ಕೀವ್: ಉಕ್ರೇನ್ನ ಆಗ್ನೇಯ ಭಾಗದಲ್ಲಿರುವ ಮರಿಯುಪೋಲ್ ನಗರದ ರಂಗ ಮಂದಿರದಲ್ಲಿ ರಷ್ಯಾ ಬುಧವಾರ ಬಾಂಬ್ ದಾಳಿ ನಡೆಸಿದೆ.ಪರಿಣಾಮ 1300ಕ್ಕೂ ಹೆಚ್ಚು ಜನರು ಅವಶೇಷಗಳಡಿ ಸಿಲುಕಿದ್ದಾರೆಂದು ತಿಳಿದುಬಂದಿದೆ.ಉಕ್ರೇನ್ನ ಒಂಬುಡ್ಸ್‌ಮನ್ ಲ್ಯುಡ್ಮಿಲಾ ಡೆನಿಸೋವಾ ನೀಡಿರುವ ಮಾಹಿತಿ ಪ್ರಕಾರ, ದಾಳಿಯಲ್ಲಿ ಮರಿಯುಪೋಲ್ ಡ್ರಾಮಾ ಥಿಯೇಟರ್ ಅವಶೇಷಗಳಡಿ ಸಿಲುಕಿರುವ 130 ಜನರನ್ನು ರಕ್ಷಿಸಲಾಗಿದೆ ಎಂದು ಮಾಹಿತಿ ನೀಡಿದೆ.
ಇನ್ನೂ ಹೆಚ್ಚಿನ ಜನರು ಅವಶೇಷಗಳ ಅಡಿ ಸಿಲುಕಿಕೊಂಡಿದ್ದಾರೆ ಎಂದು ದಿ ಕೈವ್ ಇಂಡಿಪೆಂಡೆಂಟ್ ವರದಿ ಮಾಡಿದೆ ಎನ್ನಲಾಗುತ್ತಿದೆ.
ಉಕ್ರೇನ್ನ ಹಲವು ಜನ ಈ ಥಿಯೇಟರ್‌ನ ಅಂಡರ್ ಗ್ರೌಂಡ್‍ನಲ್ಲಿ ಆಶ್ರಯ ಪಡೆದಿದ್ದರು. ಇದನ್ನು ಗುರಿಯಾಗಿಸಿ ರಷ್ಯಾ ಸೇನೆ ದಾಳಿ ನಡೆಸಿದೆ ಎಂದು ಹೇಳಲಾಗುತ್ತಿದೆ.
ನಾಶವಾದ ಕಟ್ಟಡದ ಚಿತ್ರವನ್ನು ಹಂಚಿಕೊಂಡಿರುವ ಮರಿಯುಪೋಲ್ ಸಿಟಿ ಕೌನ್ಸಿಲ್, ರಷ್ಯಾದ ಪಡೆಗಳು ಮರಿಯುಪೋಲ್ ಹೃದಯಭಾಗದಲ್ಲಿರುವ ನಾಟಕ ರಂಗಮಂದಿರವನ್ನು ಉದ್ದೇಶಪೂರ್ವಕವಾಗಿ ನಾಶಪಡಿಸಿವೆ ಎಂದು ಹೇಳಿದೆ.
ಥಿಯೇಟರ್ ಮೇಲೆ ಬಾಂಬ್ ದಾಳಿಯಾಗುತ್ತಿದ್ದಂತೆ ದಟ್ಟ ಹೊಗೆ ಬರಲಾರಂಭಿಸಿದೆ. ಸಾವು – ನೋವುಗಳ ಸಂಖ್ಯೆಯನ್ನು ಸ್ಥಳೀಯ ಅಧಿಕಾರಿಗಳು ಇನ್ನೂ ಖಚಿತಪಡಿಸಿಲ್ಲ. ಅವಶೇಷಗಳಡಿ ಸಿಲುಕಿರುವವರ ರಕ್ಷಣಾ ಕಾರ್ಯ ಭರದಿಂದ ಸಾಗಿದೆ.
