ಬೆಂಗಳೂರು: ಮಕ್ಕಳ ಕಲಿಕಾ ಗುಣಮಟ್ಟ ಅರ್ಥ ಮಾಡಿಕೊಳ್ಳಲು, ಕಲಿಕಾ ಬಲವರ್ಧನೆ ಹೆಚ್ಚಿಸಲು, ಮಕ್ಕಳ ಭವಿಷ್ಯದ ದೃಷ್ಟಿಯಿಂದ ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆ ಇದೀಗ ಮತ್ತೊಂದು ಮಹತ್ತರ ನಿರ್ಧಾರ ಕೈಗೊಂಡಿದೆ. 5 ಮತ್ತು 8ನೇ ತರಗತಿಯಂತೆ, 9 ಮತ್ತು 11 ನೇ ತರಗತಿ ವಿದ್ಯಾರ್ಥಿಗಳಿಗೆ ಬೋರ್ಡ್ ಪರೀಕ್ಷೆ ನಡೆಸಲು ಶಿಕ್ಷಣ ಇಲಾಖೆ ನಿರ್ಧರಿಸಿದೆ.
ಈ ಹಿಂದೆ ಬೋರ್ಡ್ ಎಕ್ಸಾಂ ಅಂದ್ರೆ ಎಸ್ ಎಸ್ ಎಲ್ ಸಿ, ಪಿಯು ಪರೀಕ್ಷೆ ನೆನಪಾಗುತ್ತಿತ್ತು. ಆದರೀಗ ಆ ಪರಿಕಲ್ಪನೆ ಬದಲಾಗಿದೆ. 5 ಮತ್ತು 8 ರ ಜೊತೆಗೆ 9 ಮತ್ತು 11 ನೇ ತರಗತಿಗೆ ಕೂಡ ಬೋರ್ಡ್ ಎಕ್ಸಾಂ ನಡೆಸಲು ಇಲಾಖೆ ನಿರ್ಧಾರ ಮಾಡಿದ್ದು, ಇಲ್ಲಿ SSLC ಮತ್ತು ಪಿಯುಸಿ ಹಾಗೇ 9 ಮತ್ತು 11 ನೇ ತರಗತಿ ಪರೀಕ್ಷೆ ನಡೆಸುವ ರೀತಿಯಲ್ಲಿ ಬದಲಾವಣೆ ಇರಲಿದೆ.
ಅದರಂತೆ ಪ್ರಸಕ್ತ 2023/24 ನೇ ಸಾಲಿನಲ್ಲಿಯೇ ಈ ನಿಯಮ ಜಾರಿ ಮಾಡುವ ಬಗ್ಗೆ ಶಿಕ್ಷಣ ಇಲಾಖೆ ಸೂಚನೆ ಕೊಟ್ಟಿದೆ. ರಾಜ್ಯ ಪಠ್ಯಕ್ರಮ ಅನುಸರಿಸುವ ಎಲ್ಲಾ ಅನುದಾನಿತ, ಸರ್ಕಾರಿ ಹಾಗೂ ಅನುದಾನ ರಹಿತ ಖಾಸಗಿ ಶಾಲೆಗಳಿಗೆ ಈ ವರ್ಷವೇ ಪರೀಕ್ಷೆ ನಡೆಸಲು ಆದೇಶ ನೀಡಲಾಗಿದೆ.