ಅಮರಾವತಿ: ಆಂಧ್ರಪ್ರದೇಶದ ಕೋನಸೀಮಾ ಜಿಲ್ಲೆಯಲ್ಲಿ ಗೋದಾವರಿ ನದಿಗೆ ಮಹಿಳೆಯೊಬ್ಬರು ಹಾರಿದ್ದು, ಆಕೆಯ ಸಾಕುನಾಯಿ ರಾತ್ರಿಯಿಡಿ ಕಾಯುತ್ತಾ ಕುಳಿತಿದ್ದ ದೃಶ್ಯ ಜಾಲತಾಣದಲ್ಲಿ ವೈರಲ್ ಆಗಿದೆ. ಮಹಿಳೆ ನದಿಗೆ ಹಾರುವ ವೇಳೆ ಆಕೆ ಚಪ್ಪಲಿಗಳನ್ನು ದಡದಲ್ಲಿರಿಸಿ ಹಾರಿದ್ದು, ಅದನ್ನೇ ಕಾಯುತ್ತಾ ನಾಯಿ ಕುಳಿತಿದೆ.
22 ವರ್ಷದ ಯುವತಿ ಭಾನುವಾರ ಸಂಜೆ ಯಾನಂ ಮತ್ತು ಯದುರ್ಲಂಕಾ ನಡುವಿನ ಜಿಎಂಸಿ ಬಾಲಯೋಗಿ ಸೇತುವೆಯಿಂದ ನದಿಗೆ ಹಾರಿದ್ದಾರೆ. ಈ ಪ್ರದೇಶದಲ್ಲಿ ಸೂರ್ಯಾಸ್ತವನ್ನು ಆನಂದಿಸಲು ಹೆಚ್ಚಿನ ಸಂಖ್ಯೆಯ ಪ್ರವಾಸಿಗರು ಬರುತ್ತಿದ್ದ ವೇಳೆಯೇ ಘಟನೆ ಸಂಭವಿಸಿದೆ. ಸೇತುವೆ ಮೇಲೆ ಮುದ್ದಿನ ನಾಯಿಯೊಂದಿಗೆ ನಡೆದುಕೊಂಡು ಹೋಗುತ್ತಿದ್ದ ಮಹಿಳೆ ಇದ್ದಕ್ಕಿದ್ದಂತೆ ನದಿಗೆ ಹಾರಿದ್ದಾಳೆ. ದಾರಿಹೋಕರು ಬೊಬ್ಬೆ ಹಾಕಿದ ಬಳಿಕ ಮೀನುಗಾರರು ಆಕೆಯನ್ನು ರಕ್ಷಿಸಲು ಪ್ರಯತ್ನಿಸಿದ್ದಾರೆ. ಆದರೆ ಪ್ರವಾಹ ಹೆಚ್ಚಿದ್ದ ಕಾರಣ ರಕ್ಷಣೆ ಸಾಧ್ಯವಾಗಿಲ್ಲ.
ಆದರೆ ತನ್ನ ಮಾಲೀಕರು ವಾಪಸ್ ಬರಬಹುದೆಂದು ರಾತ್ರಿಯಿಡಿ ನಾಯಿ ಕಾಯುತ್ತಾ ಕುಳಿತಿತ್ತು. ಸೋಮವಾರ ಬೆಳಗ್ಗೆ ಮೃತ ಯುವತಿಯ ತಾಯಿ ಅದನ್ನು ಮನೆಗೆ ಕರೆದುಕೊಂಡು ಹೋಗಿದ್ದಾರೆ.