ಮಾಸ್ಕೊ : ರಷ್ಯಾವು ಉಕ್ರೇನ್ ಮೇಲಿನ ಆಕ್ರಮಣವನ್ನು ಕಟುವಾಗಿ ವಿರೋಧಿಸುತ್ತಾ ಬಂದಿರುವ ಪೋಲ್ಯಾಂಡ್ ಮತ್ತು ಬಲ್ಗೇರಿಯಾಕ್ಕೆ ಅನಿಲ ಪೂರೈಕೆಯನ್ನು ಸ್ಥಗಿತಗೊಳಿಸಲಾಗಿದೆ ಎಂದು ರಷ್ಯಾ ಬುಧವಾರ ಹೇಳಿದೆ.
ಉಕ್ರೇನ್ ಮೇಲಿನ ಆಕ್ರಮಣದ ಹಿನ್ನೆಲೆಯಲ್ಲಿ ತನ್ನನ್ನು ವಿರೋಧಿಸುವವರ ವಿರುದ್ಧ ಅನಿಲವನ್ನು ಅಸ್ತ್ರವನ್ನಾಗಿ ಬಳಸಿಕೊಳ್ಳುತ್ತಿರುವ ರಷ್ಯಾದ ಬೃಹತ್ ಇಂಧನ ಸಂಸ್ಥೆ ಗಾರ್ಪ್ರೋಮ್, ಬುಧವಾರದಿಂದ ಪೋಲ್ಯಾಂಡ್ ಮತ್ತು ಬಲ್ಗೇರಿಯಾಕ್ಕೆ ಅನಿಲ ಪೂರೈಸುವುದಿಲ್ಲ ಎಂದು ಹೇಳಿದೆ.
ಉಕ್ರೇನ್ ನೆರೆರಾಷ್ಟ್ರ ಮೊಲ್ದೋವಾದಲ್ಲಿ ಸರಣಿ ಸ್ಫೋಟ ಸಂಭವಿಸಿದ ಬಳಿಕ ಹೇಳಿಕೆ ನೀಡಿದ್ದ ಉಕ್ರೇನ್, ರಷ್ಯಾವು ಯುದ್ಧವನ್ನು ಯುರೋಪ್ ಗೆ ವಿಸ್ತರಿಸಲು ಬಯಸುತ್ತಿದೆ ಎಂದು ಹೇಳಿತ್ತು. ಮೊಲ್ದೋವಾದ ಟ್ರಾನ್ಸ್ನಿಸ್ಟ್ರಿಯಾ ಪ್ರದೇಶದಲ್ಲಿ ರಶ್ಯನ್ ಭಾಷೆ ಮಾತನಾಡುವವರನ್ನು ದಮನಿಸಲಾಗುತ್ತಿದೆ ಎಂದು ರಷ್ಯಾದ ಸೇನಾ ಮುಖಂಡರು ಹೇಳಿಕೆ ನೀಡಿದ ಬೆನ್ನಲ್ಲೇ ಮೊಲ್ಡೋವಾದ ರೇಡಿಯೊ ಟವರ್, ಸೇನಾ ನೆಲೆ ಮತ್ತು ಭದ್ರತಾ ಇಲಾಖೆಯ ಕಚೇರಿಯನ್ನು ಗುರಿಯಾಗಿಸಿ ಸರಣಿ ಸ್ಫೋಟ ಸಂಭವಿಸಿತ್ತು.
ಇದು ಮೊಲ್ಡೋವಾದ ಮೇಲಿನ ದಾಳಿಯ ಮುನ್ಸೂಚನೆಯಾಗಿದೆ. ಯುದ್ಧವನ್ನು ಯುರೋಪ್ ನತ್ತ ವಿಸ್ತರಿಸಲು ರಷ್ಯಾ ಉದ್ದೇಶಿಸಿದೆ. ಟ್ರಾನ್ಸ್ನಿಸ್ಟ್ರಿಯಾದಲ್ಲಿ ಅಸ್ಥಿರತೆ ತರಲು ರಷ್ಯಾ ಪ್ರಯತ್ನಿಸುತ್ತಿದೆ . ಉಕ್ರೇನ್ ಕೈವಶವಾದರೆ ಮರುದಿನವವೇ ರಷ್ಯಾದ ಸೇನೆ ಮೋಲ್ದೋವ ರಾಜಧಾನಿಯ ಬಾಗಿಲಲ್ಲಿ ಇರುತ್ತದೆ ಎಂದು ಉಕ್ರೇನ್ ಅಧ್ಯಕ್ಷರ ಸಲಹೆಗಾರ ಮಿಖಾಯ್ಲೋ ಪೊಡೊಲ್ಯಾಕ್ ಟ್ವೀಟ್ ಮಾಡಿದ್ದಾರೆ.
ಮೊಲ್ಡೋವಾದಲ್ಲಿ ಸಂಭವಿಸಿದ ಸ್ಫೋಟಕ್ಕೆ ರಷ್ಯಾಹೊಣೆ ಎಂದು ಆರೋಪಿಸಿರುವ ಅಮೆರಿಕ, ಮೋಲ್ಡೊವಾದ ಪ್ರಾದೇಶಿಕ ಸಮಗ್ರತೆ ಮತ್ತು ಸಾರ್ವಭೌಮತೆಗೆ ಸಂಪೂರ್ಣ ಸಹಕಾರ ನೀಡುವುದಾಗಿ ಘೋಷಿಸಿದೆ.
