ಉಡುಪಿ: ಪಿಕಪ್ ವಾಹನವೊಂದು ಮಿಲ್ಕ್ ಬೂತ್ ನ ಮುಂಭಾಗದಲ್ಲಿ ಇಟ್ಟಿದ್ದ ಹಾಲಿನ ಕ್ರೇಟ್‌ಗೆ ಡಿಕ್ಕಿ ಹೊಡೆದ ಭಯಾನಕ ಘಟನೆ ಉಡುಪಿಯ ಕಡಿಯಾಳಿಯಲ್ಲಿ ಇಂದು ನಸುಕಿನ ವೇಳೆ ನಡೆದಿದೆ.
ಕಡಿಯಾಳಿಯಿಂದ ಉಡುಪಿ ಕಡೆಗೆ ಅತೀ ವೇಗವಾಗಿ ಹೋಗುತ್ತಿದ್ದ ಪಿಕಪ್ ವಾಹನದ ಚಾಲಕ, ಸ್ಕೂಟರ್ ಸವಾರನನ್ನು ತಪ್ಪಿಸುವ ಭರದಲ್ಲಿ ಹಾಲಿನ ಕ್ರೇಟ್ ಗಳಿಗೆ ಡಿಕ್ಕಿ ಹೊಡೆದಿದ್ದಾನೆ. ಕೂದಲೆಳೆಯಂತರದಲ್ಲಿ ಸ್ಕೂಟರ್ ಸವಾರ ಪಾರಾಗಿದ್ದಾನೆ. ಪಿಕಪ್ ಡಿಕ್ಕಿ ಹೊಡೆದ ರಭಸಕ್ಕೆ ಹಾಲಿನ ಕ್ರೇಟ್ ಗಳು ರಸ್ತೆಗೆ ಚೆಲ್ಲಾಪಿಲ್ಲಿಯಾಗಿ ಬಿದ್ದಿವೆ. ಸಾವಿರಾರು ರೂ. ನಷ್ಟ ಸಂಭವಿಸಿದೆ ಎಂದು ತಿಳಿದು ಬಂದಿದೆ.
ಹಾಲಿನ ಪಾಕೇಟ್ ಗಳನ್ನು ಕೊಂಡೊಯ್ಯಲು ಬಂದ ಇನ್ನೋರ್ವ ಸ್ಕೂಟರ್ ಸವಾರನು ಅಪಾಯದಿಂದ ಪಾರಾಗಿದ್ದಾನೆ. ಆತ ಹಾಲಿನ ಪ್ಯಾಕೇಟ್ ಗಳನ್ನು ತೆಗೆದುಕೊಂಡು ಹೋದ ಕೆಲವೇ ಸೆಕೆಂಡ್ ನಲ್ಲಿ ಈ ದುರ್ಘಟನೆ ಸಂಭವಿಸಿದೆ. ಅಪಘಾತದ ಭಯಾನಕ ದೃಶ್ಯ ಸಿಸಿಟಿಯಲ್ಲಿ ಸೆರೆಯಾಗಿದೆ.
