ಬೆಂಗಳೂರು: ಎರಡನೇ ವಾರದಲ್ಲಿ ‘ಬಿಗ್ ಬಾಸ್ ಕನ್ನಡ ಸೀಸನ್ 10’ ಕಾರ್ಯಕ್ರಮದಿಂದ ಗೌರೀಶ್ ಅಕ್ಕಿ ಅವರು ಹೊರ ಬಂದಿದ್ದಾರೆ. ಮೊದಲು ತಾನು 100 ದಿನ ಬಿಗ್ ಬಾಸ್ ಮನೆಯಲ್ಲಿಯೇ ಉಳಿಯಲು ಬಯಸುತ್ತೇನೆ ಎಂದಿದ್ದ ಅಕ್ಕಿ ಅವರು, ಬಳಿಕ 2ನೇ ವಾರದಲ್ಲಿ ತಾನು ಹೊರ ಬಂದಿದ್ದ ಕಾರಣ ತಿಳಿಸಿದ್ದಾರೆ.
“ಬಿಗ್ ಬಾಸ್ ಮನೆಯಲ್ಲಿ ನನಗೆ ಸ್ವಲ್ಪ ಅನ್ಕಂಫರ್ಟಬಲ್ ಅನಿಸಿತು. ಪ್ರತಿದಿನ ನನ್ನ ಜೀವನದಲ್ಲಿ ಸಾಕಷ್ಟು ಚಟುವಟಿಕೆ ನಡೆಯುತ್ತಿರುತ್ತವೆ. ನನ್ನಂಥವರನ್ನು ಒಂದು ದ್ವೀಪದಲ್ಲಿ ಇಟ್ಟರೆ ಮನಸ್ಸು ಮುದುಡುತ್ತದೆ. ಹಾಗಾಗಿ ಇದೇ ವಾರ ನನ್ನನ್ನು ಹೊರಗೆ ಕಳಿಸಿ ಎಂದು ನಾನು ಬಿಗ್ ಬಾಸ್ ಬಳಿ ಕೇಳಿಕೊಂಡಿದ್ದೆ. ಅದಕ್ಕೆ ತಕ್ಕಂತೆ ಆಯಿತು. ಬಿಗ್ ಬಾಸ್ ಮನೆಯಲ್ಲಿ ಸ್ವಾತಂತ್ರ್ಯ ಕಸಿದುಕೊಳ್ಳಲಾಗುತ್ತದೆ. ಹಾಗಾಗಿ ಅಲ್ಲಿ ಮನಸ್ಸು ಖಿನ್ನತೆಗೆ ಒಳಗಾಗುತ್ತದೆ. ಅದಕ್ಕೆ ಕೆಲವರು ಹೊಂದಿಕೊಳ್ಳುತ್ತಾರೆ. ನಾನು ಗೆಲ್ಲಲು ಹೋಗಿರಲಿಲ್ಲ. ಒಂದು ಅನುಭವಕ್ಕಾಗಿ ಹೋಗಿದ್ದೆ” ಎಂದು ಗೌರೀಶ್ ಅಕ್ಕಿ ಹೇಳಿದ್ದಾರೆ.