ಆಲೂಗೆಡ್ಡೆಯಲ್ಲಿ ಮಾಡುವ ಬಹಳಷ್ಟು ರುಚಿಕರ ತಿಂಡಿಗಳಲ್ಲಿ ಆಲೂಗೆಡ್ಡೆ ಬೋಂಡ ಮೊದಲ ಸ್ಥಾನದಲ್ಲಿ ನಿಲ್ಲುತ್ತದೆ. ಆಲೂ ಬೋಂಡಾ ತಿನ್ನದ ತಿನಿಸು ಪ್ರಿಯರೇ ಇಲ್ಲ ಎನ್ನಬಹುದು. ಈ ಆಲೂ ಬೋಂಡ ಮಾಡುವ ವಿಧಾನ ಇಲ್ಲಿದೆ.
ಬೇಕಾಗುವ ಪದಾರ್ಥಗಳು :
• ಆಲೂಗಡ್ಡೆ – 1 ಕೆಜಿ
• ಹಸಿಮೆಣಸಿನಕಾಯಿ – 4
• ಕರಿಬೇವು – 1 ಕಂತೆ
• ಒಣಮೆಣಸು – 2
• ಸಾಸಿವೆ – 1 ಚಮಚ
• ತುಪ್ಪ – 2 ಚಮಚ
• ಕಡ್ಲೇಹಿಟ್ಟು – 180 ಗ್ರಾಂ
• ಮೆಣಸಿನಕಾಯಿ ಪುಡಿ – 1 ಚಮಚ
• ಶುಂಠಿ ಸ್ವಲ್ಪ
• ಹಿಂಗು ಸ್ವಲ್ಪ
• ಉಪ್ಪು ರುಚಿಗೆ ತಕ್ಕಷ್ಟು
ಮಾಡುವ ವಿಧಾನ :
ಆಲೂಗಡ್ಡೆಯನ್ನು ಚೆನ್ನಾಗಿ ತೊಳೆದು ಬೇಯಿಸಿ, ಸಿಪ್ಪೆ ತೆಗೆದು ಪುಡಿಮಾಡಿಕೊಳ್ಳಬೇಕು, ಆ ಮಿಶ್ರಣಕ್ಕೆ ಸಣ್ಣಗೆ ಕತ್ತರಿಸಿದ ಹಸಿಮೆಣಸಿನ ಕಾಯಿ, ಹಸಿಶುಂಠಿ, ಕರಿಬೇವು ಸಣ್ಣಗೆ ಹಚ್ಚಿ ಹಾಕಿ. ನಿಂಬೆಹಣ್ಣಿನ ರಸ, ಇಂಗು ಉಪ್ಪನ್ನು ಸೇರಿಸಿ ಜೊತೆಗೆ ಒಂದು ಸಾಸಿವೆ ಒಗ್ಗರಣೆ ಕೊಟ್ಟು ಅದು ಆರಿದ ಮೇಲೆ ಚೆನ್ನಾಗಿ ಕಲಸಿ ನಿಂಬೆ ಹಣ್ಣಿನ ಗಾತ್ರದ ಉಂಡೆ ಮಾಡಿಟ್ಟುಕೊಳ್ಳಿ. ಕಡಲೆ ಹಿಟ್ಟಿಗೆ ಸ್ವಲ್ಪ ಉಪ್ಪು, ಮೆಣಸಿನಕಾಯಿ ಹುಡಿ ಹಾಕಿ, ನೀರನ್ನು ಸೇರಿಸಿ ದೋಸೆ ಹಿಟ್ಟಿನ ಹದಕ್ಕೆ ಕಲಸಿ, ಮಾಡಿಟ್ಟ ಆಲೂಗಡ್ಡೆ ಉಂಡೆಗಳನ್ನು ಕಡಲೆ ಹಿಟ್ಟಿನ ಮಿಶ್ರಣಕ್ಕೆ ಮುಳುಗಿಸಿ ಕಾದ ಎಣ್ಣೆಯಲ್ಲಿ ಕರಿದರೆ ಬಿಸಿ ಬಿಸಿ ಆಲೂಗಡ್ಡೆ ಬೋಂಡ ಸವಿಯಲು ಸಿದ್ಧ.
