ನವದೆಹಲಿ: ಅಂತರ್ ಧರ್ಮೀಯ ವಿವಾಹವಾದರೆ ಹುಡುಗಿಯು ತನ್ನ ಧರ್ಮವನ್ನು ಬಿಟ್ಟು ಪತಿಯ ಧರ್ಮವನ್ನು ಸ್ವೀಕರಿಸಬೇಕೆಂದು ಯಾವುದೇ ಕಾನೂನು ಹೇಳಿಲ್ಲ ಎಂದು ಸುಪ್ರೀಂ ಕೋರ್ಟ್ ನ ಐದು ಮಂದಿ ನ್ಯಾಯಾಧೀಶರನ್ನು ಒಳಗೊಂಡಿರುವ ಸಂವಿಧಾನ ಪೀಠವು ಹೇಳಿದೆ.
ಯಾವುದೇ ಕಾನೂನಿನಲ್ಲಿ ಮಹಿಳೆಯು ಅಂತರ್ ಧರ್ಮೀಯ ವಿವಾಹವಾದ ಬಳಿಕ ತನ್ನ ಧರ್ಮ ತ್ಯಜಿಸಬೇಕು ಎಂದು ಹೇಳಿಲ್ಲ. ಅಂತರ್ ಧರ್ಮೀಯ ವಿಶೇಷ ವಿವಾಹ ಕಾಯ್ದೆಯಂತೆ ಅಂತರ್ ಧರ್ಮೀಯರು ಮದುವೆಯಾಬಹುದು ಮತ್ತು ಮೂಲ ಧರ್ಮವನ್ನು ಉಳಿಸಿಕೊಳ್ಳಬಹುದು ಎಂದು ಹೇಳಿದೆ ಎಂದು ನ್ಯಾಯಪೀಠವು ತಿಳಿಸಿದೆ.
ಪಾರ್ಸಿ ಮಹಿಳೆಯಾಗಿದ್ದ ಗೂಲ್ರೊಕ್ ಎಂ. ಗುಪ್ತಾ ಎಂಬ ಮಹಿಳೆ ಹಿಂದೂವನ್ನು ಮದುವೆಯಾಗಿದ್ದಳು. ಅನ್ಯ ಧರ್ಮದವನನ್ನು ಮದುವೆಯಾದ ಕಾರಣ ಆಕೆಗೆ ತನ್ನ ಪೋಷಕರ ಅಂತ್ಯ ಸಂಸ್ಕಾರದಲ್ಲಿ ಭಾಗಿಯಾಗಲು ಬಿಡಬಾರದು ಎಂದು ವಲ್ಸದ್ ಪಾರ್ಸಿ ಟ್ರಸ್ಟ್ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ನಡೆಸಿದ ಸುಪ್ರೀಂ ಕೋರ್ಟ್ ನ ನ್ಯಾಯ ಪೀಠವು ಈ ತೀರ್ಪು ನೀಡಿದೆ.
ಹಿಂದೂ ಧರ್ಮದವನನ್ನು ಮದುವೆಯಾದ ಕಾರಣದಿಂದಾಗಿ ಮಹಿಳೆಯು ತನ್ನ ಧರ್ಮದ ಧಾರ್ಮಿಕ ವಿಧಿವಿಧಾನಗಳಲ್ಲಿ ಭಾಗಿಯಾಗುವಂತಿಲ್ಲ ಎಂದು 2010ರಲ್ಲಿ ಗುಜರಾತ್ ಹೈಕೋರ್ಟ್ ತೀರ್ಪು ನೀಡಿತ್ತು. ಇದನ್ನು ಗುಲ್ರೊಕ್ ಗುಪ್ತಾ ಸುಪ್ರೀಂಕೋರ್ಟ್ ನಲ್ಲಿ ಪ್ರಶ್ನಿಸಿದ್ದರು.