ಭಟ್ಕಳ : ತಾಲೂಕಿನ ವಿವಿಧ ಭಾಗಗಳಲ್ಲಿ ಸೋಮವಾರ ರಾತ್ರಿ ಆಗಸದಲ್ಲಿ ಸರಣಿ ಬೆಳಕಿನ ಓಟ ಕಾಣಿಸಿಕೊಂಡಿದ್ದು ಜನರು ಒಮ್ಮೆ ಇದೆಂತಾ ವಿಸ್ಮಯ ಎಂದು ಆಶ್ಚರ್ಯಚಕಿತರಾಗಿದ್ದಾರೆ. ಒಂದೇ ಸಮನೆ ಆಕಾಶದಲ್ಲಿ ಬೆಳಕಿನ ಸರಣಿ ಓಡುತ್ತಿರುವುದನ್ನು ನೋಡಿ ಒಬ್ಬೊಬ್ಬರು ಒಂದೊಂದು ರೀತಿಯಲ್ಲಿ ವ್ಯಾಖ್ಯಾನ ಮಾಡಿದ್ದಾರೆ.
ಆದರೆ ಇದು ಎಲಾನ್ ಮಾಸ್ಕ್ ಮಾಲೀಕತ್ವದಲ್ಲಿ ಬಾಹ್ಯಾಕಾಶ ಸಂಸ್ಥೆ ಅಮೇರಿಕದ ಸ್ಪೇಸ್ ಎಕ್ಸ್ ಉಡಾವಣೆ ಮಾಡಿದ ಸರಣಿ ಉಪಗ್ರಹಗಳು ಎನ್ನುವುದು ನಂತರ ತಿಳಿದು ಬಂದಿದೆ. ಕಳೆದ 2018ರಿಂದ ಸರಣಿ ಉಪಗ್ರಹಗಳನ್ನು ಕಕ್ಷೆಗೆ ಸೇರಿಸುವಲ್ಲಿ ಸ್ಪೇಸ್ ಎಕ್ಸ್ ಯಶಸ್ವಿಯಾಗಿದ್ದು ಅದರ ಒಂದು ಭಾಗ ಸೋಮವಾರ ಜಿಲ್ಲೆಯ ಆಗಸದಲ್ಲಿ ಗೋಚರಿಸಿದೆ. ಆರಂಭದಲ್ಲಿ ಕೆಲವರು ಇದು ನಕ್ಷತ್ರ ಪುಂಜಗಳೇ ಎನ್ನುವ ಸಂಶಯ ಬಂದಿದ್ದರೂ ಸಹ ಒಂದು ರೈಲಿನಷ್ಟು ಉದ್ದನೆಯ ಬೆಳಕಿನ ಸಾಲು ಕಂಡವರು ಇದೊಂದು ವಿಸ್ಮಯ ಎಂದು ಭಾವಿಸಿದ್ದರು.
ಶಿರಸಿಯ ಭೈರುಂಬೆಯಲ್ಲಿರುವ ಖಗೋಳ ವಿಜ್ಞಾನ ಸಂಸ್ಥೆಯ ವಸಂತ ಹೆಗಡೆ ಅವರು ಇದೊಂದು ಉಪಗ್ರಹಗಳ ಸರಣಿಯಾಗಿದ್ದು ಆಕಾಶದಲ್ಲಿ ಹೋಗುವಾಗ ಸೂರ್ಯನ ಕಿರಣಗಳು ಪ್ರತಿಫಲಿಸುವುದರಿಂದ ಬೆಳಕಿನಲ್ಲಿ ಮಿನುಗುತ್ತಿವೆ. ಭೂಮಿಗೆ ತೀರಾ ಹತ್ತಿರದಿಂದ ಹೋಗುತ್ತಿರುವುದರಿಂದ ಬರಿಗಣ್ಣಿಗೆ ಗೋಚರಿಸುತ್ತಿದೆ ಎಂದು ತಿಳಿಸಿದ್ದಾರೆ. ಆಕಾಶದಲ್ಲಿ ಬೆಳಕಿನ ಓಟವನ್ನು ನೋಡಿದ ಗುಳ್ಮಿಯ ಅಬ್ದುಲ್ ಮಜೀದ್ ಅವರು ತಮ್ಮ ಮೊಬೈಲ್ನಲ್ಲಿ ವಿಡಿಯೋ ಮಾಡಿ ವಿವರ ತಿಳಿದುಕೊಳ್ಳುವುದಕ್ಕಾಗಿ ಪತ್ರಕರ್ತರೊಂದಿಗೆ ಹಂಚಿಕೊಂಡಿದ್ದಾರೆ.