ಮೂಡುಬಿದ್ರೆ : ಕರ್ನಾಟಕದ ಗ್ರಾಮೀಣ ಪ್ರದೇಶವಾದ ಮೂಡುಬಿದ್ರೆಯ ನಿಡೋಡಿಯಲ್ಲಿ ಹುಟ್ಟಿದ ಒಂದು ಕನಸು ಇಂದು ರಾಷ್ಟ್ರಮಟ್ಟದಲ್ಲಿ ಗುರುತಿಸಿಕೊಂಡಿದೆ.
ನಿಡೋಡಿಯ ರೊನಾಲ್ಡ್ ಸಿಲ್ವನ್ ಡಿಸೋಜಾ ಅವರ ದೂರದೃಷ್ಟಿ, ಪರಿಶ್ರಮ ಮತ್ತು ನಿರಂತರ ಪ್ರಯತ್ನದ ಫಲವಾಗಿ ಬೆಳೆದ ಲೆಕ್ಸಾ ಲೈಟಿಂಗ್ ಟೆಕ್ನಾಲಜೀಸ್ ಪ್ರೈ.ಲಿ. ಸಂಸ್ಥೆಯು ಭಾರತದ ಟಾಪ್ 100 ಎಂಎಸ್‌ಎಂಇ ಸಂಸ್ಥೆಗಳಲ್ಲಿ ಒಂದಾಗಿ ಗುರುತಿಸಿಕೊಂಡಿದೆ.
ನವದೆಹಲಿಯಲ್ಲಿ 2026 ರ ಆಗಸ್ಟ್ 8ರಂದು ನಡೆದ ಸಮಾರಂಭದಲ್ಲಿ ಎಂಎಸ್‌ಎಂಇ ಉದ್ಯೋಗ್‌ ಫೌಂಡೇಷನ್ ವತಿಯಿಂದ ಈ ಪ್ರತಿಷ್ಠಿತ ರಾಷ್ಟ್ರೀಯ ಮಾನ್ಯತೆ ನೀಡಲಾಯಿತು.
ಸರಳ ಹಿನ್ನೆಲೆಯಿಂದ ಉದ್ಯಮದ ಪಯಣ ಆರಂಭಿಸಿದ ರೊನಾಲ್ಡ್ ಸಿಲ್ವನ್ ಡಿಸೋಜಾ, ಗುಣಮಟ್ಟ, ಶಿಸ್ತು, ತಾಂತ್ರಿಕ ನವೀನತೆ ಮತ್ತು ಭಾರತೀಯ ಉತ್ಪಾದನೆಗೆ ಒತ್ತು ನೀಡುವ ಮೂಲಕ ಲೆಕ್ಸಾ ಲೈಟಿಂಗ್ ಸಂಸ್ಥೆಯನ್ನು ಇಂದು ಪ್ರತಿಷ್ಠಿತ ಬೆಳಕಿನ ತಂತ್ರಜ್ಞಾನ ಸಂಸ್ಥೆಯಾಗಿ ರೂಪಿಸಿದ್ದಾರೆ.
‘ಗ್ರಾಮೀಣ ಕರ್ನಾಟಕದಲ್ಲಿ ಕಂಡ ಕನಸು ಒಂದು ದಿನ ಇಡೀ ದೇಶವನ್ನು ಬೆಳಗಿಸಬೇಕು’ ಎಂಬ ಆಶಯದೊಂದಿಗೆ ಆರಂಭವಾದ ಈ ಪಯಣ, ಇಂದು ರಾಷ್ಟ್ರೀಯ ಗೌರವದ ಹಂತವನ್ನು ತಲುಪಿದೆ.
ಈ ಸಾಧನೆಯ ಕುರಿತು ಮಾತನಾಡಿದ ರೊನಾಲ್ಡ್ ಸಿಲ್ವನ್ ಡಿಸೋಜಾ, ಈ ಗೌರವ ನನ್ನೊಬ್ಬರ ಸಾಧನೆಯಲ್ಲ. ಇದು ಲೆಕ್ಸಾ ಕುಟುಂಬದ ಪ್ರತಿಯೊಬ್ಬ ಸದಸ್ಯನ ಪರಿಶ್ರಮ, ನಮ್ಮ ಗ್ರಾಹಕರು, ಪಾಲುದಾರರು, ನನ್ನ ಕುಟುಂಬ ಹಾಗೂ ನಮ್ಮ ಮೇಲಿನ ನಂಬಿಕೆ ಇಟ್ಟ ಪ್ರತಿಯೊಬ್ಬರ ಕೊಡುಗೆಯ ಫಲ. ನಿಡೋಡಿ / ಮೂಡುಬಿದ್ರೆಯಂತಹ ಗ್ರಾಮೀಣ ಪ್ರದೇಶದಿಂದ ಆರಂಭವಾದ ಒಂದು ಕನಸು ಇಂದು ರಾಷ್ಟ್ರಮಟ್ಟದಲ್ಲಿ ಗುರುತಿಸಿಕೊಂಡಿರುವುದು ನನಗೆ ಅಪಾರ ಹೆಮ್ಮೆ ಮತ್ತು ಸಂತೋಷವನ್ನು ನೀಡಿದೆ ಎಂದು ಹೇಳಿದರು.
ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಛಾಪು :
ಲೆಕ್ಸಾ ಲೈಟಿಂಗ್ ಸಂಸ್ಥೆಯ ಬೆಳವಣಿಗೆಯ ಹಿಂದೆ ನಿರಂತರ ಸಂಶೋಧನೆ ಮತ್ತು ಅಭಿವೃದ್ಧಿ, ಸ್ವದೇಶಿ ಉತ್ಪಾದನೆ, ಗುಣಮಟ್ಟದ ಮಾನದಂಡಗಳು ಹಾಗೂ ಜಪಾನೀಸ್ ಕಾರ್ಯವಿಧಾನಗಳ ಅಳವಡಿಕೆ ಪ್ರಮುಖ ಪಾತ್ರ ವಹಿಸಿವೆ.
ಗ್ರಾಮೀಣ ಕರ್ನಾಟಕದಿಂದ ಆರಂಭವಾದ ಈ ಉದ್ಯಮ ಇಂದು ದೇಶದ ವಿವಿಧ ಭಾಗಗಳಲ್ಲಿ ತನ್ನ ಬೆಳಕಿನ ತಂತ್ರಜ್ಞಾನವನ್ನು ತಲುಪಿಸುವುದರ ಜೊತೆಗೆ, ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿಯೂ ತನ್ನ ಛಾಪು ಮೂಡಿಸುತ್ತಿದೆ.
ಕನಸುಗಳಿಗೆ ಯಾವುದೇ ಮಿತಿಗಳಿಲ್ಲ. ನಂಬಿಕೆ, ಶಿಸ್ತು, ನಿರಂತರ ಪ್ರಯತ್ನ ಮತ್ತು ಕಠಿಣ ಪರಿಶ್ರಮ ಇದ್ದರೆ ಗ್ರಾಮೀಣ ಪ್ರದೇಶದಿಂದಲೂ ರಾಷ್ಟ್ರಮಟ್ಟದ ಸಾಧನೆ ಸಾಧ್ಯ’ ಎಂಬುದನ್ನು ರೊನಾಲ್ಡ್ ಸಿಲ್ವನ್ ಡಿಸೋಜಾ ಅವರ ಉದ್ಯಮ ಪಯಣ ಮತ್ತೊಮ್ಮೆ ಸಾಬೀತುಪಡಿಸಿದೆ