ಜೈಪುರ: ರಾಜಸ್ಥಾನದ ಕರಣಪುರ ವಿಧಾನಸಭಾ ಕ್ಷೇತ್ರಕ್ಕೆ ನಡೆದ ಉಪ ಚುನಾವಣೆಯಲ್ಲಿ ಕಾಂಗ್ರೆಸ್ ಅಭ್ಯರ್ಥಿ ರೂಪಿಂದರ್ ಸಿಂಗ್ ಕೂನರ್ ಅವರು ಸಚಿವ ಸುರೇಂದ್ರ ಪಾಲ್ ಸಿಂಗ್ ವಿರುದ್ಧ 11,283 ಮತಗಳಿಂದ ಭರ್ಜರಿ ಗೆಲುವು ಸಾಧಿಸಿದ್ದು, ಆಡಳಿತರೂಢ ಬಿಜೆಪಿ ತೀವ್ರ ಮುಖಭಂಗವಾಗಿದೆ.
ಮುಖ್ಯ ಚುನಾವಣಾ ಕಚೇರಿಯ ಪ್ರಕಾರ, ಕೂನರ್ 94,950 ಮತಗಳನ್ನು ಗಳಿಸಿದರೆ, ಸಿಂಗ್ 83,667 ಮತಗಳನ್ನು ಪಡೆದಿದ್ದಾರೆ. “ನನಗೆ ಮತ ನೀಡಿದ ಕರಣ್ಪುರದ ಜನರಿಗೆ ನಾನು ಕೃತಜ್ಞನಾಗಿದ್ದೇನೆ … ಕೇಂದ್ರ ಮಂತ್ರಿಗಳು ಸಹ ಪ್ರಚಾರಕ್ಕೆ ಬಂದಿದ್ದರು. ಆದರೆ ಜನ ಅವರನ್ನು ತಿರಸ್ಕರಿಸುವ ಮೂಲಕ ಪ್ರಜಾಪ್ರಭುತ್ವವನ್ನು ಗೆಲ್ಲುವಂತೆ ಮಾಡಿದರು” ಎಂದು ಗೆಲುವಿನ ನಂತರ ಕೂನರ್ ಅವರು ಸುದ್ದಿಗಾರರಿಗೆ ತಿಳಿಸಿದ್ದಾರೆ.
