ಮುಂಬೈ: ಹಣದುಬ್ಬರದ ಮೇಲೆ ಬಿಗಿಯಾದ ಜಾಗರೂಕತೆಯನ್ನು ಕಾಯ್ದುಕೊಳ್ಳುತ್ತಿರುವ ಕಾರಣ ಭಾರತೀಯ ರಿಸರ್ವ್ ಬ್ಯಾಂಕ್ ಸತತ ಆರನೇ ಬಾರಿಗೆ ರೇಪೊ ದರವನ್ನು ಯಥಾಸ್ಥಿತಿಯಲ್ಲಿ ಮುಂದುವರೆಸಲು ನಿರ್ಧರಿಸಿದೆ. ಮೇ 2022 ರಿಂದ ಸತತ ಆರು ದರ ಏರಿಕೆಗಳ ನಂತರ 250 ಬೇಸಿಸ್ ಪಾಯಿಂಟ್‍ಗಳಿಗೆ ಒಟ್ಟುಗೂಡಿದ ನಂತರ ಕಳೆದ ವರ್ಷ ಏಪ್ರಿಲ್‍ನಲ್ಲಿ ದರ ಹೆಚ್ಚಳದ ಚಕ್ರವನ್ನು ವಿರಾಮಗೊಳಿಸಲಾಯಿತು.
ದ್ವೈಮಾಸಿಕ ವಿತ್ತೀಯ ನೀತಿಯನ್ನು ಪ್ರಕಟಿಸಿದ ಆರ್ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ಅವರು, ವಿತ್ತೀಯ ನೀತಿ ಸಮಿತಿ (ಎಂಪಿಸಿ) ರೆಪೊ ದರವನ್ನು ಶೇ. 6.5 ಕ್ಕೆ ಬದಲಾಯಿಸದೆ ಇರಿಸಲು ನಿರ್ಧರಿಸಲಾಗಿದೆ ಎಂದು ತಿಳಿಸಿದ್ದಾರೆ. ಎಂಪಿಸಿಯು ಆಹಾರ ಹಣದುಬ್ಬರದ ಮೇಲೆ ನಿಗಾ ಇಡುತ್ತದೆ, ಇದರಿಂದ ಗಳಿಸಿದ ಪ್ರಯೋಜನಗಳು ಹದಗೆಡುವುದಿಲ್ಲ ಎಂದು ಅವರು ಹೇಳಿದರು. ಕಳೆದ ವಾರ ಮಧ್ಯಂತರ ಬಜೆಟ್ 2024-25 ಮಂಡನೆ ನಂತರ ಇದು ಮೊದಲ ದ್ವೈಮಾಸಿಕ ನೀತಿಯಾಗಿದೆ.
ರೆಪೋ ದರ ಎಂಬುದು ವಾಣಿಜ್ಯ ಬ್ಯಾಂಕುಗಳಿಗೆ ಆರ್ಬಿಐ ನೀಡುವ ಸಾಲಕ್ಕೆ ವಿಧಿಸಲಾಗುವ ಬಡ್ಡಿದರವಾಗಿದೆ. ಈ ದರದಲ್ಲಿ ವ್ಯತ್ಯಯವಾದರೆ ಬ್ಯಾಂಕುಗಳೂ ಕೂಡ ತಮ್ಮ ಗ್ರಾಹಕರ ಸಾಲ ಅಥವಾ ಠೇವಣಿಗೆ ಬಡ್ಡಿದರ ಪರಿಷ್ಕರಿಸಬಹುದು. ಹೀಗಾಗಿ, ಆರ್ಬಿಐನ ರೆಪೋ ದರ ದೇಶದ ಹಣಕಾಸು ಕ್ಷೇತ್ರದ ಮೇಲೆ ಹಾಗೂ ಆ ಮೂಲಕ ಆರ್ಥಿಕತೆಯ ಮೇಲೆ ಪರಿಣಾಮ ಬೀರುತ್ತದೆ.
ಇನ್ನು ಹಣದುಬ್ಬರ ಇಳಿಕೆಯಾಗಿರಬಹುದು ಎಂದು ಆರ್ಬಿಐ ಇದೇ ವೇಳೆ ಸಿಹಿ ಸುದ್ದಿ ನೀಡಿದೆ. 2022-23ರ ಹಣಕಾಸು ವರ್ಷದಲ್ಲಿ ಶೇ. 6.7ರಷ್ಟಿದ್ದ ಹಣದುಬ್ಬರವು 2023-24ರಲ್ಲಿ ಏಪ್ರಿಲ್ನಿಂದ ಡಿಸೆಂಬರ್ವರೆಗಿನ ಅವಧಿಯಲ್ಲಿ ಶೇ. 5.5ಕ್ಕೆ ಇಳಿಕೆ ಆಗಿದೆ ಎಂದು ಶಕ್ತಿಕಾಂತ ದಾಸ್ ತಿಳಿಸಿದ್ದಾರೆ. 2023-24ರ ಇಡೀ ಹಣಕಾಸು ವರ್ಷದಲ್ಲಿ ಹಣದುಬ್ಬರ ಶೇ. 5.4ರಷ್ಟಿರಬಹುದು ಎಂದು ಆರ್ಬಿಐ ಅಂದಾಜು ಮಾಡಿದೆ.
