ಬೆಂಗಳೂರು : ಇದುವರೆಗೆ ಮೊಬೈಲ್ ಅಂಗಡಿ ಸೇರಿದಂತೆ ಇತರೆ ಅಂಗಡಿಗಳಿಗೆ ಕನ್ನ ಹಾಕುತ್ತಿದ್ದಂತ ಕಳ್ಳರು, ಈಗ ಐಷಾರಾಮಿ ಕೈಗಡಿಯಾರದ ಅಂಗಡಿಗಳಿಗೂ ಕನ್ನ ಹಾಕೋದಕ್ಕೆ ತೊಡಗಿದ್ದಾರೆ. ಹೀಗೆ ವಾಚ್ ಅಂಗಡಿಗೆ ಕನ್ನ ಹಾಕಿದಂತ ಕಳ್ಳರು ಕದ್ದಿದ್ದು ಮಾತ್ರ ಬರೋಬ್ಬರಿ 2 ಕೋಟಿ ಮೌಲ್ಯದ ಐಷಾರಾಮಿ ಕೈಗಡಿಯಾರಗಳನ್ನಾಗಿದೆ.
ಹೌದು.. ಬೆಂಗಳೂರಿನ ಇಂದಿರಾನಗರದ 100 ಅಡಿ ರಸ್ತೆಯ ಅಂಗಡಿಯಿಂದ 2 ಕೋಟಿ ರೂ. ಮೌಲ್ಯದ ರಿಸ್ಟ್ ವಾಚ್ ಗಳನ್ನು ಕದಿಯಲಾಗಿದೆ. ಪುಲಕೇಶಿನಗರ (ಫ್ರೇಜರ್ ಟೌನ್) ನಿವಾಸಿ ಮತ್ತು ಜಿಮ್ಸನ್ ಟೈಮ್ಸ್ ಪ್ರೈವೇಟ್ ಲಿಮಿಟೆಡ್ ನ ಮಾಲೀಕ ಶಮೋಯೆಲ್ ಈ ಸಂಬಂಧ ಪೊಲೀಸರಿಗೆ ದೂರು ನೀಡಿದ್ದು, ದೂರಿನಲ್ಲಿ, ಬುಧವಾರ ಬೆಳಿಗ್ಗೆ 9 ಗಂಟೆಗೆ ಕಟ್ಟಡ ಮಾಲೀಕರು ಬಾಗಿಲು ತೆರೆದಾಗ, ಕಳ್ಳತದ ಪ್ರಕರಣ ಬೆಳಕಿಗೆ ಬಂದಿದ್ದಾಗಿ ತಿಳಿಸಿದ್ದಾರೆ.
ಶಮೋಯೆಲ್ ಅಂಗಡಿಗೆ ಹೋದಾಗ ಕಳ್ಳರು ಅಂಗಡಿಯ ಬಾಗಿಲು ಮುರಿದು, ಕೈಗಡಿಯಾರಗಳನ್ನು ಇರಿಸಿದ್ದ ಗಾಜಿನ ಕೇಸ್ ಗಳನ್ನು ಒಡೆದು ಕದ್ದಿರೋದು ಬೆಳಕಿಗೆ ಬಂದಿದೆ ಎಂದು ದೂರಿನಲ್ಲಿ ತಿಳಿಸಿದ್ದಾರೆ. ಅವರ ದೂರಿನ ಪ್ರಕಾರ ಅಂಗಡಿಯಲ್ಲಿದ್ದಂತ ಎಲ್ಲಾ 129 ರಾಡೋ, 29 ಲಾಂಗೈನ್ಸ್ ಕದಿಯಲಾಗಿದೆ ಎನ್ನಲಾಗಿದೆ. ಈ ವಾಚ್ ಗಳ ಮೌಲ್ಯ ಸುಮಾರು 2 ಕೋಟಿಗೂ ಅಧಿಕ ಎಂದು ಹೇಳಲಾಗುತ್ತಿದೆ.
ವಾಚ್ ಅಂಗಡಿ ಮಾಲೀಕ ನೀಡಿದ ದೂರಿನ ಆಧಾರದ ಮೇಲೆ ಪ್ರಕರಣ ದಾಖಲಿಸಿಕೊಂಡಿರುವಂತ ಇಂದಿರಾನಗರ ಠಾಣೆಯ ಪೊಲೀಸರು, ಕಳ್ಳರ ಪತ್ತೆಗಾಗಿ ಬಲೆ ಬೀಸಿದ್ದಾರೆ.
