ಚಿತ್ರಾನ್ನ ಸೇವಿಸಿ ಬೋರಾಗಿದ್ದರೂ ಹೆಚ್ಚಿನವರು ಕೆಲವೊಂದು ಕಾರಣಗಳಿಗೆ ಬೆಳಗ್ಗಿನ ತಿಂಡಿಗೆ ಚಿತ್ರಾನ್ನವನ್ನು ಮಾಡುತ್ತಲೇ ಇರುತ್ತಾರೆ. ಆದರೆ ಸೀಸನ್ ಗೆ ತಕ್ಕಂತೆ ಚಿತ್ರಾನ್ನಕ್ಕೂ ಹೊಸತನ ನೀಡಿದರೆ ಬೋರ್ ಹೊಡೆಸುವುದಿಲ್ಲ. ಈ ಮಾವಿನ ಕಾಲವಾಗಿರುವುದರಿಂದ ಮಾವಿನಕಾಯಿ ಚಿತ್ರಾನ್ನ ಮಾಡಿ ಜಾಣರಾಗಿ.
ಬೇಕಾಗುವ ಪದಾರ್ಥಗಳು: ಮಾವಿನಕಾಯಿತುರಿ- ಒಂದು ಕಪ್, ತೆಂಗಿನಕಾಯಿತುರಿ- ಅರ್ಧ ಹೋಳು, ಒಣಮೆಣಸಿನಕಾಯಿ- ನಾಲ್ಕು, ಇಂಗು- ಸ್ವಲ್ಪ, ಸಾಸಿವೆ- ಸ್ವಲ್ಪ, ಅರಿಶಿನಪುಡಿ-ಚಿಟಿಕೆ, ಕೊತ್ತಂಬರಿ ಸೊಪ್ಪು- ಸ್ವಲ್ಪ, ಕರಿಬೇವು-ಸ್ವಲ್ಪ, ರುಚಿಗೆ ತಕ್ಕಂತೆ ಉಪ್ಪು.
ಮಾಡುವ ವಿಧಾನ: ಚಿತ್ರಾನ್ನ ಮಾಡಲು ಹೊರಡುವವರು ಮಾವಿನತುರಿ ಸೇರಿದಂತೆ ಮಸಾಲೆ ಪದಾರ್ಥಗಳನ್ನು ಮಿಕ್ಸಿಯಲ್ಲಿ (ನೀರು ಹಾಕದೆ) ಹಾಕಿ ರುಬ್ಬಬೇಕು. ಮತ್ತೊಂದೆಡೆ ಪಾತ್ರೆಯಲ್ಲಿ ಒಗ್ಗರಣೆಗೆ ಎಣ್ಣೆ ಹಾಕಿ ಅದು ಕಾಯುತ್ತಿದ್ದಂತೆಯೇ ಸಾಸಿವೆ ಹಾಕಿ ಅದು ಸಿಡಿದ ಬಳಿಕ ಕಡ್ಲೆಬೀಜ, ಕಡ್ಲೆಬೇಳೆ, ಉದ್ದಿನ ಬೇಳೆ ಒಣ ಮೆಣಸು ಹಾಕಿ ಚೆನ್ನಾಗಿ ಹುರಿಯಬೇಕು. ನಂತರ ರುಬ್ಬಿಟ್ಟುಕೊಂಡ ಮಾವಿನ ತುರಿಯ ಮಸಾಲೆಯನ್ನು ಹಾಕಿ ಮಿಶ್ರಮಾಡಬೇಕು. ಈ ಸಂದರ್ಭ ರುಚಿಗೆ ತಕ್ಕಂತೆ ಉಪ್ಪು ಹಾಕಬೇಕು. ಆ ನಂತರ ಇಳಿಸಿ ಅದಕ್ಕೆ ಅನ್ನವನ್ನು ಹಾಕಿ ಕಲೆಸಿದರೆ ಮಾವಿನಕಾಯಿ ಚಿತ್ರಾನ್ನ ತಯಾರು ಆಗುತ್ತದೆ.