ಸಿಂಗಾಪುರ: ಸಿಂಗಾಪುರದಲ್ಲಿ ಚೀನಾದ ಕ್ಯಾಬ್ ಚಾಲಕನೊಬ್ಬ ಯುರೇಷಿಯನ್ ಮೂಲದ ಮಹಿಳಾ ಪ್ರಯಾಣಿಕಳನ್ನು ಭಾರತೀಯ ಮಹಿಳೆ ಎಂದು ಭಾವಿಸಿ ಜನಾಂಗೀಯ ನಿಂದನೆ ಮಾಡಿರುವ ವಿಡಿಯೋ ವೈರಲ್‌ ಆಗಿದೆ.
ಚೀನಾದ ಚಾಲಕನ ಕಾರಿನಲ್ಲಿ 46 ವರ್ಷದ ಜಾನೆಲ್ಲೆ ಹೋಡೆನ್ ಎಂಬ ಮಹಿಳೆ ತನ್ನ ಒಂಬತ್ತು ವರ್ಷದ ಮಗಳೊಂದಿಗೆ ಪಾಸಿರ್ ರಿಸ್ ಸ್ಟ್ರೀಟ್‌ಗೆ ಪ್ರಯಾಣಿಸುತ್ತಿದ್ದರು.
ಮಹಿಳೆ ಚಾಲಕನಿಗೆ ತನ್ನ ಗಮ್ಯಸ್ಥಾನದ ಅಡ್ರೆಸ್‌ ನೀಡಿದ್ದಾರೆ. ಆದರೆ ಮಹಿಳೆ ನೀಡಿದ ಅಡ್ರೆಸ್‌ಗೆ ಸಾಗುವ ದಾರಿಯಲ್ಲಿ ನಿರ್ಮಾಣ ಕಾಮಗಾರಿಗಾಗಿ ರಸ್ತೆ ಡೈವರ್ಟ್‌ ಮಾಡಲಾಗಿತ್ತು. ರಸ್ತೆ ಡೈವರ್ಟ್‌ ಮಾಡಿದ್ದರಿಂದ ಕೆರಳಿದ ಚಾಲಕ ಆಕೆಯನ್ನು ನೀವು ಭಾರತೀಯರು, ನೀವು ಮೂರ್ಖರು ಎಂದು ಕರೆದಿದ್ದಾನೆ. ಅಲ್ಲದೆ ಕಾರಿನಲ್ಲಿದ್ದ ಹೋಡೆನ್ ಪುತ್ರಿ 1.35 ಮೀಟರ್‌ಗಿಂತ ಕಡಿಮೆ ಎತ್ತರವಿರುವುದರಿಂದ “ಕಾನೂನುಬಾಹಿರವಾಗಿ” ಸವಾರಿ ಮಾಡುತ್ತಿದ್ದಾಳೆ ಎಂದು ಕಿರುಚುತ್ತಾನೆ. ಸಿಂಗಾಪುರದ ಎಲ್ಲಾ ವಾಹನಗಳು 1.35 ಮೀಟರ್‌ಗಿಂತ ಕಡಿಮೆ ಎತ್ತರದಲ್ಲಿರುವ ಪ್ರಯಾಣಿಕರಿಗೆ ಬೂಸ್ಟರ್ ಸೀಟ್‌ ಹೊಂದಿರಬೇಕು ಎಂಬ ನಿಯಮವಿದೆ. ಸಿಂಗಾಪುರದಲ್ಲಿ ಖಾಸಗಿ-ಬಾಡಿಗೆ ಕಾರುಗಳು, ಬುಕ್ಕಿಂಗ್ ಹಂತದಲ್ಲಿ ಬೂಸ್ಟರ್ ಸೀಟ್‌ ಅಗತ್ಯವಿದೆಯೇ ಎಂದು ಸೂಚಿಸಲು ಪ್ರಯಾಣಿಕರನ್ನು ಕೇಳುತ್ತಾರೆ. ಆದರೆ ಮಹಿಳೆ ಈ ಬಗ್ಗೆ ಕೇಳಿರಲಿಲ್ಲ ಎಂದು ಚಾಲಕ ಆರೋಪಿಸುತ್ತಾನೆ. ಡ್ರೈವರ್ ನೀವು ಭಾರತ, ನಾನು ಚೈನೀಸ್ … ನೀವು ಅತ್ಯಂತ ಕೆಟ್ಟ ರೀತಿಯವರು ಎಂದು ನಿಂದಿಸುವುದು ವಿಡಿಯೋದಲ್ಲಿದೆ.
ಘಟನೆ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ‘ವೇಕ್ ಅಪ್ ಸಿಂಗಾಪುರದ ಇನ್‌ಸ್ಟಾಗ್ರಾಮ್ ಘಟನೆಯ ಬಗ್ಗೆ ತನಿಖೆ ನಡೆಸುತ್ತಿದೆ ಎಂದು ಹೇಳಿದೆ. ” ನಾವು ವರ್ಣಭೇದ ನೀತಿ, ತಾರತಮ್ಯ ಅಥವಾ ನಿಂದನೆಯನ್ನು ಸಹಿಸುವುದಿಲ್ಲ. ನಮ್ಮ ತಂಡವು ಈ ವಿಷಯವನ್ನು ತನಿಖೆ ಮಾಡುತ್ತಿದೆ. ಇದನ್ನು ನಮ್ಮ ಗಮನಕ್ಕೆ ತಂದ ಎಲ್ಲರಿಗೂ ಧನ್ಯವಾದಗಳು” ಎಂದು ಕಾಮೆಂಟ್ ಹೇಳಿದೆ.
