ಬೈಂದೂರು: 50 ವರ್ಷಕ್ಕೂ ಅಧಿಕ ಒಟ್ಟಾಗಿ ಬಾಳಿ ಬದುಕಿದ ದಂಪತಿ ಸಾವಿನಲ್ಲೂ ಜೊತೆಯಾದ ವಿಲಕ್ಷಣ ಘಟನೆಯೊಂದು ಬೈಂದೂರು ತಾಲೂಕಿನ ಬಿಜೂರಿನಲ್ಲಿ ನಡೆದಿದೆ.
ಬೈಂದೂರು ತಾಲೂಕಿನ ಉಪ್ಪುಂದ ಗ್ರಾಮದ ಸಣ್ಣ ಬೆಸ್ಕೂರು ಮನೆ ನಿವಾಸಿ 85ವರ್ಷ ಪ್ರಾಯದ ಮುಡೂರ ದೇವಾಡಿಗ ಹಾಗೂ ಅವರ ಪತ್ನಿ 77 ವರ್ಷ ಪ್ರಾಯದ ಕೃಷ್ಣಿ ದೇವಾಡಿಗ ಮೃತ ದಂಪತಿ. ಮುಡೂರ ದೇವಾಡಿಗ ಅವರು ವಯೋಸಹಜ ಅನಾರೋಗ್ಯದಿಂದ ಭಾನುವಾರ ರಾತ್ರಿ ಮೃತಪಟ್ಟಿದ್ದರು. ಕುಟುಂಬದವರು, ಊರಿನವರು ಮನೆಯ ಮುಂದೆ ಸೇರಿದ್ದರು.
ಮನೆಯೊಳಗೆ ಮುಡೂರ ದೇವಾಡಿಗರ ಮೃತದೇಹವನ್ನಿಡಲಾಗಿತ್ತು. ಅಂತ್ಯ ಸಂಸ್ಕಾರಕ್ಕೆ ಸಕಲ ಸಿದ್ಧತೆಗಳನ್ನು ಮಾಡಲಾಗುತ್ತಿತ್ತು. ಈ ಸಂದರ್ಭದಲ್ಲಿ ಇದ್ದಕ್ಕಿದ್ದಂತೆ ಅವರ ಪತ್ನಿ ಕೃಷ್ಣಿ ದೇವಾಡಿಗ ಅವರು ಪತಿಯ ಪಾರ್ಥಿವ ಶರೀರದ ಎದುರೇ ಕುಸಿದು ಬಿದ್ದಿದ್ದರು. ನೆರೆದವರು ಏನಾಯ್ತು ಎಂಬದನ್ನು ನೋಡುವಷ್ಟರಲ್ಲಿ ಕೃಷ್ಣಿ ದೇವಾಡಿಗ ಕೂಡ ಇಹಲೋಕ ತ್ಯಜಿಸಿದ್ದರು. ಸಂಸಾರದ ನೊಗವನ್ನು ಜೊತೆಯಾಗಿಯೇ ಹೊತ್ತವರು ಸಾವಿನಲ್ಲಿಯೂ ಜೊತೆಯಾಗಿ ಪ್ರಯಾಣಿಸಿದ್ದರು.
ಮುಡೂರ ದೇವಾಡಿಗ ದಂಪತಿ 5 ಜನ ಗಂಡು ಮಕ್ಕಳು, ಮೊಮ್ಮಕ್ಕಳು ಹಾಗೂ ಅಪಾರ ಬಂಧು ಬಳಗವನ್ನು ಅಗಲಿದ್ದಾರೆ.