ಸ್ಯಾನ್ ಫ್ರಾನ್ಸಿಸ್ಕೋ: ಮಾಧ್ಯಮ ಜಗತ್ತಿನ ದೊರೆ ರೂಪರ್ಟ್ ಮುರ್ಡೋಕ್ 92 ನೇ ವಯಸ್ಸಿನಲ್ಲಿಯೂ 66 ವರ್ಷದ ನಿವೃತ್ತ ವಿಜ್ಞಾನಿಯೊಂದಿಗೆ ಡೇಟಿಂಗ್ ಮಾಡುತ್ತಿದ್ದು ಎಲ್ಲರ ಹುಬ್ಬೇರಿಸುವಂತೆ ಮಾಡಿದೆ. ನಿವೃತ್ತ ವಿಜ್ಞಾನಿ ಎಲೆನಾ ಝುಕೋವಾ ಅವರೊಂದಿಗೆ ಡೇಟಿಂಗ್ ಮಾಡುತ್ತಿದ್ದಾರೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.
ರೂಪರ್ಟ್ ಮುರ್ಡೋಕ್ ಮತ್ತು ಎಲೆನಾ ಝುಕೋವಾ ಜೋಡಿಯಾಗಿ ಬೋಟ್ ಹೌಸ್ ನಲ್ಲಿ ರಜೆಯನ್ನು ಆನಂದಿಸುತ್ತಿದ್ದಾರೆ ಎಂದು ವದಂತಿಗಳಿವೆ. ರೂಪರ್ಟ್ ಮುರ್ಡೋಕ್ ಅವರ ಮೂರನೇ ಪತ್ನಿ ವೆಂಡಿ ಡೆಂಗ್ ಮೂಲಕ ಎಲೆನಾ ಪರಿಚಯವಾಯಿತು ಎಂದು ಹೇಳಲಾಗುತ್ತದೆ.
ಎಲೆನಾ ಝುಕೋವಾ (66) ಆನ್ವಯಿಕ ಜೀವಶಾಸ್ತ್ರಜ್ಞರಾಗಿ ಕೆಲಸದಿಂದ ನಿವೃತ್ತರಾದರು. ಅವರು ನಿವೃತ್ತರಾಗುವ ಮೊದಲು ಲಾಸ್ ಏಂಜಲೀಸ್‌ನ ಕ್ಯಾಲಿಫೋರ್ನಿಯಾ ವಿಶ್ವವಿದ್ಯಾಲಯದಲ್ಲಿ ಕ್ಲಿನಿಕಲ್ ಸಂಶೋಧನಾ ವಿಭಾಗದಲ್ಲಿ ಕೆಲಸ ಮಾಡಿದ್ದರು.
ವಿಚ್ಛೇದನದ ಕತೆ: ರೂಪರ್ಟ್ ಮುರ್ಡೋಕ್ ತನ್ನ ಮೊದಲ ಮೂವರು ಹೆಂಡತಿಯರಿಂದ ಆರು ಮಕ್ಕಳನ್ನು ಹೊಂದಿದ್ದಾರೆ. ಕೆಲ ವರ್ಷದ ಹಿಂದೆ ನಾಲ್ಕನೇ ಪತ್ನಿಗೆ ವಿಚ್ಛೇದನ ನೀಡಿದ್ದರು. 2016ರಲ್ಲಿ85 ನೇ ವಯಸ್ಸಿನಲ್ಲಿ ರೂಪರ್ಟ್ ಮುರ್ಡೋಕ್ 65 ವರ್ಷದ ಮಾಡೆಲ್‌ ಜೆರ್ರಿ ಹಾಲ್‌ ಅವರನ್ನು ವಿವಾಹವಾಗಿದ್ದರು. ಈ ದಾಂಪತ್ಯ ಜೀವನವು ಕೇವಲ 6 ವರ್ಷಗಳ ಕಾಲ ನಡೆಯಿತು. 2022ರಲ್ಲಿಇಬ್ಬರೂ ಬೇರ್ಪಟ್ಟರು.
