ಮಳೆ ಸೀಸನ್ ಆರಂಭ ಆದಂಗೆ ಜನರು ಎಣ್ಣೆಯಲ್ಲಿ ಕರಿದಂತ ಬಿಸಿಬಿಸಿ ತಿಂಡಿ ತಿನ್ನಲು ಎಲ್ಲರು ಇಷ್ಟ ಪಡುತ್ತಾರೆ. ಅಂತವರಿಗಾಗಿ ಹಲಸಿನ ಕಾಯಿ ಹಪ್ಪಳ ಮಾಡಲು ವಿಧಾನ ಇಲ್ಲಿದೆ.
ಬೇಕಾಗುವ ಸಾಮಾಗ್ರಿಗಳು: ಮಧ್ಯಮ ಗಾತ್ರದ ಹಲಸಿನ ಕಾಯಿ, 2 ಚಮಚ ಕೆಂಪು ಮೆಣಸಿನ ಪುಡಿ, ಸ್ವಲ್ಪ ಹುಣಸೆ ಹುಳಿ, ರುಚಿಗೆ ತಕ್ಕಷ್ಟು ಉಪ್ಪು, 2 ಸಣ್ಣ ಪ್ಲ್ಯಾಸ್ಟಿಕ್ ಶೀಟ್ಗಳು, 1 ದೊಡ್ಡ ಪ್ಲ್ಯಾಸ್ಟಿಕ್ ಶೀಟ್ ಅಥವಾ ಕಾಟನ್ ಬಟ್ಟೆ
ಮಾಡುವ ವಿಧಾನ: ಹಲಸಿನ ತೊಳೆಗಳನ್ನುಇಡ್ಲಿ ಪಾತ್ರೆಯಲ್ಲಿ ಚೆನ್ನಾಗಿ ಬೇಯಿಸಿ. ಗ್ರೈಂಡರ್ನಲ್ಲಿ ಬೇಯಿಸಿದ ಸೊಳೆಯನ್ನು ಹಾಕಿ, ಅದಕ್ಕೆ ಉಪ್ಪು, ಖಾರ ಹಾಗೂ ಸ್ವಲ್ಪ ಹುಳಿ ಹಾಕಿ. ಪೂರ್ತಿ ನುಣ್ಣಗೆ ತಿರುಗಿಸಿ. ಈ ಪೇಸ್ಟನ್ನು ತೆಗೆದುಕೊಂಡು ಒದ್ದೆ ಕೈಯ್ಯಲ್ಲಿ ನಿಂಬೆಹಣ್ಣಿನ ಗಾತ್ರದ ಉಂಡೆ ಮಾಡಿಕೊಳ್ಳಿ. ನಂತರ ಎರಡು ಪ್ಲ್ಯಾಸ್ಟಿಕ್ ಶೀಟ್ ಗಳಿಗೆ ಎಣ್ಣೆ ಸವರಿಕೊಳ್ಳಿ. ಒಂದು ಶೀಟ್ ಮೇಲೆ ಹಲಸಿನ ಉಂಡೆಯಿಟ್ಟು ಮೇಲೆ ಇನ್ನೊಂದು ಶೀಟ್ನಿಂದ ಮುಚ್ಚಿಬಿಡಿ. ಇದರ ಮೇಲೆ ಮರದ ಮಣೆ ಇಟ್ಟು ಒತ್ತಿ. ಬಳಿಕ ನಿಧಾನವಾಗಿ, ಮೇಲಿನ ಪಾಲಿಥಿನ್ ಶೀಟ್ ಎತ್ತಿದರೆ ಚಪಾತಿಯಂತೆ ಹಿಟ್ಟು ಹರಡಿರುತ್ತದೆ. ಇವುಗಳನ್ನು ದೊಡ್ಡದಾದ ಪ್ಲ್ಯಾಸ್ಟಿಕ್ ಇಲ್ಲವೇ ಸ್ವಚ್ಛವಾದ ಬಟ್ಟೆ ಮೇಲೆ ಒಂದರ ಪಕ್ಕ ಒಂದನ್ನು ಹಾಕಿ 3-4 ಗಂಟೆಗಳ ಕಾಲ ಬಿಸಿಲಿನಲ್ಲಿಡಿ. ನಂತರ ಒಮ್ಮೆ ಎಲ್ಲ ಹಪ್ಪಳಗಳನ್ನು ತಿರುವಿ ಹಾಕಿ. ಮತ್ತೆ 3-4 ಗಂಟೆ ಬಿಡಿ. ಎರಡರಿಂದ ಮೂರು ದಿನ ಒಣಗಿಸಿದ ಬಳಿಕ ಹಪ್ಪಳಗಳನ್ನು ಡಬ್ಬಿಯಲ್ಲಿ ಹಾಕಿ ತೆಗೆದಿಟ್ಟುಕೊಳ್ಳಿ. ಬೇಕೆಂದಾಗ ಎಣ್ಣೆಯಲ್ಲಿ ಕರಿದು ತಿನ್ನಿ.