ಪ್ರಾಣಿ, ಪಕ್ಷಿಕಳಿಗಾಗಿ ವರದಾ ನದಿಯನ್ನೆ ತುಂಬಿಸಲು ಹೊರಟ ರೈತ

ಹಾವೇರಿ: ಮಳೆರಾಯನ ಮುನಿಸಿನಿಂದ ನೆಲ ಕಾದ ಹಂಚಂತಾಗಿದೆ.ನೀರಿಲ್ಲದೆ ಬರಗಾಲ ಬಂದು ಹೊಕ್ಕಿದೆ. ಇತ್ತ ರೈತ ಮಳೆರಾಯನ ಮುನಿಸಿನಿಂದ ಬೆಳೆಗಳನ್ನು ಕಾಪಡಿಕೊಳ್ಳಲು ಹರಸಾಹಸ ಪಡುತ್ತಿದ್ದಾನೆ ಇನ್ನೊಂದೆಡೆ ಕುಡಿಯಲು ನೀರಿಲ್ಲದೆ ಪರಿತಪಿಸುತ್ತಿದ್ದಾನೆ. ಪ್ರಾಣಿ, ಪಕ್ಷಿಗಳ ಒದ್ದಾಟ ಹೇಳತೀರದು ನೀರಿಗಾಗಿ ದೇವರಲ್ಲಿ ಪ್ರಾರ್ಥಿಸುತ್ತಿವೆಯೊ ಎಂಬಂತೆ ಕೂಗಾಡುತ್ತ ಇವೆ. ಇಂತಹ ಸಮಯದಲ್ಲಿ ರೈತನೊಬ್ಬ ವರದಾ ನದಿಯನ್ನು ತುಂಬಿಸುವ ಮೂಲಕ ಪ್ರಾಣಿ ಪಕ್ಷಿಗಳ ದಾಹ ನೀಗಿಸುವ ಪ್ರಯತ್ನಕ್ಕೆ ಇಳಿದಿದ್ದಾನೆ.

ತಾಲ್ಲೂಕಿನ ಸಂಗೂರು ಗ್ರಾಮದ ರೈತ ಭುವನೇಶ್ವರ ಸ್ವಂತ ಹಣದಿಂದ ಪ್ರಾಣಿ, ಪಕ್ಷಿಗಳ ದಾಹ ತೀರಿಸಲು ಮುಂದಾಗಿದ್ದಾರೆ. ಮಳೆಗಾಲದಲ್ಲಿ ಮೈದುಂಬಿ ಹರಿಯುತ್ತಿದ್ದ ವರದಾ ನದಿ ಮಳೆ ಇಲ್ಲದೆ ಬರಿದಾಗಿದೆ. ಬರೋಬ್ಬರಿ 1 ಲಕ್ಷದ 60 ಸಾವಿರ ರೂಪಾಯಿ ಖರ್ಚು ಮಾಡಿ ಬೋರ್‌ವೆಲ್ ಕೊರೆಸಿ ನೀರನ್ನು ನೇರವಾಗಿ ಸಂಗೂರು ಗ್ರಾಮದ ಪಕ್ಕದಲ್ಲಿರುವ ವರದಾ ನದಿಗೆ ಬಿಡುತ್ತಿದ್ದಾರೆ.

ದಿನಕ್ಕೆ ಆರು ತಾಸಿನಂತೆ ಕಳೆದ ಐದು ದಿನಗಳಿಂದ ನಿರಂತರ ನೀರು ವರದಾ ನದಿಗೆ ಬಿಡಲಾಗುತ್ತಿದೆ. ಈಗಾಗಲೇ ಅರ್ಧ ಅಡಿಯಷ್ಟು ನದಿಯಲ್ಲಿ ಸಂಗ್ರಹವಾಗಿದೆ. ಇದರಿಂದಾಗಿ ವರದಾ ನದಿಯ ನೀರಿನ ಮೇಲೆ ಅವಲಂಬಿಸಿರುವ ಸಾವಿರಾರು ಪಕ್ಷಿಗಳಿಗೆ ಅನುಕೂಲವಾಗಿದೆ.ಜಿಲ್ಲೆಯಾದ್ಯಂತ ರೈತ ಮಾಡಿರುವ ಕೆಲಸಕ್ಕೆ ಭಾರಿ ಮೆಚ್ಚುಗೆ ವ್ಯಕ್ತವಾಗುತ್ತದೆ, ಅಲ್ಲದೆ ರೈತನ ಕಾರ್ಯಕ್ಕೆ ಜಿಲ್ಲಾಧಿಕಾರಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.ಏನೆ ಆಗಲಿ ರೈತನ ಸಹಾಯಕ್ಕೆ ಮತ್ತು ಆತನ ಹರಸಾಹಸಕ್ಕೆ ತಲೆಬಾಗಲೇಬೇಕು.