ಕಾಸರಗೋಡು: ತ್ರಿಕ್ಕರಿಪುರ ಮಟ್ಟಮ್ಮಲ್ ನ ಎಂ. ಪ್ರಿಯೇಶ್ ( ೩೨) ಎಂಬವರ ನಿಗೂಢ ಸಾವು ಕೊಲೆ ಎಂದು ಸಾಬೀತಾಗಿದ್ದು, ಪ್ರಕರಣಕ್ಕೆ ಸಂಬಂಧಪಟ್ಟಂತೆ ಇಬ್ಬರನ್ನು ಚಂದೇರ ಠಾಣಾ ಪೊಲೀಸರು ಬಂಧಿಸಿದ್ದಾರೆ.
ತೃಕ್ಕರಿಪುರ ಪಾರಪ್ಪಾಡ್ ನ ಮುಹಮ್ಮದ್ ಶಬಾಸ್ ( ೨೨) ಮತ್ತು ಮುಹಮ್ಮದ್ ರಹನಾಸ್ ( ೨೩) ಬಂಧಿತರು. ಕೃತ್ಯದಲ್ಲಿ ನೆರವಾಗಿ ಶಾಮೀಲಾಗಿದ್ದ ಸಫ್ವಾನ್ ( ೨೫) ಸೇರಿದಂತೆ ಮೂವರು ತಲೆಮರೆಸಿಕೊಂಡಿದ್ದಾರೆ . ಆದಿತ್ಯವಾರ ರಾತ್ರಿ ಕೃತ್ಯ ನಡೆದಿತ್ತು.
ತಂಡವೊಂದು ಮೊಬೈಲ್ ಗೆ ಕರೆ ಮಾಡಿ ಪ್ರಿಯೇಶ್ ನನ್ನು ಕರೆಸಿದ್ದು ಬೈಕ್ ನಲ್ಲಿ ತೆರಳಿದ್ದ ಪ್ರಿಯೇಶ್ ಮರಳಿ ಬಂದಿರಲಿಲ್ಲ. ಈ ನಡುವೆ ಸೋಮವಾರ ಬೆಳಿಗ್ಗೆ ಮನೆ ಸಮೀಪ ಮೃತಪಟ್ಟ ಸ್ಥಿತಿಯಲ್ಲಿ ಪತ್ತೆಯಾಗಿದ್ದರು. ಸಮೀಪ ಬೈಕ್ ಪತ್ತೆಯಾಗಿತ್ತು. ತಂಡವು ಅಪಹರಿಸಿ ಥಳಿಸಿ ಕೊಲೆಗೈದಿದ್ದು ಬಳಿಕ ಮೃತದೇಹವನ್ನು ತಂದು ಮನೆ ಬಳಿ ಎಸೆದು ಪರಾರಿಯಾಗಿದ್ದರು. ಮರದ ತುಂಡಿನಿಂದ ತಂಡವು ಥಳಿಸಿದ್ದು, ಮೃತಪಟ್ಟಿರುವುದಾಗಿ ಖಚಿತ ಗೊಂಡಿದ್ದರಿಂದ ಪ್ರಿಯೇಶ್ ನ ಬೈಕ್ ನಲ್ಲೆ ಮೃತದೇಹ ತಂದು ಎಸೆದು ತೆರಳಿದ್ದಾಗಿ ಬಂಧಿತರು ತಪ್ಪೊಪ್ಪಿಕೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ನಾಪತ್ತೆಯಾಗಿದ್ದ ಪ್ರಿಯೇಶ್ ನ ಮೊಬೈಲ್ ಫೋನ್ ಶಹಬಾಸ್ ನ ಮನೆಯಿಂದ ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ಪ್ರಿಯೇಶ್ ಸಮೀಪದ ಮನೆಯೊಂದರ ಬಳಿ ಸಂಶಯಾಸ್ಪದ ವಾಗಿ ಕಂಡು ಬಂದಿದ್ದನೆನ್ನಲಾಗಿದ್ದು ಇದಕ್ಕಾಗಿ ಪ್ರಶ್ನಿಸಲು ಕರೆದೊಯ್ದು ಈ ಕೃತ್ಯ ನೆಯೆಡೆಸಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.
ಶಹಬಾಸ್ ಬೆಂಗಳೂರಿನ ಹೋಟೆಲೊಂದರಲ್ಲಿ ನೌಕರನಾಗಿದ್ದನು. ರಹನಾಸ್ ಮಲೇಷ್ಯಾದಲ್ಲಿ ಉದ್ಯೋಗದಲ್ಲಿದ್ದು, ಇತ್ತೀಚೆಗೆ ಊರಿಗೆ ಬಂದಿದ್ದನು. ಕೊಲೆ ಗೀಡಾದ ಪ್ರಿಯೇಶ್ ಖಾಸಗಿ ಕಂಪೆನಿಯೊಂದರ ಚಾಲಕರಾಗಿದ್ದರು.
