ಅತ್ಯಾಚಾರವಾಗದಂತೆ ಸಮಾಧಿಗೆ ಬೀಗ: ಪಾಕ್‌ನದ್ದಲ್ಲ ಹೈದ್ರಾಬಾದ್‌ನದ್ದು

ಹೈದರಾಬಾದ್: ಪಾಕ್‌ನಲ್ಲಿ ಮೃತಪಟ್ಟ ಹೆಣ್ಣು ಮಕ್ಕಳ ಸಮಾಧಿಯನ್ನು ಬೀಗ ಹಾಕಿ ಭದ್ರಪಡಿಸಿರುವ ಚಿತ್ರ ಪಾಕಿಸ್ತಾನದ್ದಲ್ಲ ಬದಲಿ ಹೈದರಾಬಾದ್‌ ನಗರದ್ದು ಎಂದು ಸ್ಥಳೀಯ ವ್ಯಕ್ತಿಯೊಬ್ಬರು ಹೇಳಿದ್ದಾರೆ. ಪಾಕಿಸ್ತಾನದಲ್ಲಿ ಪೋಷಕರು ತಮ್ಮ ಹೆಣ್ಣುಮಕ್ಕಳ ಸಮಾಧಿಯನ್ನು “ಅತ್ಯಾಚಾರಕ್ಕೆ ಒಳಗಾಗದಂತೆ ರಕ್ಷಿಸಲು” ಬೀಗಗಳಿಂದ ಭದ್ರಪಡಿಸುತ್ತಿದ್ದಾರೆ ಎಂದು ವರದಿಯಾಗಿತ್ತು.

ಆದರೆ, ಕಳೆದ ವರ್ಷ ಹೈದರಾಬಾದ್‌ನ ಹಳೇ ನಗರದ ಮಾದನ್ನಪೇಟೆ ಪ್ರದೇಶದ ಸ್ಮಶಾನದಲ್ಲಿ ಬೀಗ ಹಾಕಿದ ಸಮಾಧಿಯನ್ನು ನೋಡಿದ್ದರು. ಅವರು ಭಾನುವಾರ ಅದೇ ಸ್ಥಳಕ್ಕೆ ಭೇಟಿ ನೀಡಿ ಸಾಮಾಜಿಕ ಜಾಲತಾಣಗಳಲ್ಲಿ ವಾಸ್ತವ ಅಂಶವನ್ನು ಬಹಿರಂಗ ಮಾಡಿದ್ದಾರೆ. ಇದು ನನ್ನ ಸ್ನೇಹಿತನ ತಾಯಿಯ ಸಮಾಧಿ ಎಂದು ವಿಡಿಯೋದಲ್ಲಿರುವ ವ್ಯಕ್ತಿ ಬಹಿರಂಗಪಡಿಸಿದ್ದಾನೆ. ವೃದ್ಧೆ ಕಳೆದ ವರ್ಷ ಮೃತಪಟ್ಟಿದ್ದು, ಆಕೆಯನ್ನು ಅಲ್ಲಿಯೇ ಸಮಾಧಿ ಮಾಡಿದ ನಂತರ, ಅದೇ ಸ್ಥಳದಲ್ಲಿ ಇತರರು ಮೃತರ ಅಂತ್ಯಕ್ರಿಯೆ ನಡೆಸದಂತೆ ತಡೆಯಲು ಅವರ ಕುಟುಂಬ ಸದಸ್ಯರು ಬೀಗವನ್ನು ಹಾಕಿದ್ದರು.

ಸ್ಮಶಾನ ಇರುವ ಮಸ್ಜಿದ್-ಎ-ಸಲಾರ್ ಮುಲ್ಕ್‌ನಲ್ಲಿರುವ ಮುಝಿನ್, ಕೆಲವರು ಮೃತರನ್ನು ಹಳೆಯ ಸಮಾಧಿಗಳಲ್ಲಿ ಹೂಳುತ್ತಾರೆ. ಹಾಗಾಗದಂತೆ ತಡೆಯಲು ನನ್ನ ಸ್ನೇಹಿತ ಸಂಬಂಧಿಕರು ಕಬ್ಬಿಣದ ಗ್ರಿಲ್ ಅಳವಡಿಸಿ ಬೀಗ ಹಾಕಿದ್ದಾರೆ. ಸಮಾಧಿ ಪ್ರವೇಶ ದ್ವಾರಕ್ಕೆ ಹತ್ತಿರವಾಗಿರುವುದರಿಂದ ಸಮಾಧಿಯ ಮೇಲೆ ಗ್ರಿಲ್ ಅಳವಡಿಸಲಾಗಿದೆ ಎಂದರು.