ಥಾಯ್ಲೆಂಡ್: ಕಳೆದ ಎರಡು ವಾರಗಳಿಂದ ಥಾಯ್ಲೆಂಡ್ ನ ಗುಹೆಯಲ್ಲಿ ಸಿಲುಕಿದ್ದ ಫುಟ್ಬಾಲ್ ತಂಡದ 12 ಮಂದಿ ಆಟಗಾರರು ಮತ್ತು ಕೋಚ್ ನ್ನು ಸುರಕ್ಷಿತವಾಗಿ ಹೊರತರಲಾಗಿದೆ ಎಂದು ವರದಿಗಳು ಹೇಳಿವೆ.
ಥಾಯ್ಲೆಂಡ್ ನ ನೇವಿ ಸೀಲ್ ತಂಡವು ರಕ್ಷಣಾ ಕಾರ್ಯಾಚರಣೆಯಲ್ಲಿ ತೊಡಗಿದ್ದು, ಮಂಗಳವಾರ ರಕ್ಷಣಾ ಕಾರ್ಯವು ಪೂರ್ಣಗೊಂಡಿದೆ ಎಂದು ವರದಿಗಳು ತಿಳಿಸಿವೆ.
12 ಮಂದಿ ಬಾಲಕರು ಮತ್ತು ಅವರ ಕೋಚ್ ನ್ನು ಗುಹೆಯಿಂದ ಹೊರತರಲಾಗಿದೆ ಮತ್ತು ಅವರು ಸುರಕ್ಷಿತವಾಗಿದ್ದಾರೆ ಎಂದು ಥಾಯ್ಲೆಂಡ್ ನ ನೇವಿ ಸೀಲ್ ಹೇಳಿದೆ.
ಜೂನ್ 23ರಂದು ವೈಲ್ಡ್ ಬೋಯರ್ಸ್ ತಂಡದ 12 ಮಂದಿ ಆಟಗಾರರು ಮತ್ತು ಕೋಚ್ ಥಾಯ್ಲೆಂಡ್ ನ ಚಿಯಾಂಗ್ ರಾಯ್ ನ ಉತ್ತರ ಪ್ರಾಂತ್ಯದಲ್ಲಿರುವ ಗುಹೆಯೊಳಗೆ ಹೋಗಿ ಸಿಲುಕಿಕೊಂಡಿದ್ದರು. ಭಾರೀ ಮಳೆಯಾಗಿ ಪ್ರವಾಹ ಉಂಟಾದ ಪರಿಣಾಮ ಹೊರಬರಲು ಸಾಧ್ಯವಾಗಿರಲಿಲ್ಲ.
ಬ್ರಿಟನ್ ನಿಂದ ಬಂದ ಈಜುಗಾರರು 13 ಮಂದಿ ಗುಹೆಯೊಳಗೆ ಜೀವಂತವಾಗಿದ್ದಾರೆ ಎಂದು ಕಳೆದ ಸೋಮವಾರ ಪತ್ತೆ ಹಚ್ಚಿದ್ದರು. ಇದರ ಬಳಿಕ ಅವರಿಗೆ ಆಹಾರ ತಲುಪಿಸುವ ಕಾರ್ಯ ನಡೆದಿತ್ತು. ರಕ್ಷಣಾ ಕಾರ್ಯ ಆರಂಭಿಸಲಾಗಿತ್ತಾದರೂ ಪ್ರವಾಹದಿಂದಾಗಿ ವಿಳಂಬವಾಗಿತ್ತು. ಭಾನುವಾರ ನಾಲ್ಕು ಮಂದಿಯನ್ನು ರಕ್ಷಿಸಿದ್ದರು. ಸೋಮವಾರ ಮತ್ತೆ ನಾಲ್ಕು ಮಂದಿಯನ್ನು ರಕ್ಷಿಸಲಾಗಿತ್ತು. ಮಂಗಳವಾರ ಕೋಚ್ ಮತ್ತು ಉಳಿದ ನಾಲ್ಕು ಮಂದಿಯನ್ನು ಹೊರತರಲಾಗಿದೆ.