ಮಂಗಳೂರು: ನವಮಂಗಳೂರು ಬಂದರು (NMPT) ಆವರಣದ ಭೂಭಾಗದಲ್ಲಿ ಇಂದು ಅನಿರೀಕ್ಷಿತವಾಗಿ ದೈತ್ಯ ಸುಂಟರಗಾಳಿಯೊಂದು ಕಾಣಿಸಿಕೊಂಡಿದೆ. ಸಾಮಾನ್ಯವಾಗಿ ಸಮುದ್ರದಲ್ಲಿ ಇಂತಹ ದೃಶ್ಯಗಳು ಕಂಡುಬರುತ್ತವೆಯಾದರೂ, ಈ ಬಾರಿ ಭೂಮಿಯ ಮೇಲೆಯೇ ಧೂಳು ಮತ್ತು ಗಾಳಿ ಸುರುಳಿಯಾಕಾರದಲ್ಲಿ ಎತ್ತರಕ್ಕೆ ಜಿಗಿದಿರುವುದು ಕಂಡುಬಂದಿದೆ.
ಬಂದರು ಆವರಣದಲ್ಲಿ ಕೆಲಸ ಮಾಡುತ್ತಿದ್ದ ಸಿಬ್ಬಂದಿಗಳು ಈ ಭಯಾನಕ ದೃಶ್ಯವನ್ನು ಕಂಡು ಆತಂಕಕ್ಕೊಳಗಾಗಿದ್ದಾರೆ. ವಾತಾವರಣದಲ್ಲಿನ ತಾಪಮಾನ ಏರಿಕೆ ಮತ್ತು ಗಾಳಿಯ ಒತ್ತಡದ ವ್ಯತ್ಯಾಸದಿಂದ ಇಂತಹ ‘ಡಸ್ಟ್ ಡೆವಿಲ್’ ಮಾದರಿಯ ಸುಂಟರಗಾಳಿ ಸೃಷ್ಟಿಯಾಗಿದೆ ಎನ್ನಲಾಗುತ್ತಿದೆ. ಇದರ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ.