾಡಿದ ಪಾಪಗಳು ತೊಳೆದು ಪುಣ್ಯ ಪ್ರಾಪ್ತಿಯಾಗುತ್ತದೆ ಎಂಬ ಆಶಯದೊಂದಿಗೆ ಕುಂಭಮೇಳವನ್ನು ಆಯೋಜನೆ ಮಾಡುವ ಪದ್ಧತಿಯನ್ನು ಜಾರಿಗೆ ತರಲಾಗಿದ್ದು, ಇದರಿಂದ ಪಂಚಭೂತಗಳ ಆರಾಧನೆಯಿಂದ ಪುಣ್ಯ ಸಿಗುತ್ತದೆ. ನದಿ ನೀರಿನಲ್ಲಿ ಮುಳುಗಿದರೆ ದೇಹದ ಕೊಳೆ ಹೋಗುತ್ತದೆ. ಜೊತೆಜೊತೆಗೆ ನಮ್ಮ ಮನಸ್ಸಿನ ಕೊಳೆಯನ್ನು ಪುಣ್ಯ ಸ್ನಾನದ ಮೂಲಕ ಹೊರ ಚೆಲ್ಲಿ, ಉತ್ತಮ ಸದ್ಗುಣಗಳನ್ನು ರೂಢಿಸಿಕೊಳ್ಳಬೇಕು ಎಂದರು.
ಇದೇ ವೇಳೆ ಪವಿತ್ರ ಮಹಾ ಕುಂಭಮೇಳದ ಅಂಗವಾಗಿ ತಾಲೂಕಿನ ಅಕ್ಕಿಹೆಬ್ಬಾಳು ಹೋಬಳಿಯ ತ್ರಿವೇಣಿ ಸಂಗಮದಲ್ಲಿ ನಡೆದ ಲೇಸರ್ ಶೋ ಮತ್ತು ಗಂಗಾರತಿ ಭಕ್ತರ ಮನಸೆಳೆಯಿತು. ನದಿಯ ತಟದಿಂದ ಲೇಸರ್ ಕಿರಣಗಳ ಆಕರ್ಷಕ ಶೋ ನೋಡುಗರ ಗಮನ ಸೆಳೆಯಿತು. ಪುನೀತ್ ರಾಜ್ಕುಮಾರ್, ಲತಾಮಂಗೇಶ್ಕರ್ ಸೇರಿದಂತೆ ಹಲವು ವಿಧದ ಹಾಡುಗಳಿಗೆ ಬಣ್ಣಬಣ್ಣದ ಕಿರಣಗಳು ಚಿತ್ತಾರ ಮೂಡಿಸಿದ್ದವು.
ಉತ್ತರ ಭಾರತದ ಕಾಶಿಯಿಂದ ಆಗಮಿಸಿದ್ದ ರಣಧೀರ್ ಪಂಡಿತರ ನೇತೃತ್ವದ ಪರಿಣಿತರ ತಂಡ ಸುಮಾರು ಒಂದು ಗಂಟೆಗಳ ಕಾಲ ಕಾವೇರಿ, ಹೇಮಾವತಿ ಲಕ್ಷ್ಮಣತೀರ್ಥ ನದಿಗಳು ಸೇರುವ ಸ್ಥಳದಲ್ಲಿ ನಿರ್ಮಿಸಲಾಗಿದ್ದ ವಿಶೇಷ ವೇದಿಕೆಯಲ್ಲಿ ಆರತಿ ಕಾರ್ಯಕ್ರಮ ಪ್ರದರ್ಶಿಸಿದರು.