ಭಟ್ಕಳ: ಪುರಾಣ ಪ್ರಸಿದ್ಧ ಮುರುಡೇಶ್ವರದಲ್ಲಿ ಸೂರ್ಯಾಸ್ತದ ಬಳಿಕ ನಡೆದ ಸಮುದ್ರ ಆರತಿ ಧಾರ್ಮಿಕ ವೈಭವದ ನೋಟ ನೀಡಿತು. ಮಾತೋಬಾರ ಶ್ರೀ ಮುರುಡೇಶ್ವರ ದೇವಾಲಯ ಹಾಗೂ ಊರ ಸೀಮಾ ಸಮಿತಿಯ ಆಶ್ರಯದಲ್ಲಿ ನಡೆದ ಈ ಕಾರ್ಯಕ್ರಮಕ್ಕೆ ಸಾವಿರಾರು ಭಕ್ತರು ಸಾಕ್ಷಿಯಾದರು.
ಶತರುದ್ರೀಯ ಅನುಷ್ಠಾನ, ತೀರ್ಥ ಹೋಮ, ರುದ್ರ ಕಲಾಭಿಷೇಕ ಸೇರಿದಂತೆ ವಿವಿಧ ಪೂಜೆ-ವಿಧಿವಿಧಾನಗಳು ನೆರವೇರಿದವು. ಸಂಜೆ 6ಕ್ಕೆ ತೀರ್ಥ ಕುಂಭ ಮೆರವಣಿಗೆ ಗ್ರಾಮೀಣರ ಉತ್ಸಾಹಭರಿತ ಭಾಗವಹಿಸುವಿಕೆಯಿಂದ ಓಲಗ ಮಂಟಪದವರೆಗೆ ಸಾಗಿತು. ಬಳಿಕ ಸಮುದ್ರ ತೀರದಲ್ಲಿ ಆರತಿ ಜರುಗಿ ಭಕ್ತರ ಮನಸ್ಸಿಗೆ ಭಕ್ತಿ ಸ್ಪಂದನ ತುಂಬಿತು.
ಆರತಿಯ ನಂತರ ಹಮ್ಮಿಕೊಂಡ ವಾದ್ಯ ಸಂಗೀತ ಹಾಗೂ ನೃತ್ಯ ಕಾರ್ಯಕ್ರಮಗಳು ಜನರನ್ನು ರಂಜಿಸಿತು. ರಾಜ್ಯದ ನಾನಾ ಭಾಗಗಳಿಂದ ಆಗಮಿಸಿದ್ದ ಭಕ್ತಾದಿಗಳು ಸಮುದ್ರ ಆರತಿಯ ಧಾರ್ಮಿಕ ಸಂಭ್ರಮವನ್ನು ಅನುಭವಿಸಿದರು.
ಪೂಜೆ-ವಿಧಿವಿಧಾನಗಳನ್ನು ಪ್ರಧಾನ ಅರ್ಚಕ ಜಯರಾಮ ಅಡಿ ಹಾಗೂ ಶಿವರಾಮ ಅಡಿ ನೆರವೇರಿಸಿದರು. ಜಿಲ್ಲಾ ಉಸ್ತುವಾರಿ ಸಚಿವ ಮಂಕಾಳ ವೈದ್ಯ, ಪುಷ್ಪಲತಾ ವೈದ್ಯ, ಬೀನಾ ವೈದ್ಯ, ತಹಸೀಲ್ದಾರ್ ನಾಗೇಂದ್ರ ಕೋಳಶೆಟ್ಟಿ, ದೇವಾಲಯದ ವ್ಯವಸ್ಥಾಪಕ ಮಂಜುನಾಥ ಶೆಟ್ಟಿ, ಎಸ್.ಎಸ್. ಕಾಮತ್,
ಸುಬ್ರಾಯ ನಾಯ್ಕ, ಮಂಜುನಾಥ ನಾಯ್ಕ, ಶಂಕರ ಭಟ್ರಹಿಟ್ಟು, ನಯನಾ ನಾಯ್ಕ, ನಾಗರತ್ನ ಪಡಿಯಾರ, ಕೃಷ್ಣ ನಾಯ್ಕ, ಗಣೇಶ ಹರಿಕಾಂತ ಮೊದಲಾದ ಗಣ್ಯರು ಕಾರ್ಯಕ್ರಮದಲ್ಲಿ ಹಾಜರಿದ್ದರು. ಅಲೆಗಳಿಗೆ ಆರತಿ ಬೆಳಗಿದ ಕ್ಷಣ – ಭಕ್ತರ ಹೃದಯದಲ್ಲಿ ಅಳಿಸಲಾಗದ ನೆನಪು ಮೂಡಿತು.