ನವದೆಹಲಿ : ವಿಶ್ವದಾದ್ಯಂತ ಆತಂಕ ಸೃಷ್ಟಿಸಿರುವ ಕೊರೊನಾ ರೂಪಾಂತರಿ ಒಮಿಕ್ರಾನ್ ವೈರಸ್ 2022 ರ ಜನವರಿ, ಫೆಬ್ರವರಿ ವೇಳೆಗೆ ಸೋಂಕಿನ ಪ್ರಕರಣಗಳಲ್ಲಿ ಹೆಚ್ಚಳವಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ.
ಈ ಕುರಿತು ಮಾಹಿತಿ ನೀಡಿರುವ ಸಾರ್ವಜನಿಕ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯ ನಿರ್ದೇಶಕ ಶ್ರೀನಿವಾಸ್ ರಾವ್, ಜನವರಿ 15ರ ನಂತರ ದೇಶದ ಹಲವು ಭಾಗಗಳಲ್ಲಿ ಒಮಿಕ್ರಾನ್ ವೈರಸ್ ನ ಪ್ರಕರಣಗಳು ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ತಿಳಿಸಿದ್ದು, ಒಮಿಕ್ರಾನ್ ರೂಪಾಂತರವು ವಾಕರಿಕೆ, ವಾಂತಿ ಮತ್ತು ತಲೆನೋವುಗಳಿಗೆ ಕಾರಣವಾಗಬಹುದು. ಆದರೆ ಈ ವೈರಸ್ ನಿಂದ ಆಸ್ಪತ್ರೆಗೆ ಸೇರುವ ಹಾಗೂ ಮೃತಪಡುವ ಸಾಧ್ಯತೆ ಕಡಿಮೆ ಇದೆ. ಆದರೂ ನಾವು ಎಚ್ಚರಿಕೆಯಿಂದ ಇರಬೇಕು ಎಂದು ಹೇಳಿದ್ದಾರೆ.
ದಕ್ಷಿಣ ಆಫ್ರಿಕಾದಲ್ಲಿ ಈಗಾಗಲೇ ಒಮಿಕ್ರಾನ್ ಸೋಂಕು ನಾಲ್ಕು ಪಟ್ಟು ತೀವ್ರತೆಯಲ್ಲಿ ಹೆಚ್ಚುತ್ತಿದ್ದು, 1 ವಾರದಿಂದ 10 ದಿನಗಳ ಅವಧಿಯಲ್ಲಿ 16 ಪಟ್ಟು ತೀವ್ರತೆಗೆ ಏರಿದೆ. ಒಮಿಕ್ರಾನ್ ಸೋಂಕು 10 ದೇಶಗಳಿಂದ 35 ದೇಶಗಳಲ್ಲಿ ಹಬ್ಬಿದ್ದು, 450-500 ಪ್ರಕರಣಗಳು ದಾಖಲಾಗಿವೆ.
ಇನ್ನು ಮುಂಬೈನಲ್ಲಿ ಕರೋನವೈರಸ್‌ನ ಓಮಿಕ್ರಾನ್ ರೂಪಾಂತರದ ಇನ್ನೂ ಎರಡು ಪ್ರಕರಣಗಳು ವರದಿಯಾಗಿದ್ದು, ರಾಜ್ಯದಲ್ಲಿ ಹೊಸ COVID-19 ರೂಪಾಂತರದ ಒಟ್ಟು ಸಂಖ್ಯೆ 10 ಕ್ಕೆ ಏರಿದೆ. ಇದರೊಂದಿಗೆ, ದೇಶದಲ್ಲಿ ವರದಿಯಾದ ಒಟ್ಟು ಒಮಿಕ್ರಾನ್ ಪ್ರಕಣಗಳ ಸಂಖ್ಯೆಯು 23 ಕ್ಕೆ ಏರಿಕೆಯಾಗಿದೆ.
