7 ನಾಯಿ ಮರಿಗಳಿಗೆ ವಿಷ ಉಣಿಸಿದ ವಿಕೃತ ವ್ಯಕ್ತಿ

ಗೋರಖ್ಪುರ: ಉತ್ತರ ಪ್ರದೇಶದ ಗೋರಖ್ಪುರದಲ್ಲಿ ಸ್ಥಳೀಯ ವ್ಯಾಪಾರಿಯೊಬ್ಬ ನಾಯಿ ಮತ್ತು ಅದರ ಏಳು ನಾಯಿಮರಿಗಳಿಗೆ ವಿಷ ಹಾಕಿ ನಂತರ ಅವುಗಳ ದೇಹಗಳನ್ನು ಸುಟ್ಟುಹಾಕಿದ ಭಯಾನಕ ಘಟನೆಯ ವೀಡಿಯೊ ಸಾಮಾಜಿಕ ಮಾಧ್ಯಮದಲ್ಲಿ  ವೈರಲ್ ಆಗಿದೆ.

ಇದರಿಂದ ಆಕ್ರೋಶಗೊಂಡ ಸ್ಥಳೀಯ ನಿವಾಸಿಗಳು ಗುರುವಾರ ಜಿಲ್ಲಾ ಪೊಲೀಸ್ ಘಟಕವನ್ನು ಸಂಪರ್ಕಿಸಿ ಆರೋಪಿ ವ್ಯಾಪಾರಿ ಗುರುಮುಖ್ ಗಂಗಾರಾಮ್ ವಿರುದ್ಧ ಐಪಿಸಿ ಸೆಕ್ಷನ್ 428 ಮತ್ತು 429 (ಕೊಲೆ, ವಿಷ, ಅಂಗವೈಕಲ್ಯ) ಅಡಿಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.

ಅಧಿಕಾರಿಗಳ ಪ್ರಕಾರ, ಗಂಗಾರಾಮ್ ಶಾಪಿಂಗ್ ಕಾಂಪ್ಲೆಕ್ಸ್ ನಲ್ಲಿ ಮೊಬೈಲ್ ಅಂಗಡಿ ನಡೆಸುತ್ತಿದ್ದಾರೆ. ಕಳೆದ ಶುಕ್ರವಾರ, ಅದೇ ಶಾಪಿಂಗ್ ಕಾಂಪ್ಲೆಕ್ಸ್ ನಲ್ಲಿ ನಾಯಿ ಏಳು ನಾಯಿಮರಿಗಳಿಗೆ ಜನ್ಮ ನೀಡಿತ್ತು.

ಇದರಿಂದ ಅಸಮಾಧಾನಗೊಂಡ ಗಂಗಾರಾಮ್  ನಾಯಿಗಳಿಗೆ ವಿಷಪೂರಿತ ಬಿಸ್ಕತ್ತು ನೀಡಿದ್ದ. ವಿಷಪೂರಿತ ಬಿಸ್ಕತ್ತುಗಳನ್ನು ಸೇವಿಸಿದ ನಂತರ ಎಲ್ಲಾ ನಾಯಿ ಮರಿಗಳು ಸ್ಥಳದಲ್ಲೇ ಸಾವನ್ನಪ್ಪಿದವು.

ತರುವಾಯ, ಗಂಗಾರಾಮ್ ನಾಯಿಗಳಿಗೆ ಬೆಂಕಿ ಹಚ್ಚಿದ್ದ. ಈ ಕೃತ್ಯವನ್ನು ದಾರಿಹೋಕರೊಬ್ಬರು ಚಿತ್ರೀಕರಿಸಿ ಅಂತರ್ಜಾಲದಲ್ಲಿ ಹರಿಬಿಟ್ಟಿದ್ದರು.