ಖಾರ್ಕಿವ್: ಉಕ್ರೇನ್ ನ ಎರಡನೇ ದೊಡ್ಡ ನಗರ ಖಾರ್ಕಿವ್ ನಲ್ಲಿ ಮಂಗಳವಾರ ನಡೆದ ಶೆಲ್ ದಾಳಿಯಲ್ಲಿ ಕನಿಷ್ಠ 10 ಜನರು ಸಾವನ್ನಪ್ಪಿದ್ದು, 35 ಮಂದಿ ಗಾಯಗೊಂಡಿರುವುದಾಗಿ ಉಕ್ರೇನ್ ನ ಒಳಾಡಳಿತ ಸಚಿವಾಲಯದ ಸಲಹೆಗಾರ ಆಂಟನ್ ಹೆರಾಶ್ಚೆಂಕೊ ಹೇಳಿದ್ದಾರೆ.
ಉಕ್ರೇನ್ ಸ್ಟೇಟ್ ಎಮರ್ಜೆನ್ಸಿ ಸರ್ವೀಸಸ್ ಕೂಡಾ ಇಂದು ಸಾಮಾಜಿಕ ಜಾಲತಾಣವೊಂದರಲ್ಲಿ ಫೋಸ್ಟ್ ವೊಂದನ್ನು ಮಾಡುವ ಮೂಲಕ ಸಾವಿನ ಸಂಖ್ಯೆಯನ್ನು ಖಚಿತಪಡಿಸಿದೆ. ರಕ್ಷಣಾ ಸಿಬ್ಬಂದಿ ಕೆಲಸ ಮಾಡುತ್ತಿದ್ದು, ಎಲ್ಲಾ ಮಹಡಿಗಳಲ್ಲಿನ ಮೆಟ್ಟಿಲುಗಳು ಮತ್ತು ಭಾಗಶ: ಕಾರಿಡಾರ್ ಗಳು ಸಂಪೂರ್ಣವಾಗಿ ನಾಶವಾಗಿರುವುದಾಗಿ ಪೋಸ್ಟ್ ನಲ್ಲಿ ಉಲ್ಲೇಖಿಸಲಾಗಿದೆ.
ರಷ್ಯಾದ ಕ್ರೂಸ್ ಕ್ಷಿಪಣಿ ಖಾರ್ಕಿವ್ ನ ಮಧ್ಯಭಾಗದಲ್ಲಿರುವ ಫ್ರೀಡಂ ಸ್ಕ್ವೇರ್ ಗೆ ಅಪ್ಪಳಿಸಿದೆ. ಐದಾರು ನಿಮಿಷದಲ್ಲಿ ರಕ್ಷಣಾ ಸಿಬ್ಬಂದಿ ಆಗಮಿಸಿದ ನಂತರ ಇದೇ ರೀತಿಯಲ್ಲಿ ಎರಡನೇ ರಾಕೆಟ್ ಕಟ್ಟಡವೊಂದಕ್ಕೆ ಅಪ್ಪಳಿಸಿದೆ. ಆಡಳಿತ ಕಟ್ಟಡದ ಮೂರನೇ ಒಂದು ಭಾಗ ಕುಸಿದಿದೆ ಎಂದು ಅವರು ತಿಳಿಸಿರುವುದಾಗಿ ವರದಿಯಾಗಿದೆ.
ಈ ಮಧ್ಯೆ ಉಕ್ರೇನ್ ನಲ್ಲಿನ ವಸತಿ ಪ್ರದೇಶಗಳು, ಮೂಲಸೌಕರ್ಯಗಳ ಮೇಲಿನ ದಾಳಿ ಕುರಿತ ವರದಿಯನ್ನು ರಷ್ಯಾದ ಅಧ್ಯಕ್ಷೀಯ ಪತ್ರಿಕಾ ಕಾರ್ಯದರ್ಶಿ ಡಿಮಿಟ್ರಿ ಪೆಸ್ಕೋವ್ ನಿರಾಕರಿಸಿದ್ದಾರೆ.