ಚೀನಾದ ಸಶಸ್ತ್ರ ಪಡೆಗಳು ತೈವಾನ್‌ನ ಪ್ರಮುಖ ಬಂದರುಗಳು ಮತ್ತು ವಿಮಾನ ನಿಲ್ದಾಣಗಳನ್ನು ವಶಕ್ಕೆ ಪಡೆಯಬಹುದು ಎನ್ನುವ ಆತಂಕವನ್ನು ತೈವಾನ್ ವ್ಯಕ್ತಪಡಿಸಿದೆ.
ಪ್ರಜಾಸತ್ತಾತ್ಮಕ ತೈವಾನ್‌ನ್ನು ತನ್ನ ನಿಯಂತ್ರಣಕ್ಕೆ ತರುವ ಚೀನಾದ ಪ್ರಯತ್ನ ಎಂದಿಗೂ ಕಡಿಮೆಯಾಗಿಲ್ಲ. ತೈವಾನ್‌ನ ವಾಯು ರಕ್ಷಣಾ ವಲಯಕ್ಕೆ ಪದೇ ಪದೆ ಯುದ್ಧ ವಿಮಾನಗಳನ್ನು ಹಾರಿಸುವುದು ಹಾಗೂ ದ್ವೀಪದ ಸುತ್ತಮುತ್ತ ಮಿಲಿಟರಿ ಚಟುವಟಿಕೆಯನ್ನು ಚೀನಾ ಹೆಚ್ಚು ಮಾಡುತ್ತಿದೆ.
ಈ ಹಿಂದೆ ಚೀನಾ ವಾಯು ರಕ್ಷಣಾ ಗುರುತಿಸುವಿಕೆಯ ವಲಯದಲ್ಲಿ ಚೀನೀ ಯುದ್ಧ ವಿಮಾನಗಳನ್ನು ಒಳನುಗ್ಗಿಸಿತ್ತು. ಈ ಹಿನ್ನೆಲೆಯಲ್ಲಿ ತೈವಾನ್‌ನ ರಕ್ಷಣಾ ಸಚಿವಾಲಯವು ತನ್ನ ವರದಿಯಲ್ಲಿ ಚೀನಾ ಗ್ರೇ ಝೋನ್ ಎಂಬ ಯುದ್ಧವನ್ನು ಈಗಾಗಲೇ ಆರಂಭಿಸಿದೆ ಎಂದು ಹೇಳಿಕೊಂಡಿದೆ.
ಚೀನಾದ ಪೀಪಲ್ಸ್ ಲಿಬರೇಶನ್ ಆರ್ಮಿ (ಪಿಎಲ್‌ಎ) 2035 ವೇಳೆಗೆ ತನ್ನ ಪಡೆಗಳ ಆಧುನೀಕರಣ ಪೂರ್ಣಗೊಳಿಸುವ ಗುರಿ ಹೊಂದಿದೆ. ತೈವಾನ್ ವಿರುದ್ಧದ ಸಂಭವನೀಯ ಕಾರ್ಯಾಚರಣೆಗಳಲ್ಲಿ ಶ್ರೇಷ್ಠತೆ ಕಾಯ್ದುಕೊಳ್ಳಲು, ವಿದೇಶಿ ಪಡೆಗಳು ತೈವಾನ್‌ನ ಸಹಾಯಕ್ಕೆ ಬಂದರೂ, ಅವುಗಳನ್ನು ಮೀರಿಸುವ ಸಾಮರ್ಥ್ಯ ಪಡೆಯುವಲ್ಲಿ ಚೀನಾ ತನ್ನ ಬಲವನ್ನು ವೃದ್ಧಿಸಿಕೊಳ್ಳಲಿದೆ. ಇದು ನಮ್ಮ ರಾಷ್ಟ್ರೀಯ ಭದ್ರತೆಗೆ ಗಂಭೀರ ಸವಾಲನ್ನು ಒಡ್ಡಲಿದೆ ಎಂದು ತೈವಾನ್ ಸಚಿವಾಲಯ ತಿಳಿಸಿದೆ.
ಪ್ರಸ್ತುತ ಪಿಎಲ್‌ಎಗೆ ನಮ್ಮ ನಿರ್ಣಾಯಕ ಬಂದರುಗಳು, ವಿಮಾನನಿಲ್ದಾಣಗಳು ಮತ್ತು ಹೊರಹೋಗುವ ವಿಮಾನ ಮಾರ್ಗಗಳ ವಿರುದ್ಧ ಜಂಟಿ ದಿಗ್ಭಂದನ ಹಾಕುವ ಆತಂಕವಿದೆ. ಅಲ್ಲದೇ ನಮ್ಮ ವಾಯು ಮತ್ತು ಸಮುದ್ರ ಸಂವಹನ ಕಡಿತಗೊಳಿಸಿ, ಮಿಲಿಟರಿ ಸರಬರಾಜಿನ ಮೇಲೂ ಚೀನಾ ಪರಿಣಾಮ ಬೀರಲಿದೆ ಎಂದು ಸಚಿವಾಲಯ ತಿಳಿಸಿದೆ.
