ನ್ಯೂಟ್ರಿಷನ್ ಆಹಾರಗಳು ನಮ್ಮ ದೇಹಕ್ಕೆ ತುಂಬಾ ಉಪಯುಕ್ತ ಆದರೆ ಅವುಗಳನ್ನು ಎಷ್ಟು ಪ್ರಮಾಣದಲ್ಲಿ ಸೇವಿಸ ಬೇಕು ಎನ್ನುವುದು ನಮ್ಮ ಜೀರ್ಣಕ್ರಿಯೆಯ ಮೇಲೆ ನಿರ್ಧಾರವಾಗುತ್ತದೆ.
ನ್ಯೂಟ್ರಿಷನ್ ಆಹಾರಗಳು ಅತ್ಯಂತ ಹೆಚ್ಚು ಪ್ರೋಟಿನ್ ಹಾಗೂ ಕೊಬ್ಬನ್ನು ಹೊಂದಿದ್ದರೆ ನಮ್ಮ ಜೀರ್ಣಕ್ರಿಯೆಗೆ ತೊಂದರೆಯಾಗುವ ಸಂಭವವಿರುತ್ತದೆ. ಹೀಗಾಗಿ ಪ್ರತಿ ಸಮಯದಲ್ಲೂ ಕಾರ್ಬೊಹೈಡ್ರೇಟ್ಸ್ ಹಾಗೂ ಪ್ರೋಟಿನ್ಗಳನ್ನು ಸಮದೂಗಿಸಿಕೊಂಡು ಹೋಗುವಂತಹ ಆಹಾರಗಳನ್ನು ತೆಗೆದುಕೊಳ್ಳುವುದು ಉತ್ತಮ ಎಂದು ಕಾಕುಂಜೆ ಆಯುರ್ವೇದಿಕ್ ವೆಲ್ ನೆಸ್ ಕ್ಲಿನಿಕ್ ವೈದ್ಯೆ ಡಾ. ಅನುರಾಧ ಹೇಳಿದ್ದಾರೆ.
ಊಟದ ನಂತರ ಎದೆ ಉರಿ, ಪದೇ ಪದೇ ತೇಗು ಬರುವುದು, ಹೊಟ್ಟೆ ಕಟ್ಟಿದಂತಾಗುವುದು, ಮಲಬದ್ಧತೆ ಸಮಸ್ಯೆಗಳು ಉಂಟಾದಾಗ ನಮ್ಮ ಜೀರ್ಣಕ್ರಿಯೆ ಸರಿಯಾಗಿ ನಡೆಯುತ್ತಿಲ್ಲ ಎಂದರ್ಥ.
ಮತ್ತೆ ಹಲವಾರು ಬಾರಿ ನಾವು ಮಾಡುವ ಕೆಲಸದ ಮೇಲೆ ನಮ್ಮ ಜೀರ್ಣಕ್ರಿಯೆ ನಿರ್ಭರವಾಗಿರುತ್ತದೆ. ಇಡೀ ದಿನ ಕೂತಲ್ಲಿಯೇ ಕೆಲಸ ಮಾಡುವವರಿಗೆ ಬೊಜ್ಜು, ಹೈಪರ್ಟೆನ್ಷನ್ ಮುಂತಾದ ಸಮಸ್ಯೆಗಳು ಪ್ರಾರಂಭವಾಗುತ್ತದೆ. ಇಂತಹ ಸಮಯದಲ್ಲಿ ನಾವು ತಿನ್ನುವ ಆಹಾರದಲ್ಲಿ ತರಕಾರಿಯ ಅಂಶಗಳನ್ನು ಹೆಚ್ಚು ಮಾಡಬೇಕಾಗುತ್ತದೆ. ಇದರಿಂದ ಪ್ರೋಟಿನ್ ಹಾಗೂ ಕೊಬ್ಬನ್ನು ಸರಿಯಾದ ಪ್ರಮಾಣದಲ್ಲಿ ನಮ್ಮ ದೇಹದಲ್ಲಿ ಸಮದೂಗಿಸಿಕೊಳ್ಳಬಹುದು.
ತುಂಬಾ ತಡವಾಗಿ ಊಟ ಮಾಡುವುದು ಕೂಡ ನಮ್ಮ ಜೀರ್ಣಕ್ರಿಯೆಗೆ ಬಹಳಷ್ಟು ತೊಂದರೆಗಳನ್ನು ಉಂಟುಮಾಡುತ್ತದೆ. ಇದರಿಂದ ಗ್ಯಾಸ್ರ್ಟಿಕ್ ಸಮಸ್ಯೆಗಳು, ಬೆಳಗಿನ ಜಾವದಲ್ಲಿ ದೇಹಕ್ಕೆ ಆಯಾಸವಾದಂತೆ ಅನುಭವವಾಗುವಂತಹ ಸಮಸ್ಯೆಗಳನ್ನು ಉಂಟುಮಾಡುತ್ತದೆ.
ಊಟದ ಅಥವಾ ಬೆಳಗ್ಗಿನ ತಿಂಡಿ ತಿನ್ನುವ ಮೊದಲು ಸ್ನಾನ ಮಾಡಿಕೊಳ್ಳುವುದು ನಮ್ಮ ದೇಹದ ಜೀರ್ಣಕ್ರಿಯೆಯನ್ನು ಉತ್ತಮವಾಗಿಸಲು ಸಹಕಾರಿಯಾಗುತ್ತದೆ.