ಮನೆಯಲ್ಲೇ ಮಾಡಿ ಆಲೂಪರೋಟ

ಆಲೂಗೆಡ್ಡೆ ಎಂದರೆ ಎಲ್ಲರಿಗೆ ಅಚ್ಚುಮೆಚ್ಚು. ಅದರಲ್ಲೂ ಚಿಕ್ಕಮಕ್ಕಳಿಗಂತೂ ತುಂಬಾ ಇಷ್ಟ. ಆಲೂಗೆಡ್ಡೆಯಲ್ಲಿ ಬಗೆ ಬಗೆಯ ಮಾಡಿ ಬಡಿಸಬಹುದು. ಅಂತಹ ರುಚಿಕರವಾದ ಪದಾರ್ಥಗಳಲ್ಲಿ ಆಲೂಪರೋಟ ಕೂಡ ಒಂದು. ಇದು ಮಾಡಲು ತುಂಬಾ ಸರಳವಾಗಿದ್ದು, ತಿನ್ನಲು ರುಚಿಕರವಾಗಿರುತ್ತದೆ.

ಬೇಕಾಗುವ ಪದಾರ್ಥಗಳು: ಗೋಧಿ ಹಿಟ್ಟು- 2 ಕಪ್

ಆಲೂಗೆಡ್ಡೆ- ಅರ್ಧ ಕೆಜಿ

ಕೊತ್ತಂಬರಿಸೊಪ್ಪು- ಒಂದು ಕಂತೆ

ಹಸಿ ಮೆಣಸಿನಕಾಯಿ- 8

ಕೊತ್ತಂಬರಿ- ಮೂರು ಚಮಚ

ಜೀರಿಗೆ- ಒಂದು ಚಮಚ

ಇಂಗು, ಉಪ್ಪು(ರುಚಿಗೆ ತಕ್ಕಷ್ಟು)

ತಯಾರು ಮಾಡುವ ವಿಧಾನ ಹೀಗಿದೆ: ಆಲೂಪರೋಟ ಮಾಡಲು ಹೊರಡುವ ಮುನ್ನ ಅರ್ಧ ಗಂಟೆಗೂ ಮೊದಲು ಗೋಧಿಹಿಟ್ಟನ್ನು ಚಪಾತಿ ಹಿಟ್ಟಿನಂತೆ ಕಲೆಸಿಟ್ಟುಕೊಳ್ಳಬೇಕು. ಬಳಿಕ ಆಲೂಗೆಡ್ಡೆಯನ್ನು ಚೆನ್ನಾಗಿ ಬೇಯಿಸಿಕೊಳ್ಳಬೇಕು.

ಇನ್ನೊಂದೆಡೆ ಮಸಾಲೆ ಪದಾರ್ಥಗಳನ್ನೆಲ್ಲ ಅಂದರೆ ಇಂಗು, ಜೀರಿಗೆ, ಕೊತ್ತಂಬರಿ ಬೀಜ, ಮೆಣಸಿಕಾಯಿ, ಕೊತ್ತಂಬರಿಸೊಪ್ಪು ಮೊದಲಾದವುಗಳನ್ನು ಸೇರಿಸಿ ಚೆನ್ನಾಗಿ ಮಿಕ್ಸಿ ಮಾಡಿ ಅದನ್ನು ಬೇಯಿಸಿದ ಆಲೂಗೆಡ್ಡೆಯೊಂದಿಗೆ ಬೆರೆಸಬೇಕು ಈ ವೇಳೆ ರುಚಿಗೆ ತಕ್ಕಂತೆ ಉಪ್ಪನ್ನು ಹಾಕಿ ಬಳಿಕ ಚೆನ್ನಾಗಿ ಕಲೆಸಿಟ್ಟುಕೊಳ್ಳಬೇಕು.

ಮತ್ತೊಂದೆಡೆ ಕಲೆಸಿಟ್ಟ ಗೋಧಿ ಹಿಟ್ಟನ್ನು ತೆಗೆದುಕೊಂಡು ಮೊದಲಿಗೆ ಸಣ್ಣ ಉಂಡೆ ಮಾಡಿಕೊಂಡು ಅದನ್ನು ಪೂರಿ ಗಾತ್ರದಲ್ಲಿ ಲಟ್ಟಿಸಿಕೊಂಡು ಮಧ್ಯದಲ್ಲಿ ಬೇಯಿಸಿದ ಆಲೂಗೆಡ್ಡೆಯನ್ನೊಳಗೊಂಡ ಮಿಶ್ರಣವನ್ನು ಇಟ್ಟು ಅದರ ಸುತ್ತ ಬರುವಂತೆ ತಟ್ಟಿ ಅದರ ಮೇಲೆ ಮತ್ತೊಂದು ಪದರ ಬರುವಂತೆ ಹಾಕಿ ಸುತ್ತಲೂ ಮಡಚಿ ಬಳಿಕ ಸ್ವಲ್ಪ ಗೋಧಿ ಹಿಟ್ಟನ್ನು ಉದುರಿಸಿಕೊಂಡು ಅಗಲವಾಗಿ ಲಟ್ಟಿಸಬೇಕು. ಅದಾದ ಬಳಿಕ ತಾವಾದಲ್ಲಿ ಎಣ್ಣೆ ಹಾಕಿಕೊಂಡು ಚೆನ್ನಾಗಿ ಬೇಯಿಸಿದರೆ ಸವಿಯಲು ರುಚಿಯಾದ ಆಲೂಪರೋಟ ತಯಾರಾಗುತ್ತದೆ