ಬೆಂಗಳೂರು : ರಾಜ್ಯ ರಾಜಧಾನಿಯಲ್ಲಿ ನಿನ್ನೆಯಷ್ಟೇ ಮೂರು ಅಂತಸ್ತಿನ ಕಟ್ಟಡ ಕುಸಿದಿದ್ದು, ಇಂದು ಕೂಡ ಮತ್ತೊಂದು ಕಟ್ಟಡ ಕುಸಿತವಾಗಿದೆ. ಡೇರಿ ಸರ್ಕಲ್ ಬಳಿಯ ಕೆಎಂಎಫ್ ಕ್ವಾಟರ್ಸ್ ಒಳಗೆ ಇರುವ ಮೂರು ಅಂತಸ್ತಿನ ಕಟ್ಟಡ ಕುಸಿದಿದ್ದು,ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ.
ಸ್ಥಳಕ್ಕೆ ಅಗ್ನಿಶಾಮಕದಳ ಸಿಬ್ಬಂದಿ ಆಗಮಿಸಿದ್ದಾರೆ. ಕುಸಿತವಾದ ಕಟ್ಟಡ 50 ವರ್ಷ ಹಳೆಯದ್ದಾಗಿದೆ. ನಾಳೆ ಕೆಎಂಎಫ್ನಲ್ಲಿ ಸಿಎಂ ಕಾರ್ಯಕ್ರಮ ಆಯೋಜಿಸಿದ್ದು, ಕೆಲಸ ಮಾಡುತ್ತಿದ್ದ ಸಿಬ್ಬಂದಿಗಳಿಗೆ ಮನೆ ನೀಡಲಾಗಿತ್ತು.
ಒಟ್ಟಾರೆ ಇಲ್ಲಿ 18 ಕುಟುಂಬ ವಾಸವಾಗಿದ್ದು, ಕುಸಿತ ಆರಂಭವಾಗುತ್ತಿದ್ದಂತೆ ಎಲ್ಲರೂ ಮನೆಯಿಂದ ಹೊರ ಬಂದಿದ್ದಾರೆ.
ಆದರೂ ನಾಲ್ಕು ಮಂದಿಗೆ ಗಂಭೀರ ಗಾಯಗಳಾಗಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಈ ಬಗ್ಗೆ ನಿವಾಸಿಯೊಬ್ಬರು ಮಾತನಾಡಿ, ಕಟ್ಟಡ ಬೀಳುವ 5 ನಿಮಿಷದ ಹಿಂದೆ ನಾವು ಮನೆಯಿಂದ ಓಡಿಬಂದ್ವಿ. ತಿಂಡಿ ತಿನ್ನುತ್ತಾ ಕುಳಿತಿದ್ದ ವೇಳೆ ಹೊರಗಿನಿಂದ ಸದ್ದು ಬಂತು. ಮನೆ ಬೀಳುತ್ತಿದೆ ಹೊರಬನ್ನಿ ಎಂದರು. ತಕ್ಷಣವೇ ಓಡಿ ಬಂದೆವು ಎಂದರು.