ನವದೆಹಲಿ, ನ. 22 : ಕಳೆದ 538 ದಿನಗಳಲ್ಲೇ ಇಂದು ದೇಶದಲ್ಲಿ ಕೊರೊನಾ ಸೋಂಕಿತರ ಸಂಖ್ಯೆ ಗಣನೀಯವಾಗಿ ತಗ್ಗಿದ್ದು ಕಳೆದ 24 ಗಂಟೆಗಳಲ್ಲಿ 8488 ಮಂದಿಯಲ್ಲಿ ಹೊಸದಾಗಿ ಸೋಂಕು ಕಾಣಿಸಿಕೊಳ್ಳುವ ಮೂಲಕ ಇದುವರೆಗೂ 3,45,18,901 ಮಂದಿ ಸೋಂಕಿಗೆ ಒಳಗಾಗಿದ್ದಾರೆ ಎಂದು ಕೇಂದ್ರ ಆರೋಗ್ಯ ಇಲಾಖೆ ಸಚಿವಾಲಯದ ಮೂಲಗಳು ತಿಳಿಸಿವೆ.
ಕಳೆದ 24 ಗಂಟೆಗಳಲ್ಲಿ ಸೋಂಕಿನಿಂದ 249 ಮಂದಿ ಸಾವನ್ನಪ್ಪಿದ್ದು ಇದರ ಸಂಖ್ಯೆಯು 4,65,911ಕ್ಕೆ ಮುಟ್ಟಿದೆ. ಆಶಾದಾಯಕ ವಿಷಯವೆಂದರೆ ಸೋಂಕಿನಿಂದ ಚೇತರಿಸಿಕೊಳ್ಳುತ್ತಿರುವವರ ಸಂಖ್ಯೆಯೂ ಹೆಚ್ಚಾಗಿದ್ದು ಕಳೆದ 24 ಗಂಟೆಗಳಲ್ಲಿ 12,510 ಮಂದಿ ಗುಣಮುಖರಾಗುವ ಮೂಲಕ ಇದುವರೆಗೂ 3,39,34,547 ಮಂದಿ ಚೇತರಿಸಿಕೊಳ್ಳುವ ಮೂಲಕ ದೇಶದಲ್ಲಿ 1,18,443 ಸಕ್ರಿಯ ಪ್ರಕರಣಗಳಿವೆ ಎಂದ ಕೇಂದ್ರ ಆರೋಗ್ಯ ಇಲಾಖೆ ಮೂಲಗಳು ತಿಳಿಸಿವೆ.
ದೇವರ ನಾಡೆಂದೇ ಬಿಂಬಿತಗೊಂಡಿರುವ ಕೇರಳದಲ್ಲಿ ಕೊರೊನಾ ಸೋಂಕಿನ ಪ್ರಮಾಣ ಹೆಚ್ಚಾಗಿದ್ದು ಕಳೆದ 24 ಗಂಟೆಗಳಲ್ಲಿ 5080 ಹೊಸ ಪ್ರಕರಣಗಳು ದಾಖಲಾಗಿದ್ದರೆ, ತಮಿಳುನಾಡಿನಲ್ಲಿ 756, ಪಶ್ಚಿಮ ಬಂಗಾಳದಲ್ಲಿ 727, ಮಹಾರಾಷ್ಟ್ರದಲ್ಲಿ 298 ಹಾಗೂ ಕರ್ನಾಟಕದಲ್ಲಿ 247 ಕೇಸುಗಳು ಪತ್ತೆಯಾಗಿವೆ.
ಕೊರೊನಾ ಮಹಾಮಾರಿಯಿಂದ ಜನರನ್ನು ರಕ್ಷಿಸಲು ನೀಡುತ್ತಿರುವ ಲಸಿಕೆಯ ವೇಗವನ್ನು ಕೂಡ ಹೆಚ್ಚಿಸಲಾಗಿದ್ದು ಕಳೆದ 24 ಗಂಟೆಗಳಲ್ಲಿ 32,99,337 ಮಂದಿಗೆ ಲಸಿಕೆ ನೀಡಿದ್ದರೆ, ಇದುವರೆಗೂ 1,16,87,28,385 ಮಂದಿಗೆ ಲಸಿಕೆ ನೀಡಲಾಗಿದೆ ಎಂದು ಐಸಿಎಂಆರ್ ವರದಿ ಮಾಡಿದೆ.
ಕಳೆದ 24 ಗಂಟೆಗಳಲ್ಲಿ 7,83,567 ಮಂದಿಯನ್ನು ಕೊರೊನಾ ಪರೀಕ್ಷೆಗೆ ಒಳಪಡಿಸಲಾಗಿದೆ.