ಗಾಂಧಿನಗರ್: ಟಾಟಾ ಗ್ರೂಪ್ ಗುಜರಾತ್ನಲ್ಲಿ ಸೆಮಿಕಂಡಕ್ಟರ್ ಘಟಕ ಸ್ಥಾಪನೆಗೆ ಮುಂದಾಗಿದೆ. ಮೊನ್ನೆಯ ವೈಬ್ರೆಂಟ್ ಗುಜರಾತ್ ಗ್ಲೋಬಲ್ ಸಮಿಟ್ ಕಾರ್ಯಕ್ರಮದಲ್ಲಿ ಟಾಟಾ ಸಂಸ್ಥೆ ಈ ವಿಚಾರವನ್ನು ಘೋಷಿಸಿದೆ. ಗುಜರಾತ್ನ ಧೋಲೇರಾದಲ್ಲಿ ಸೆಮಿಕಂಡಕ್ಟರ್ ಫ್ಯಾಬ್ ಯೂನಿಟ್ ಸ್ಥಾಪಿಸುವುದಾಗಿ ಅದು ಹೇಳಿದೆ.
ಕೇಂದ್ರ ಎಲೆಕ್ಟ್ರಾನಿಕ್ಸ್ ಮತ್ತು ಐಟಿ ಸಚಿವ ಅಶ್ವಿನಿ ವೈಷ್ಣವ್ ಕೂಡ ಟಾಟಾ ಗ್ರೂಪ್ನ ಫ್ಯಾಕ್ಟರಿ ಪ್ರಸ್ತಾವವನ್ನು ಸ್ವಾಗತಿಸಿದ್ದಾರೆ. ಇದು ದೇಶಕ್ಕೆ ಬೇಕಾದ ಬಹಳ ಮುಖ್ಯ ಹೂಡಿಕೆ ಆಗಿದೆ ಎಂದು ವೈಷ್ಣವ್ ಬಣ್ಣಿಸಿದ್ದಾರೆ.
‘ಈ ವಿಚಾರದಲ್ಲಿ (ಟಾಟಾದಿಂದ ಸೆಮಿಕಂಡಕ್ಟರ್ ಸ್ಥಾಪನೆಯಾಗುವ ವಿಚಾರ) ಸಾಕಷ್ಟು ಬೆಳವಣಿಗೆ ಆಗಿದೆ. ಇದನ್ನು ಕ್ಯಾಬಿನೆಟ್ ಸಮ್ಮತಿಗೆ ತರಲಾಗುವುದು. ಸಂಪುಟದ ಅನುಮೋದನೆ ಬೇಕಾಗುತ್ತದೆ. ಅದು ಸಿಕ್ಕ ಬಳಿಕ ಫ್ಯಾಕ್ಟರಿ ನಿರ್ಮಾಣ ಆರಂಭ ಮಾಡಬಹುದು’ ಎಂದು ಸಚಿವ ವೈಷ್ಣವ್ ಹೇಳಿದ್ದಾರೆ.
ಟಾಟಾ ಗ್ರೂಪ್ ಹಾಗೇ ಸುಮ್ಮನೆ ಸೆಮಿಕಂಡಕ್ಟರ್ ಘಟಕ ತೆರೆಯಲು ಆಗುವುದಿಲ್ಲ. ಚಿಪ್ ಫ್ಯಾಕ್ಟರಿ ತೆರೆಯುವಂತಹ ತಂತ್ರಜ್ಞಾನ ಯಾವ ಭಾರತೀಯ ಕಂಪನಿಗೂ ಇಲ್ಲ. ಹೀಗಾಗಿ, ಟೆಕ್ನಿಕಲ್ ಪಾರ್ಟ್ನರ್ ಸಂಸ್ಥೆಯೊಂದು ಬೇಕಾಗುತ್ತದೆ. ಅದು ಸಿಕ್ಕ ಬಳಿಕವಷ್ಟೇ ಟಾಟಾ ಸಂಸ್ಥೆಗೆ ಫ್ಯಾಕ್ಟರಿ ಸ್ಥಾಪನೆಗೆ ಅವಕಾಶ ಸಿಗುತ್ತದೆ.
ಈ ಹಿಂದೆ ವೇದಾಂತ ಸಂಸ್ಥೆ ಕೂಡ ಚಿಪ್ ಉತ್ಪಾದನಾ ಘಟಕ ಸ್ಥಾಪಿಸಲು ಅರ್ಜಿ ಹಾಕಿತ್ತು. ಆದರೆ, ತಾಂತ್ರಿಕ ಸಹವರ್ತಿ ಸಂಸ್ಥೆ ಸಿಕ್ಕಿರಲಿಲ್ಲ. ಹೀಗಾಗಿ ಅದರ ಅರ್ಜಿಯನ್ನು ತಿರಸ್ಕರಿಸಲಾಗಿತ್ತು.