6ತಿಂಗಳ ನಂತರ ನ್ಯೂಜಿಲೆಂಡ್ ನಲ್ಲಿ ಕಾಣಿಸಿದೆ ಕೊರೋನಾ : ಮೂರು ದಿನಗಳ ಕಾಲ ಸಂಪೂರ್ಣ ದೇಶ ಲಾಕ್ ಡೌನ್

ನ್ಯೂಜಿಲೆಂಡ್ : 6 ತಿಂಗಳ ನಂತರ ನ್ಯೂಜಿಲೆಂಡ್‌ ನಲ್ಲಿ ಮೊದಲ ಕೊರೋನ ಪ್ರಕರಣ ಬೆಳಕಿಗೆ ಬಂದಿದೆ. ಕೊರೋನಾದ ಈ ಪ್ರಕರಣವು ಪತ್ತೆಯಾದ ನಂತರ ನ್ಯೂಜಿಲೆಂಡ್ ಪ್ರಧಾನಿ ಜೈಸಿಂಡಾ ಅರ್ಡೆನ್ ದೇಶಾದ್ಯಂತ ಮೂರು ದಿನಗಳ ಲಾಕ್‌ ಡೌನ್ ಘೋಷಿಸಿದ್ದಾರೆ.
ಕೊರೋನಾದ ಈ ಪ್ರಕರಣ ಮಂಗಳವಾರ ನ್ಯೂಜಿಲೆಂಡ್‌ ನ ಆಕ್ಲೆಂಡ್‌ ನಲ್ಲಿ ಬೆಳಕಿಗೆ ಬಂದಿದೆ. ಅದರ ನಂತರ ದೇಶಾದ್ಯಂತ ಮೂರು ದಿನಗಳ ಲಾಕ್‌ ಡೌನ್ ಘೋಷಿಸಲಾಗಿದೆ. ಆಕ್ಲೆಂಡ್‌ ನಲ್ಲಿ ಕಂಡುಬಂದಿರುವ ಈ ಪ್ರಕರಣವು ಕೊರೋನಾದ ಡೆಲ್ಟಾ ರೂಪಾಂತರದ್ದಾಗಿರಬಹುದು ಎಂದು ಅಲ್ಲಿನ ಜನತೆ ಗಾಬರಿಯಾಗಿದ್ದಾರೆ ಎನ್ನಲಾಗಿದೆ.
ನ್ಯೂಜಿಲ್ಯಾಂಡ್ ಪ್ರಧಾನಿ ಜೈಸಿಂಡಾ ಅರ್ಡೆನ್ ವೆಲ್ಲಿಂಗ್ಟನ್‌ ನಲ್ಲಿ ಸುದ್ದಿಗೋಷ್ಠಿ ನಡೆಸಿ ಲಾಕ್‌ ಡೌನ್ ಘೋಷಿಸಿದ್ದಾರೆ. ಅದೇ ಸಮಯದಲ್ಲಿ ಆಕ್ಲೆಂಡ್‌ ಮತ್ತು ಹತ್ತಿರದ ಕೋರಮಂಡಲ್‌ ನಲ್ಲಿ (ಸೋಂಕಿತ ವ್ಯಕ್ತಿ ಹೋದ ಸ್ಥಳಕ್ಕೆ) ಏಳು ದಿನಗಳ ಲಾಕ್‌ ಡೌನ್ ಘೋಷಿಸಲಾಗಿದೆ. ನ್ಯೂಜಿಲೆಂಡ್‌ ನಲ್ಲಿ ಈ ಲಾಕ್‌ ಡೌನ್ ಸಮಯದಲ್ಲಿ ಶಾಲೆಗಳು, ಸಾರ್ವಜನಿಕ ಸ್ಥಳಗಳು ಮುಚ್ಚಲ್ಪಡುತ್ತಿದ್ದು, ವ್ಯವಹಾರಗಳು ಸ್ಥಗಿತಗೊಳ್ಳಲಿದೆ. ಈ ಲಾಕ್‌ ಡೌನ್‌ ನಲ್ಲಿ ಅಗತ್ಯ ಸೇವೆಗಳಿಗೆ ಮಾತ್ರ ಅನುಮತಿಸಲಾಗಿದೆ. ಜನರಿಗೆ ಮನೆಯಿಂದಲೇ ಕೆಲಸ ಮಾಡುವಂತೆ ಸೂಚಿಸಲಾಗಿದೆ. ಮತ್ತೊಂದೆಡೆ ಹೊರಗೆ ಹೋಗಲು ಅಗತ್ಯವಿದ್ದಲ್ಲಿ ಮಾಸ್ಕ್ ಗಳನ್ನು ಬಳಸಲು ಮನವಿಯನ್ನು ಮಾಡಲಾಗಿದೆ ಎಂದು ಮಾಧ್ಯಮವೊಂದು ವರದಿ ಮಾಡಿದೆ.